Siku lelaki ditemu parai begitang ba bilik tinduk di sebuah kuarters pengajar sekula primari
Cari Berita

Advertisement

Siku lelaki ditemu parai begitang ba bilik tinduk di sebuah kuarters pengajar sekula primari

Frankie John™
March 24, 2019

Gambar pengias
KASIH AMATMansa dipechayaka tusut runding.

KANOWIT: Siku lelaki beumur 45 taun ditemu parai begitang ba bilik tinduk di kuarters perumahan pengajar di sebuah sekula primari, ditu, kemari (Hari Enam).

Ketuai Polis Pampang Kanowit, ASP Faizal Nawi, madahka bangkai lelaki nya (mansa) ditemu bala ke sama sebilik enggau iya urung jam 6.40 lemai kemari pengudah suah ngetuk pintu rumah mansa enggau nadai mega disaut mansa.

Ku iya, nangkan ke nya, menyadi tuai mansa (abang) mutus ati mecahka pintu penama rumah nya enggau meresa ninting bilik sebedau tetemuka siti bilik ti dikuchi ari dalam.

“Pengudah mujur muka pintu bilik nya, menyadi iya meda mansa benung begitang ba tali ti ditanchang ba endur pengait kipas siling, enda engkebut enggau enda enseput agi.

"Tekenyit meda pendiau mansa baka nya, menyadi mansa berumban madahka penusah ke nyadi ngagai jaga enggau ngasuh jaga nya ngaga ripot ngagai polis ngambika bejalaika pengawa nasat," ku iya lebuh ke dirandau pengarang berita, sehari tu tadi

Ku iya, empat raban polis diuluka Sarjan Mejar Gir Taisim enggau tiga raban ari Opis Tasat Jenayah (JSJ) Polis Pampang Kanowit (IPD) berumban ngesah ke palan penusah ke nyadi ngambika ulih bejalaika pengawa nasat.

"Mansa udah parai empat jam ba kuarters ke diuan iya sebedau ditemu raban polis. Mansa dipechayaka tusut runding (stress)," ku iya.

Kes nya ditukuka nyadi kes parai ngenyit (SDR) enggau bangkai mansa dianjung ke Sepital Kanowit kena bejalaika pengawa buntas tasat," tandu iya.