Header Ads

  • Baru Nyadi

    18 April 2019 - Hari Empat Kudus (Chrism Mass)

    “Roh Tuhan bisi ba Aku, laban Iya udah nata Aku ngambika Aku nusui Berita Manah ngagai orang ke seranta. Iya udah ngasuh Aku madahka pengelepas ke orang ke kena tangkap enggau pengerai ke orang ke buta, pengelepas ke orang ke kena tekan lalu madahka maya udah datai alai Tuhan deka ngelepaska nembiak Iya.” -Luke 4: 16 - 21

    Bacha Ke Satu: Isaiah 61: 1 - 3A, 6A, 8B - 9

    TUHAN ti Pemadu Tinggi udah ngiri aku enggau Roh Kudus Iya.

    Iya udah milih aku, lalu ngasuh aku mai berita manah ngagai orang ke seranta, nyumanka ati orang ke tusah, madahka pengelepas ke orang ke kena tangkap enggau pengelepas ke orang ke dalam rumah jil.

    Iya udah ngasuh aku madahka maya udah datai alai TUHAN deka nyelamatka nembiak Iya lalu ngalahka bala munsuh sida.

    Iya udah ngasuh aku merindang semua orang ke ngulit.

    Meri ngagai sida ke ngulit di Sion pengaga enggau pengelantang, kena nganti ati ti tusah, pantun puji, kena nganti ati ti sinu.

    Lalu kita deka dikumbai bala imam TUHAN, bala nembiak Allah Taala kitai.

    Aku tetap deka ngupah bala nembiak Aku lalu ngaga sempekat ti meruan belama iya enggau sida.

    Sida deka tebilang nama ba semua bansa.

    Genap iku orang ke meda sida deka nemu sida nya endang orang ke udah diberekatka Aku.”

    Masmur Entara: Masmur 89: 20 - 21, 24 & 26

    Saut (peda 1): Aku deka seruran belagu ngenang pemadas TUHAN.

    Ke Satu
    Aku udah nyiri nembiak Aku David nyadi raja
    lebuh Aku nata iya ngena minyak ti kudus.
    Pengering Aku deka seruran enggau iya.
    Kuasa Aku deka ngasuh iya kering.

    SautAku deka seruran belagu ngenang pemadas TUHAN.

    Ke Dua
    Aku deka rinduka iya sereta tetap ati ngagai iya.
    Aku deka ngasuh iya seruran menang.
    Iya deka nyebut ngagai aku, ‘Nuan Apai enggau Allah Taala aku.
    Nuan Penyaga enggau Juruselamat aku.’

    SautAku deka seruran belagu ngenang pemadas TUHAN.

    Bacha Ke Dua: Pemandang 1: 5 - 8

    Awakka berekat enggau pemaik ari Jesus Kristus, Saksi ke tetap ati, ke terubah diangkatka ari mati, ke merintah semua raja di dunya.

    Ngagai Iya ke rinduka kitai, lalu udah ngelepaska kitai ari dosa, ulih darah Iya, lalu udah ngaga kitai nyadi perintah imam ti bekereja ke Allah Taala Iya, ti Apai Iya, beri meh mulia enggau kuasa ngagai Iya belama-lama iya! Amin.

    Peda! Iya datai dalam remang, lalu semua orang deka meda Iya, nyengkaum orang ke udah ngerejang Iya.

    Lalu semua bansa di dunya tu deka bekeduie nyabak ketegal Iya.

    Awakka utai nya nyadi! Amin.

    “Aku tu Pun enggau Pengujung, ku Tuhan Allah Taala ti Pemadu Bekuasa bejaku, Iya ti diatu, ti udah, enggau ti deka datai.

    Aklamasi sebedau Injil (Isaiah 61: 1 / Luke 4: 18):

    Roh Tuhan bisi ba Aku, laban Iya udah ngasuh aku mai berita manah ngagai orang ke seranta.

    Bacha Injil: Luke 4: 16 - 21

    Lebuh Iya datai di Nasaret, alai Iya ke diau kenyau ari mit, Iya mansang ngagai balai gempuru baka selama lebuh hari Sabat.

    Iya bediri, deka macha ari Bup Kudus.

    Bup nabi Isaiah lalu disuaka ngagai Iya.

    Iya muka bup nya, lalu tetemuka siti endur alai jaku tu ditulis,

    “Roh Tuhan bisi ba Aku, laban Iya udah nata Aku ngambika Aku nusui Berita Manah ngagai orang ke seranta. Iya udah ngasuh Aku madahka pengelepas ke orang ke kena tangkap enggau pengerai ke orang ke buta, pengelepas ke orang ke kena tekan lalu madahka maya udah datai alai Tuhan deka ngelepaska nembiak Iya.”

    Iya lalu ngulungka bup nya baru, lalu nyuaka bup nya pulai baru ngagai orang ke udah nyuaka bup nya ngagai Iya.

    Iya lalu duduk.

    Semua orang dalam balai gempuru nya bela merening ngagai Iya magang.

    Iya lalu madah ngagai sida, “Sehari tu ayat dalam Bup Kudus tu udah dikamatka munyi ti udah didinga kita.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads