Header Ads

  • Baru Nyadi

    20 April 2019 - Hari Enam Kudus (Malam Paska / Easter Vigil)

    Sida lalu nemu batu nya udah dibaringka ari mua kubur nya, tang lebuh sida tama ke dalam kubur nya, sida nadai nemu bangkai Tuhan Jesus dia. - John 24: 1 - 12

    Bacha Ke Satu: Pemungkal 1: 1 - 2: 2

    Ba pun iya kelia, * lebuh Allah Taala berengkah ngaga langit enggau dunya,
    dunya endang apin bisi bakal tauka gamal sereta nadai utai nguan. 

    Semina ribut ti deras ari Allah Taala aja ti bepuput atas tasik ti agi petang.

    Allah Taala lalu bejaku, “Awakka penampak pegari.” 

    Penampak lalu pegari.

    Allah Taala meda penampak nya manah; lalu Iya nyeraraka penampak nya ari pemetang.

    Iya ngumbai penampak nya “Siang” lalu pemetang nya dikumbai Iya “Malam.” 

    Lemai abis lalu pagi pen datai. 

    Nya hari ti keterubah. 

    Lalu ku Allah Taala bejaku, “Awakka kebung pegari kena nyeraraka ai ti di atas ari ai ti di baruh.

    Nya alai Allah Taala ngaga kebung nya lalu nyeraraka ai ti di baruh kebung nya ari ai ti ari atas kebung nya. Utai nya lalu nyadi.

    Iya ngumbai kebung nya “Langit.” Lemai abis lalu pagi pen datai. 

    Nya hari ti kedua.

    Udah nya Allah Taala bejaku, “Awakka ai ti di baruh langit begelumu ba siti endur, ngambika tanah pegari.” 

    Utai nya lalu nyadi.

    Iya ngumbai tanah “Darat,” lalu ai ti begelumu dikumbai Iya “Tasik.” 

    Lalu Allah Taala meda utai nya manah.

    Udah nya Iya bejaku, “Awakka tanah mansutka semua macham utai ti tumbuh: utai ti mansutka leka, enggau semua macham kayu ti mansutka buah ti bisi leka.” 

    Utai nya lalu nyadi.

    Nya alai, tanah mansutka semua macham utai ti tumbuh, lalu Allah Taala meda utai nya manah.

    Lemai abis lalu pagi pen datai. Nya hari ti ketiga.

    Udah nya Allah Taala bejaku, “Awakka mayuh macham penampak pegari di langit, kena nyeraraka siang ari malam, enggau kena nunjukka maya hari, taun enggau maya gawai belabuh.

    Sida deka manchar di langit lalu meri penampak ngagai dunya.” Utai nya lalu nyadi.
    Nya alai Allah Taala ngaga dua igi penampak ti besai, iya nya mata hari ti bekuasa lebuh siang hari, enggau bulan ti bekuasa lebuh malam hari. 

    Iya mega ngaga bintang.

    Iya ngengkahka semua penampak nya di langit, ngambika sida manchar ngagai dunya, bekuasa lebuh siang enggau lebuh malam hari, sereta nyeraraka penampak ari pemetang. 

    Lalu Allah Taala meda utai nya manah.

    Lemai abis lalu pagi pen datai. 

    Nya hari ti keempat.

    Udah nya Allah Taala bejaku, “Awakka ai penuh laban semua bansa utai ti idup, lalu awakka burung terebai di langit.”

    Nya alai Allah Taala ngaga jelu ti besai sereta nyelai di tasik, semua bansa utai ti idup dalam ai, enggau semua bansa burung. 

    Lalu Allah Taala meda utai nya manah.

    Iya merekatka semua sida, lalu ngasuh utai ti idup dalam ai beranak betelesak, lalu ngemenuhka tasik. 

    Iya mega ngasuh burung beranak betelesak di dunya.

    Lemai abis lalu pagi pen datai. Nya hari ti kelima.

    Udah nya Allah Taala bejaku, “Awakka dunya mansutka semua bansa jelu ti idup: jelu tupi, jelu babas, enggau jelu ti ngerayap.” 

    Utai nya lalu nyadi.

    Nya alai Allah Taala ngaga semua bansa jelu, lalu Iya meda semua utai nya manah magang.

    Udah nya Allah Taala bejaku, “Aram Kitai ngaga mensia neladan gamal Kitai Empu, baka gamal Kitai Empu; lalu awakka sida bekuasa atas ikan, burung, enggau semua jelu di dunya tu, enggau semua utai ti ngerayap ba tanah.”

    Nya alai Allah Taala ngaga mensia neladan gamal Iya Empu; Iya ngaga sida lelaki enggau indu.

    Allah Taala merekatka sida, lalu bejaku ngagai sida, “Beranak betelesak lalu ngemenuhka dunya meh kita sereta bekuasa atas iya; perintah meh ikan, burung, enggau semua utai ti idup di dunya.”

    Ku Allah Taala bejaku, “Aku meri kita semua macham leka utai enggau semua macham buah nyadika pemakai kita; lalu ke semua bansa jelu babas ti di dunya, enggau ke semua bansa burung, Aku meri sida rumput enggau utai ti bisi daun nyadika pemakai sida.” 

    Utai nya lalu nyadi.

    Allah Taala meda semua utai ti udah digaga Iya manah magang. 

    Lemai abis lalu pagi pen datai. 

    Nya hari ti keenam.

    Nya alai langit enggau dunya, enggau semua utai ti dalam sida tembu magang digaga. 

    Ba hari ti ketujuh Allah Taala tembu ngereja semua pengawa Iya, lalu ngetu gawa.

    Masmur Entara: Masmur 104: 1 - 2, 5 - 6, 10 & 12,  13 - 14, 24 & 35

    Saut (peda 30): Kirum ke Roh Nuan TUHAN, lalu beri pengidup ti baru ngagai dunya.

    Ke Satu
    Puji meh TUHAN, O semengat aku! 
    O TUHAN Allah Taala aku, naka meh pemesai kuasa Nuan! 
    Nuan ngerasukka mulia raja.
    Nuan nyerayung Diri ngena penampak. 
    Nuan udah mintarka langit baka langkau kain

    SautKirum ke Roh Nuan TUHAN, lalu beri pengidup ti baru ngagai dunya.

    Ke Dua
    Nuan udah ngengkahka dunya tegap ba pugu iya, 
    lalu iya enda dikinsitka.
    Nuan udah ngengkahka tasik ba atas pugu dunya baka baju panjai, 
    lalu ai ngelamun bukit.

    SautKirum ke Roh Nuan TUHAN, lalu beri pengidup ti baru ngagai dunya.

    Ke Tiga
    Nuan ngasuh mata ai mansutka ai ba lebak, 
    lalu sungai rarat ba entara bukit.
    Ba kayu ti semak nya, 
    burung ngaga sarang lalu belagu.

    SautKirum ke Roh Nuan TUHAN, lalu beri pengidup ti baru ngagai dunya.

    Ke Empat
    Ari langit Nuan ngasuh ai ujan labuh ninggang bukit, 
    lalu dunya penuh laban berekat Nuan.
    Nuan ngasuh rumput tumbuh ngambika bisi diempa jelu sapi, 
    lalu meri kami utai ngambika bisi ditanam kami, 
    ngambika kami bulih asil ari tanah.

    SautKirum ke Roh Nuan TUHAN, lalu beri pengidup ti baru ngagai dunya.

    Ke Lima
    TUHAN, Nuan udah ngaga mayuh macham utai! 
    Naka meh pemintar Nuan ngaga semua utai nya! 
    Dunya nyau penuh laban utai ti idup ti digaga Nuan.
    Awakka orang ke bedosa dibuai ari dunya. 
    Awakka orang ke jai abis lengis. 
    Puji meh TUHAN, O semengat aku! Puji meh TUHAN!

    SautKirum ke Roh Nuan TUHAN, lalu beri pengidup ti baru ngagai dunya.

    Bacha Ke Dua: Pemungkal 22: 1 - 18

    Nyau kelama udah bekau nya, Allah Taala nguji Abraham. 

    Ku Iya bejaku ngagai Abraham, “Abraham!” Abraham lalu nyaut, “Tu aku!”

    Ku Allah Taala bejaku, “Bai anak nuan, anak tunggal nuan Isak, ke balat dikerinduka nuan, lalu mansang nuan ngagai menua Moriah, lalu serahka iya dia nyadika piring tunu ba bukit ti deka ditunjukka Aku ngagai nuan.”

    Nya alai Abraham angkat tumu pagi hari siti, nyendiaka keledai iya, lalu mai dua iku ari orang gaji iya, sama enggau anak iya Isak; iya lalu netak kayu kena nunu piring, lalu mupuk ngagai endur ti jauh ti udah ditunjukka Allah Taala ngagai iya.

    Ba hari ti ketiga, Abraham tepedaka endur nya ari jauh.

    Udah nya iya lalu bejaku ngagai orang gaji iya, “Seduai nganti ditu, ngemataka keledai. 

    Aku enggau anak aku deka kin, lalu nyembah Allah Taala, lalu udah nya kami duai deka pulai baru ngagai seduai.”

    Abraham lalu ngasuh Isak ngesan kayu ti deka dikena nunu piring, lalu iya empu mai sebilah duku, enggau bara api. 

    Lebuh seduai iya benung bejalai, Isak lalu bejaku, “Apai!” “Nama, anak?” ku Abraham nyaut. 

    Isak lalu nanya, “Tua bisi bara api enggau kayu, tang dini alai anak domba nyadika piring tunu?”

    Disaut Abraham, “Allah Taala Empu deka meri siku anak domba nyadika piring nya.” 

    Seduai iya majak bejalai.

    Lebuh seduai iya datai ba endur ti udah dipadahka Allah Taala ngagai Abraham, Abraham lalu ngaga siti alta, lalu nugungka kayu api ba alta nya. 

    Iya lalu nanchang anak iya Isak, lalu ngengkahka iya ba atas tugung kayu nya.

    Udah nya Abraham lalu ngambi duku, deka ngelar anak iya.

    Tang melikat TUHAN ngangauka iya ari serega, ku iya, “Abraham! Abraham!”

    Abraham lalu nyaut, “Tu aku!”

    “Anang ngemediska nembiak nya, tauka ngereja sebarang utai ngagai iya,” 

    ku melikat nya bejaku, “laban diatu Aku nemu nuan amat nangika Allah Taala, laban nuan enda sayauka anak tunggal nuan tang nyerahka iya ngagai Allah Taala.”

    Abraham malik, lalu tepedaka siku bedus ti lelaki tekait tanduk ba babas. 

    Iya mansang lalu ngambi bedus nya, lalu nyerahka bedus nya nyadika piring tunu kena nyilih anak iya.

    Abraham lalu ngumbai endur nya “TUHAN Nyendia.”  

    Nyentuk ngagai sehari tu, orang agi nyebut, “TUHAN deka nyendiaka utai ba bukit Iya.”

    Melikat TUHAN lalu ngangauka Abraham ari serega kedua kali,

    Ku Iya bejaku, “Aku ti TUHAN besumpah atas nama Aku Empu, Aku deka meri berekat ti besai ngagai nuan, laban nuan udah ngereja utai tu, lalu enda sayauka anak tunggal nuan tang nyerahka iya ngagai Aku.

    Aku besemaya deka meri nuan mayuh peturun, ngemayuh bintang ti di langit, tauka ngemayuh pasir ti ba tebing tasik. 

    Peturun nuan deka ngalahka munsuh sida.

    Semua bansa deka minta Aku merekatka sida, baka Aku ti udah merekatka peturun nuan, ketegal nuan udah ngasika jaku Aku.”

    Masmur Entara: Masmur 16: 5 & 8, 9 - 10, 11

    Saut (peda 5a): Nuan meh ke dikemisi aku, O TUHAN.

    Ke Satu
    Semina Nuan aja, TUHAN, ke dikemisi aku 
    lalu Nuan meri aku semua utai ti dipeguna aku. 
    Pengidup aku ba jari Nuan.
    Aku seruran nemu TUHAN bisi enggau aku. 
    Iya semak aku, lalu nadai utai ulih ngelebuka aku.

    SautNuan meh ke dikemisi aku, O TUHAN.

    Ke Dua
    Nya alai aku meri terima kasih sereta gaga ati, 
    lalu aku berasai likun,
    laban Nuan nyaga aku ari kuasa pemati. 
    Aku udah betuaika Nuan enggau ati ti tetap, 
    lalu Nuan enda ninggalka aku di dunya pemati.

    SautNuan meh ke dikemisi aku, O TUHAN.

    Ke Tiga
    Nuan nunjukka ngagai aku jalai ti nuju ngagai pengidup. 
    Ati aku gaga laban Nuan bisi enggau aku
    lalu ati aku lantang belama iya.

    SautNuan meh ke dikemisi aku, O TUHAN.

    Bacha Ke Tiga: Pemansut 14: 15 - 15: 1

    Ku TUHAN bejaku ngagai Moses, “Nama kebuah nuan nyabak minta saup? Asuh orang Israel bejalai.

    Angkatka tungkat nuan, lalu kedarka iya atas tasik. Ai nya deka bebagi, lalu orang Israel ulih bejalai nengah tasik nya nengah tanah ti rangkai.

    Aku deka ngasuh ati orang Ejip kieh, datai ke sida deka mansang ngagai tasik nya, begagaika sida, lalu Aku deka bulih mulia ketegal Aku menang ngelaban raja menua Ejip enggau bala soldadu iya, kerita perang iya, enggau orang ke nepan kerita perang iya.

    Lebuh Aku udah ngalahka sida, nya baru orang Ejip deka nemu Aku endang TUHAN.”

    Melikat TUHAN ti udah bejalai dulu ari bala soldadu orang Israel lalu mindah tunga kebelakang bala orang Israel. 

    Tiang mua hari nya mega mindah lalu nyeraraka bala orang Ejip ari bala orang Israel. 

    Pemetang mua hari nya mungkus orang Israel, tang lebuh malam hari iya meri sida penampak.  

    Nya alai semalam-malam nya bala soldadu dua bengkah nya enda ulih datai semak ngagai pangan diri.

    Moses ngedarka jari iya atas tasik nya, lalu TUHAN muputka ai tasik nya ngena ribut ti deras ari timur. 

    Ribut nya muput semalam-malam nya, lalu ngasuh tasik nya rangkai. 

    Ai nya bebagi dua, lalu orang Israel bejalai nengah tasik nya nengah tanah ti rangkai. 

    Ai nya nyau bedinding ari sepiak-sepiak sida.

    Orang Ejip lalu begagaika sida nengah tasik nya, mai semua kuda, kerita perang, enggau bala orang ke nepan kerita perang.

    Lebuh hari nyau deka tawas, TUHAN merening ke baruh ari tiang api enggau ari gentilang remang, ngagai bala soldadu orang Ejip, lalu sida begau abis ati. 

    TUHAN ngasuh kaki kerita perang sida lekat, ngambika kaki kerita perang sida enda tentu ulih bepusin. 

    Ku orang Ejip bejaku, “TUHAN ti beperang ngelaban kitai ngarika orang Israel. Aram kitai lari ari tu!”

    TUHAN lalu bejaku ngagai Moses, “Kedarka jari nuan atas tasik nya, ngambika ai pulai baru lalu ngelamun orang Ejip enggau kerita perang enggau orang ke nepan kerita perang.”

    Moses lalu ngedarka jari iya atas tasik nya, lalu ba rerak tawas pagi nya, ai nya lalu pulai baru ngenalam iya ti dulu. 

    Orang Ejip nguji ngelarika diri ari ai nya, tang TUHAN nikauka sida ngagai tasik nya.

    Ai tasik nya pulai baru, lalu ngelamun kerita perang, orang ke nepan kerita perang, enggau semua bala soldadu orang Ejip ti udah begagaika orang Israel ngagai tasik nya. 

    Nadai siku sida idup.

    Tang orang Israel bejalai nengah tasik nya nengah tanah ti rangkai, lalu ai nyau bedinding ari sepiak-sepiak sida.

    Nya alai sehari nya TUHAN nyelamatka orang Israel ari orang Ejip, lalu orang Israel meda bangkai orang Ejip nyau betegaring ba sebelah tebing tasik nya.

    Lebuh orang Israel meda pemesai kuasa ti dikena TUHAN ngalahka orang Ejip, sida lalu nangika TUHAN. 

    Sida arapka TUHAN, sereta arapka nembiak Iya, Moses.

    Udah nya Moses enggau orang Israel lalu nyanyi lagu tu kena muji TUHAN: “Aku deka belagu muji TUHAN, laban Iya udah menang. 

    Iya udah nikauka kuda enggau orang ke nepan kuda ngagai tasik.

    Masmur Entara: Pemansut 15: 1 - 2, 3 - 5, 6 - 7, 17 - 18

    Saut (peda 1): Aram kitai belagu muji TUHAN, laban Iya udah menang.

    Ke Satu
    Aku deka belagu muji TUHAN, laban Iya udah menang. 
    Iya udah nikauka kuda enggau orang ke nepan kuda ngagai tasik.
    TUHAN endang penyaga aku ti kering ti udah ngelepaska aku. 
    Iya Allah Taala aku, lalu aku deka muji Iya ti Allah Taala apai aku, 
    lalu aku deka belagu ngemesaika nama Iya.

    SautAram kitai belagu muji TUHAN, laban Iya udah menang.

    Ke Dua
    TUHAN endang tau serang. TUHAN meh nama Iya.
    Iya udah nikauka bala soldadu orang Ejip 
    enggau kerita perang sida ngagai tasik. 
    Bala pemesai soldadu ti berani udah lemas dalam Tasik Mirah.
    Tasik ti dalam udah ngelamun sida. 
    Sida tengelam ngagai buntut tasik baka batu.

    SautAram kitai belagu muji TUHAN, laban Iya udah menang.

    Ke Tiga
    Jari kanan Nuan, TUHAN, endang bekuasa, 
    ti ngeredakka munsuh.
    Nuan ngena kuasa diraja Nuan ngalahka munsuh Nuan. 
    Pengeringat Nuan mau baka api lalu nunu sida baka jerami.

    SautAram kitai belagu muji TUHAN, laban Iya udah menang.

    Ke Empat
    Nuan mai sida tama, lalu nanam sida ba bukit Nuan, 
    ba endur ti udah dipilih Nuan nyadika endur alai rumah Nuan,
    iya nya Langkau Kain TUHAN ti udah digaga Nuan Empu.
    Nuan, TUHAN, deka nyadi Raja belama lama iya.

    SautAram kitai belagu muji TUHAN, laban Iya udah menang.

    Bacha Ke Empat: Isaiah 54: 5 - 14

    Ku TUHAN bejaku:

    Allah Taala ti ngaga nuan deka nyadika laki nuan. Nama Iya TUHAN ti Pemadu Bekuasa. 

    Allah Taala ke disembah orang Israel ti kudus deka nebus nuan. 

    Iya nya ke merintah semua dunya.

    Israel, nuan baka bini ke agi biak, ke ditinggalka laki, lalu balat tusah ati. 

    Tang TUHAN ngangauka nuan pulai baru ngagai Iya. 

    Ku iya: “Aku ninggalka nuan sekejap aja. Aku deka ngambi nuan pulai baru enggau ati ti balat rindu.

    Aku nguingka Diri ari nuan enda lama, laban Aku ringat, tang Aku deka ngayanka pengerindu Aku ngagai nuan belama iya.” 

    Pia ku TUHAN ti nebus nuan bejaku.

    “Lebuh maya Noah menya, Aku besemaya enda agi ngampuhka dunya ngena ai bah. 

    Diatu Aku besemaya enda agi ringat ngagai nuan. 

    Aku enda nganu tauka ngukum nuan.

    Bukit enggau munggu nyangka tau tumpur, tang pengerindu Aku ke nuan enda nemu abis. 

    Aku deka ngingatka sempekat pemaik Aku belama iya.” 

    Pia ku TUHAN ti rinduka nuan bejaku.

    Ku TUHAN bejaku, “O Jerusalem, nuan nengeri ti merinsa, ti nadai daya, ti nadai orang merindang. 

    Aku deka ngaga pugu nuan baru ngena batu ti berega.

    Aku deka ngaga menara nuan ngena batu sejabu pintu kuta nuan ngena batu ti beperenching baka api, enggau dinding ti ngelingi nuan ngena batu ti berega.

    “Aku Empu deka ngajar bala nembiak nuan lalu meri sida pengaya enggau pemaik.

    Atur ti betul enggau pengelurus deka ngasuh nuan kering. 

    Nuan deka diau likun ari orang ke nekanka pengidup enggau ari utai ti balat ngenakut.

    Masmur Entara: Masmur 30: 1 & 3, 4 - 5, 10 - 12

    Saut (peda 1a): Aku muji Nuan, O TUHAN, laban Nuan udah ngidupka aku.

    Ke Satu
    Aku muji Nuan, O TUHAN, laban Nuan udah ngidupka aku 
    lalu enda nyagi munsuh aku ketawaka aku.
    Nuan nagang aku mati; lebuh aku mansang ngagai dunya pemati, 
    Nuan ngidupka aku baru.

    SautAku muji Nuan, O TUHAN, laban Nuan udah ngidupka aku.

    Ke Dua
    Belagu muji TUHAN semua kita ke nembiak Iya! 
    Kingatka utai ti udah dikereja Iya ti Kudus, 
    lalu beri terima kasih ngagai Iya!
    Iya ringat enda lama, tang pemadas Iya tan seumur idup. 
    Ai mata nyangka lilih lebuh malam hari, 
    tang pengaga datai lebuh pagi hari.

    SautAku muji Nuan, O TUHAN, laban Nuan udah ngidupka aku.

    Ke Tiga
    Dingaka aku, TUHAN, lalu kasihka aku! Tulung aku, TUHAN!
    Nuan udah ngubah ati aku ti tusah lalu ngasuh aku betanda gaga ati. 
    Nuan udah muai ati aku ti tusah lalu malut aku ngena pengaga.
    Nya alai aku enda tau enda bemunyi. 
    Aku deka belagu muji Nuan. 
    O TUHAN, Nuan meh Allah Taala aku. 
    Aku deka meri terima kasih ngagai Nuan belama iya.

    SautAku muji Nuan, O TUHAN, laban Nuan udah ngidupka aku.

    Bacha Ke Lima: Isaiah 55: 1 - 11

    Ku TUHAN bejaku, “Datai kitu, semua kita ke aus, tu ai amat! Datai kitu, kita ke nadai duit, terima meh gandum enggau enda bebayar, lalu empa! Datai kitu! Irup wain enggau ai tusu, enggau enda bebayar!

    Nama kebuah bebelika utai ti enda ngasuh kita kenyang? Nama kebuah ngena duit ari gaji kita, tang agi lapar? 

    Pendingka Aku, lalu kereja utai ti diasuh Aku, nya baru kita deka makai pemakai ti pemadu manah.

    “Anang enda mending diatu, kita ke nembiak Aku, lalu datai ngagai Aku. 

    Datai ngagai Aku, lalu kita deka bulih pengidup! Aku deka ngaga siti sempekat ti meruan belama iya enggau kita lalu meri kita berekat ti udah disemaya Aku ngagai David.

    Aku udah ngaga David nyadi tuai, enggau nyadika kepala ke mayuh bengkah bansa, lalu ulih iya, Aku udah ngayanka kuasa Aku ngagai sida.

    Diatu kita deka mesanka semua bansa ti enda ditemu kita. 

    Dulu suba sida enda nemu kita, tang diatu sida deka belanda datai lalu begulai enggau kita! Aku TUHAN Allah Taala kita, Allah Taala ke disembah orang Israel ti kudus, deka ngasuh semua utai tu nyadi. Aku deka meri kita basa enggau mulia.”

    Kuingka diri ngagai TUHAN, lalu besampi ngagai Iya, laban Iya diatu nyau semak.

    Awakka orang ke jai, ninggalka jalai pengidup sida lalu ngubah chara sida berunding. 

    Awakka sida nguingka diri ngagai TUHAN Allah Taala kitai. 

    Iya endang kasih, lalu jampat ngampun.

    Ku TUHAN bejaku, “Runding Aku enda baka runding kita, lalu jalai Aku enda baka jalai kita.

    Baka langit ti tinggi ari atas tanah, baka nya meh jalai enggau runding Aku tinggi agi ari jalai enggau runding kita.

    “Leka jaku Aku baka seleju enggau ujan ti labuh ari langit lalu meri ai ngagai dunya. 

    Sida ngasuh utai ti ditanam tumbuh lalu mansutka benih ngambika bisi ditanam, enggau pemakai ngambika bisi diempa.

    Baka nya meh jaku ti pansut ari mulut Aku. Iya tetap deka mujur ngereja utai ti udah diperambu Aku ke iya. 

    Iya deka ngereja utai ti diasuh Aku kereja iya.

    Masmur Entara: Isaiah 12: 2 - 3, 4, 5 - 6

    Saut (peda 3a): Baka ai ti ngasuh orang ke aus gaga, bala nembiak Allah Taala deka rami gaga lebuh Iya ngelepaska sida.

    Ke Satu
    Allah Taala endang Juruselamat aku; 
    Aku deka manggaika pengarap aku ba Iya lalu enda takut. 
    TUHAN meri aku kuasa enggau pengering. 
    Iya endang Juruselamat aku.
    Baka ai ti ngasuh orang ke aus gaga, 
    baka nya meh bala nembiak Allah Taala deka rami gaga 
    lebuh Iya ngelepaska sida.

    SautBaka ai ti ngasuh orang ke aus gaga, bala nembiak Allah Taala deka rami gaga lebuh Iya ngelepaska sida.

    Ke Dua
    Maya deka datai alai orang mayuh deka belagu, 
    “Beri terima kasih ngagai TUHAN! 
    Kangauka Iya minta Iya nulung kita! 
    Padahka ngagai semua bansa utai ti udah dikereja Iya! 
    Padahka ngagai sida pasal pemesai kuasa Iya!

    SautBaka ai ti ngasuh orang ke aus gaga, bala nembiak Allah Taala deka rami gaga lebuh Iya ngelepaska sida.

    Ke Tiga
    Belagu muji TUHAN, ketegal utai ti besai ti udah dikereja Iya. 
    Awakka semua dunya ninga berita nya.
    Awakka semua orang ke diau di Sion manjung lalu belagu! 
    Allah Taala ke disembah orang Israel ti kudus endang besai kuasa, 
    lalu Iya diau enggau bala nembiak Iya.”

    SautBaka ai ti ngasuh orang ke aus gaga, bala nembiak Allah Taala deka rami gaga lebuh Iya ngelepaska sida.

    Bacha Ke Enam: Baruk 3: 9 - 15, 32 - 4: 4

    O Israel, dingaka semua pengasuh ti meri pengidup, lalu peratika semua utai nya ngambika kita bepenemu. 

    O Israel, nama kebuah nuan ba menua munsuh? Nama kebuah nuan nyau tuai di menua orang bukai? Nama kebuah nuan ngamahka diri baka orang ke mati, lalu begulai enggau raban orang ke mati? 

    Nuan baka nya laban nuan udah ninggalka pun penemu-dalam! Enti sema nuan nitihka peneka Allah Taala, tentu pengidup nuan deka bisi pemaik ke selama-lama iya. 

    Belajar meh ba sebarang endur ti bisi penemu-dalam, pengering enggau pemereti ati, lalu nuan deka terus nemu endur ngulihka umur panjai enggau pengelantang, penampak ti meri penerang ngagai pengidup enggau pemaik.

    Sapa udah tetemuka endur penemu-dalam tauka udah tama ngagai rumah endur pengaya reta iya?

    Semina Allah Taala siku aja ti nemu semua utai tetemuka penemu-dalam ngena pemereti ati Iya. 

    Iya ngaga dunya ti meruan belama, lalu ngisi iya enggau mayuh macham jelu. 

    Iya ngangauka penampak, lalu penampak gegetar datai. 

    Iya ngirumka penampak, penampak ningaka Iya, lalu mansang. 

    Semua bintang bekebelik manchar naka pemanah, penuh enggau pengaga ba endur sida. 

    Lebuh Tuhan ngangau, semua bintang nyaut enggau jampat; sida bekebelik manchar, lalu ngerinduka Iya ti ngaga sida. 

    Iya meh Allah Taala kitai, lalu siku pen nadai baka Iya. 

    Iya meh ke nemu semua jalai nuju penemu-dalam, lalu meri iya ngagai orang Israel, nembiak ke dikerindu Iya. 

    Kenyau ari nya, penemu-dalam bisi dipeda di dunya, lalu begulai enggau mensia.

    Penemu-dalam nya bup pengasuh Allah Taala, Adat Moses ti meruan selama-lama iya. 

    Semua orang ke bepegai ba Adat nya deka idup, tang orang ke ninggalka iya deka mati. 

    O Israel, pulai meh, lalu bepegai teguh ba penemu-dalam nya. 

    Bejalai meh nuju penampak ti dipancharka iya. Anang nyerahka mulia enggau ungkup kita ngagai bansa bukai. 

    Beberekat amat meh kitai orang Israel laban kitai nemu utai ti dikedeka Tuhan ti Allah Taala.

    Masmur Entara: Masmur 19: 7, 8, 9, 10

    Saut (peda John 6: 68C): TUHAN, Nuan ngembuan jaku ti meri pengidup ti meruan belama iya.

    Ke Satu
    Adat TUHAN endang pemadu badas. 
    Iya meri pengering ti baru. 
    Pesan TUHAN endang tau dikarapka 
    meri penemu-dalam ngagai orang ke nadai penemu-dalam.

    SautTUHAN, Nuan ngembuan jaku ti meri pengidup ti meruan belama iya.

    Ke Dua
    Adat TUHAN endang ngena, lalu ngelantangka ati. 
    Pesan TUHAN endang terang lalu iya ngasuh orang meretika utai.

    SautTUHAN, Nuan ngembuan jaku ti meri pengidup ti meruan belama iya.

    Ke Tiga
    Bebasaka TUHAN nya utai ti manah, 
    lalu basa nya deka majak belama iya. 
    Atur ti diberi TUHAN endang lurus. 
    Atur nya endang nadai kala berat sepiak.

    SautTUHAN, Nuan ngembuan jaku ti meri pengidup ti meruan belama iya.

    Ke Empat
    Utai nya lebih agi dikinginka ari emas ti pemadu manah, 
    manis agi ari ai manyi ti pemadu tulin.

    SautTUHAN, Nuan ngembuan jaku ti meri pengidup ti meruan belama iya.

    Bacha Ke Tujuh: Esekiel 36: 16 - 28

    Ku TUHAN bejaku ngagai aku, “Anak mensia, lebuh orang Israel diau di menua sida empu, sida ngamahka menua nya ngena chara sida idup enggau ngereja utai. 

    Aku ngumbai ulah sida enda tuchi, baka pengamah indu ke datai kain.

    Aku nejuka sida ngasaika pengeringat Aku ketegal pengawa sida ke udah bebunuhka orang di menua tu, enggau ketegal engkeramba ti udah dikena sida ngamah menua tu.

    Aku ngukum sida ketegal jalai sida idup, enggau ulah sida, lalu Aku mambarka sida ngagai menua bukai.

    Enda milih kini ke tunga sida bejalai, sida mai pemalu ngagai nama Aku ti kudus, laban orang deka nyebut, ‘Tu bala nembiak TUHAN, tang sida dipejalka ninggalka menua diri.’

    Utai tu ngasuh ati Aku irauka nama Aku ti kudus, laban orang Israel udah mai pemalu ngagai nama Aku di sebarang endur sida bejalai.

    “Nya alai, beri pesan Aku TUHAN Allah Taala ngagai orang Israel: Utai ti deka dikereja Aku nya ukai ke penguntung kita orang Israel, tang ketegal nama Aku ti kudus, ti udah kamah laban kita di semua menua ti udah digagai kita.

    Lebuh Aku mandangka pengudus nama Aku ti besai, nama ti udah kamah laban kita di semua menua nya, nya baru sida deka nemu Aku endang TUHAN. 

    Aku TUHAN Allah Taala udah bejaku. 

    Aku deka ngena kita nunjukka pengudus Aku ngagai semua bansa.

    Aku deka ngambi kita ari semua bansa enggau menua, lalu mai kita pulai baru ngagai menua kita empu.

    Aku deka mechikka ai ti beresi ngagai kita, lalu nuchi kita ari semua engkeramba, enggau ari semua utai bukai ti udah ngamahka kita.

    Aku deka meri kita ati ti baru, enggau runding ti baru. 

    Aku deka muai ati kita ti kieh ti digaga ari batu, lalu meri kita ati ti ngasi.

    Aku deka nyimpan Roh Aku dalam kita, lalu Aku deka ngasuh kita nitihka Adat Aku, lalu bejimat ngasika semua pesan ti udah diberi Aku ngagai kita.

    Nya baru kita deka diau di menua ti udah diberi Aku ngagai aki ini kita. 

    Kita deka nyadi nembiak Aku, lalu Aku deka nyadi Allah Taala kita.

    Masmur Entara: Masmur 42: 2, 4; 43: 3, 4

    Saut (peda 42: 1): Baka rusa ti tetengukka ai sungai ti chelap, baka nya meh aku lelengauka Nuan, O Allah Taala aku.

    Ke Satu
    Aku aus ke Nuan, O Allah Taala ti idup. 
    Kemaya aku ulih besembah di mua Nuan?

    SautBaka rusa ti tetengukka ai sungai ti chelap, baka nya meh aku lelengauka Nuan, O Allah Taala aku.

    Ke Dua
    Ati aku balat tusah lebuh aku ngingatka utai ti udah, 
    lebuh aku bejalai enggau orang ngagai rumah Allah Taala 
    lalu nguluka sida lebuh sida bejalai, bala orang ke lantang ati, 
    ke belagu sereta manjung muji Allah Taala.

    SautBaka rusa ti tetengukka ai sungai ti chelap, baka nya meh aku lelengauka Nuan, O Allah Taala aku.

    Ke Tiga
    Asuh penampak enggau pemendar Nuan 
    nguluka aku lalu mai aku pulai baru ngagai Sion, bukit Nuan ti kudus, 
    enggau ngagai Rumah Sembiang Nuan, ti alai Nuan diau.

    SautBaka rusa ti tetengukka ai sungai ti chelap, baka nya meh aku lelengauka Nuan, O Allah Taala aku.

    Ke Empat
    Nya baru aku deka mansang ngagai alta Nuan, O Allah Taala, 
    ngagai Allah Taala ti penatai pengelantang ati aku. 
    Aku deka nebah belikan aku, lalu belagu muji Nuan, O Allah Taala, Allah Taala aku.

    SautBaka rusa ti tetengukka ai sungai ti chelap, baka nya meh aku lelengauka Nuan, O Allah Taala aku.

    Bacha ari Bup Sempekat Baru (Epistle): Rome 6: 3 - 11

    Menyadi:
    Kati kita enda nemu, semua kitai ke udah dibaptisa ke dalam Jesus Kristus, udah mega dibaptisa ke dalam pemati Iya?

    Nya alai, kitai udah dikuburka sama enggau Iya laban kitai udah dibaptisa ke dalam pemati Iya, ngambika baka Kristus ke diangkatka ari pemati ulih mulia Apai, baka nya mega kitai deka idup dalam pengidup ti baru.

    Laban enti kitai udah begempung enggau Iya dalam pemati Iya, kitai tetap mega deka begempung enggau Iya dalam pengangkat Iya ari mati.

    Kitai nemu, pendiau kitai ti lama udah diregang sama enggau Iya, ngambika tubuh ti bedosa dirusak, lalu kitai enda agi nyadi ulun dosa.

    Laban barang sapa mati, dilepaska ari dosa.

    Tang enti kitai udah mati enggau Kristus, kitai mega arapka diri deka idup enggau Iya.

    Kitai nemu, Kristus ke diangkatka ari mati, enda agi mati. 

    Pemati nadai agi kuasa atas Iya.

    Pemati ti ditatka Iya nya pemati ke dosa, sekali aja, tang pengidup ti diasaika Iya diatu nya pengidup Iya ke Allah Taala.

    Nya alai kita enda tau enda ngumbai diri mati ke dosa, lalu idup ke Allah Taala dalam Jesus Kristus.

    Masmur Entara: Masmur 118: 1 - 2, 16 - 17, 22 - 23

    Saut: Alleluia, alleluia, alleluia!

    Ke Satu
    Beri meh terima kasih ngagai TUHAN, laban Iya endang badas; 
    pengerindu Iya meruan belama iya.
    Awakka orang Israel nyebut, “Pengerindu Iya endang meruan belama iya.”

    SautAlleluia, alleluia, alleluia!

    Ke Dua
    Jari kanan TUHAN ti patut dipuji, jari kanan TUHAN udah menang!”
    Aku enda mati, tang deka idup lalu nusui pasal utai ti udah dikereja TUHAN.

    SautAlleluia, alleluia, alleluia!

    Ke Tiga
    Batu ti enda diguna tukang rumah udah nyadi batu ti pemadu beguna.
    Utai tu udah dikereja TUHAN; Utai nya manah gaya dipeda kitai!

    SautAlleluia, alleluia, alleluia!

    Bacha Injil: Luke 24: 1 - 12

    Tumu pagi hari Minggu, sida indu nya mansang ngagai kubur, mai rempah ti udah disediaka sida.

    Sida lalu nemu batu nya udah dibaringka ari mua kubur nya, tang lebuh sida tama ke dalam kubur nya, sida nadai nemu bangkai Tuhan Jesus dia.

    Lebuh sida agi beba ati berundingka nya, dua iku orang ke ngena gari ti beperenching, tekala nya bediri ngimbai sida.

    Sida lalu takut, lalu nyungkurka diri ke tanah, tang orang dua iku nya bejaku ngagai sida, “Nama kebuah kita begigaka orang ke idup ba bala orang ke mati? Iya nadai ditu tang udah angkat idup baru.

    Kingatka utai ti udah dipadahka Iya ngagai kita lebuh Iya agi di Galili, madahka Anak Mensia enda tau enda diserahka ngagai orang ke bedosa, lalu diregang, lalu ba hari ti ketiga, angkat idup baru.”

    Sida lalu ingatka jaku Iya, pulai ari kubur nya, lalu madahka semua utai nya ngagai murid ke sebelas iku, enggau ngagai semua sida ti bukai.

    Nyadi orang ke nusui pasal utai nya ngagai sida rasul nya Maria Magdalin enggau Joana, enggau Maria indai James enggau indu ke bukai ke sama enggau sida.

    Tang sida rasul ngumbai nya cherita ngapa, lalu sida enda arapka utai ti dipadahka sida indu nya.

    Tang Peter angkat lalu belanda ngagai kubur. 

    Iya engkenduk lalu nilik ke dalam, lalu tepedaka semina kain linin aja bisi dia. 

    Iya lalu pulai ke rumah, balat alit ati ke utai ti udah nyadi.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads