Header Ads

  • Baru Nyadi

    12 April 2019 - Hari Lima ba Minggu Ke Lima Musim Lent

    Disaut sida, “Kami ukai deka nuku Nuan ngena batu ketegal pengawa ti badas ti dikereja Nuan, tang laban Nuan bejaku busung, laban Nuan, ke semina mensia aja, ngumbai Diri Allah Taala!” - John 10 : 31 - 42

    Bacha Ke Satu: Jeremiah 20: 10 - 13

    Aku ninga genap iku orang betelai, “Utai ti balat ngenakutka bisi di semua endur. Nya alai, aram kitai madahka pasal Jeremiah ngagai perintah.” 

    Indah pangan ke rapat enggau aku deh nganti aku alah. 

    Ku sida, “Nyangka ukur iya ulih ditipu. Nya baru kitai ulih ngalahka iya lalu malas.”

    Tang Nuan, TUHAN, ti kering sereta bekuasa, setanah enggau aku lalu sida ke merinsaka aku deka asa ngapa. Sida deka dipechat belama iya, laban sida enda ulih mujur.

    Tang TUHAN ti Pemadu Bekuasa, Nuan endang ngabas ati enggau runding orang ngena pengelurus. Nuan nemu utai ti di dalam ati enggau runding sida. 

    Nya alai awakka aku meda Nuan malas penyai bala munsuh aku, laban aku udah manggaika pekara aku ba jari Nuan.

    Belagu ke TUHAN! Puji TUHAN! Iya ngelepaska orang ke kena tekan ari kuasa orang ke jai.

    Masmur Entara: Masmur 18: 1 - 2A, 2BC - 3, 4 - 5, 6

    Saut (peda 6): Lebuh aku dituntung penusah, aku ngangauka TUHAN, lalu Iya ninga kangau aku.

    Ke Satu
    Aku rinduka Nuan, TUHAN ke penyaga aku.
    TUHAN nyadika penyaga aku. 
    Iya nyadi kuta aku ti tegap.

    SautLebuh aku dituntung penusah, aku ngangauka TUHAN, lalu Iya ninga kangau aku.

    Ke Dua
    Allah Taala aku nyadika penyaga aku, lalu aku likun begulai enggau Iya. 
    Iya ngelindung aku baka terabai. 
    Iya nyaga aku ngambika aku likun.
    Aku ngangauka TUHAN, lalu Iya ngelepaska aku ari jari munsuh aku. 
    Puji TUHAN!

    SautLebuh aku dituntung penusah, aku ngangauka TUHAN, lalu Iya ninga kangau aku.

    Ke Tiga
    Kuasa pemati bekelingika aku. 
    Kuasa pengerusak ngelamun aku baka umbak.
    Kuasa pemati bekelingika aku, 
    lalu pendam nan panjuk kena nyintak aku.

    SautLebuh aku dituntung penusah, aku ngangauka TUHAN, lalu Iya ninga kangau aku.

    Ke Empat
    Lebuh aku dituntung penusah, aku ngangauka TUHAN. 
    Aku ngangauka Allah Taala aku. 
    Iya ninga aku dalam rumah Iya. 
    Iya ninga kangau aku.

    SautLebuh aku dituntung penusah, aku ngangauka TUHAN, lalu Iya ninga kangau aku.

    Aklamasi sebedau Injil (peda John 6: 63C & 68C):

    Jaku Nuan TUHAN nya Roh enggau pengidup.
    Nuan ngembuan jaku ti meri pengidup ti meruan belama iya.

    Bacha Injil: John 10: 31 - 42

    Orang Judah lalu ngambi batu baru, deka nuku Jesus.

    Jesus lalu nyaut sida, “Aku udah ngayanka mayuh bengkah kereja ti badas di mua kita ari Apai. Kereja ni ti ngasuh kita keran deka nuku Aku ngena batu?”

    Disaut sida, “Kami ukai deka nuku Nuan ngena batu ketegal pengawa ti badas ti dikereja Nuan, tang laban Nuan bejaku busung, laban Nuan, ke semina mensia aja, ngumbai Diri Allah Taala!”

    Disaut Jesus, “Kati jaku tu nadai ditulis dalam Adat kita: Ku Allah Taala bejaku, ‘Kita tu petara’?

    Enti orang ke nerima jaku Allah Taala nya dikumbai ‘petara’ -- lalu jaku Bup Kudus endang enda ulih dibuai baka ni ku kita ngumbai Aku, ke udah dipilih lalu dikirumka Apai ngagai dunya, bejaku busung ketegal Aku madahka Diri Anak Allah Taala?

    Enti Aku enda ngereja pengawa Apai Aku, anang meh kita arapka Aku.

    Tang enti Aku ngereja pengawa Apai Aku, taja pen kita enda arapka Aku, kita patut arapka pengawa ti dikereja Aku, ngambika kita nemu sereta meretikaApai bisi dalam Aku, lalu Aku dalam Apai.”

    Sida lalu sekali agi nguji nangkap Iya, tang Iya ngelechut ari jari sida.

    Iya lalu pulai baru meraka Sungai Jordan, ngagai endur alai John ke terubah maptisa orang, lalu diau dia.

    Mayuh orang datai ngagai Iya. Ku sida, “John nadai ngereja kereja ajih, tang semua utai ti disebut John pasal orang tu, amat magang.”

    Lalu mayuh orang dia arapka Iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads