Siku lelaki tuai dipechayaka kena lantak lari di Kilometer 2, Jalai Miri-Bintulu
Cari Berita

Advertisement

Siku lelaki tuai dipechayaka kena lantak lari di Kilometer 2, Jalai Miri-Bintulu

Chief Editor | Berita Iban MY
March 4, 2019

KASIH AMAT: Siku orang tuai (gambar mit) diripotka bebadi nyawa ba palan eksiden ke nyadi.

MIRI: Siku orang tuai ditemu enda enseput ba tisi jalai, dipechayaka kena lantak lari di Kilometer 2, Jalai Miri-Bintulu, sehari tu tadi. 

Orang tuai nya dikelala ngena nama, Diong Ching Hwang, 84 taun, penatai ari Jalai Hwa Kiau, Sibu, enggau raban perubat ari Sepital Miri madahka iya udah nadai ba palan penusah ke nyadi.

Ketuai Opis Tasat enggau Penguasa Trafik Sarawak, Superintenden Alexson Naga Chabu, madahka penusah lantak lari nya dipechayaka nyadi urung jam 7.15 pagi.

"Palan eksiden ke nyadi ianya di KM2 ari muak Miri nuju ke Bintulu semak stesen minyak Shell enggau entuka ke ngelantak orang tuai nya (mansa) udah ngelarika diri enggau apin dikelala.

"Nangkan ke nya, raban polis mega agi ngiga orang ke ngempu entuka ti ngelantak 'mansa' enggau meresa CCTV (kamera litar tertutup) ba palan eksiden ke nyadi," ku iya lebuh ke dirandau pengarang berita sehari tu tadi.

Alexson mega minta orang mayuh ke bisi meda lebuh eksiden nyadi, ngaga ripot ngagai balai polis ke semak.

Bangkai orang tuai nya udah dianjung ke Sepital Miri kena bejalaika pengawa buntas tasat. 

Naka kediatu, kes agi ditasat enggau dipansik ari baruh "Seksyen 41(1) Akta Pengangkutan Jalan 1987".