Header Ads

  • Baru Nyadi

    28 April 2019 - Hari Minggu Kedua Musim Paska

    Tang ku Thomas bejaku ngagai sida, “Enti aku enda meda abi paku lawang ba jari Iya, lalu ngachukka tunjuk aku ngagai abi paku lawang nya, lalu ngengkahka jari aku ba rusuk Iya, aku enggai arap.” - John 20: 19 - 31

    Bacha Ke Satu: Surat Pasal Kereja Rasul 5: 12 - 16

    Mayuh kereja ti nyelai enggau kereja ajih dikereja sida rasul ba bala orang mayuh. Lalu semua sida ke arap begempuru ba Serambi Solomon.

    Nadai orang bukai berani begulai enggau sida, tang orang balat muji sida.

    Tang taja pia, orang ke arapka Tuhan lebih agi majak nambah-menambah, orang ke lelaki enggau orang ke indu, datai ke orang nyau mai orang ke sakit ngagai jalai raya, lalu ngalika sida ba tilam tauka ba tikai, ngambika ayuk Peter ninggang sida lebuh iya mansa.

    Mayuh amat orang mega datai begempuru ari mayuh bengkah nengeri ti ngelingi Jerusalem, mai orang ke sakit enggau orang ke dikeduan roh ti kamah, lalu semua sida digeraika magang.

    Masmur Entara: Masmur 118: 2 - 4, 13 - 15AB, 22 - 24

    Saut (peda 1): Beri meh terima kasih ngagai TUHAN, laban Iya endang badas; pengerindu Iya meruan belama iya.

    Ke Satu
    Awakka orang Israel nyebut,
    “Pengerindu Iya endang meruan belama iya.”
    Awakka ruang bilik imam Aron nyebut,
    “Pengerindu Iya endang meruan belama iya.”
    Awakka semua orang ke nangika TUHAN nyebut,
    “Pengerindu Iya endang meruan belama iya.”

    SautBeri meh terima kasih ngagai TUHAN, laban Iya endang badas; pengerindu Iya meruan belama iya.

    Ke Dua
    Aku balat amat diserang sida lalu aku nyau deka alah
    tang TUHAN nulung aku.
    TUHAN nyadika pengering enggau lagu aku;
    Iya udah nyelamatka aku.
    Pendingka bala nembiak Allah Taala manjung gaga ati
    dalam langkau kain sida laban sida udah menang.

    SautBeri meh terima kasih ngagai TUHAN, laban Iya endang badas; pengerindu Iya meruan belama iya.

    Ke Tiga
    Batu ti enda diguna tukang rumah
    udah nyadi batu ti pemadu beguna.
    Utai tu udah dikereja TUHAN;
    Utai nya manah gaya dipeda kitai!
    Tu meh hari ti udah digaga TUHAN;
    aram kitai rami gaga lalu ngelantangka diri ba hari tu.

    SautBeri meh terima kasih ngagai TUHAN, laban Iya endang badas; pengerindu Iya meruan belama iya.

    Bacha Ke Dua: Pemandang 1: 9 - 11A, 12 - 13, 17 - 19

    Aku, John, menyadi kita, ke sama enggau kita natka pemerinsa, bempu Perintah, enggau ngembuan ati ti liat sereta tan, ti endang enggi kitai dalam Jesus, udah dibuai ngagai pulau Patmos ketegal jaku Allah Taala enggau ketegal saksi Jesus.

    Roh Kudus bekuasa ba aku lebuh Hari Tuhan, lalu aku ninga nyawa ti inggar bejaku ari belakang aku munyi terumpit.

    Ku iya, “Tuliska dalam siti bup utai ti dipeda nuan.”

    Aku lalu nguing deka meda orang ke bejaku ngagai aku, lalu lebuh aku nguing, aku tepedaka tujuh iti penuduk lampu ti digaga ari emas.

    Ba tengah-tengah penuduk lampu nya bisi utai ti baka anak mensia ke ngena baju ti panjai, lalu dada Iya dibelit siti selampai emas.

    Lebuh aku meda Iya, aku rebah di kaki Iya baka ke mati.

    Tang Iya ngengkahka jari kanan Iya ba aku, lalu bejaku, “Anang takut! Aku tu Pun enggau Pengujung, Iya ke idup! Aku udah mati, tang peda, Aku idup belama-lama iya, lalu Aku megai kunchi Pemati enggau Dunya pemati.

    Nya alai, tuliska utai ti dipeda nuan, utai ti diatu enggau utai ti deka nyadi udah bekau tu ila.

    Alleluia: (peda John 20: 29):

    Alleluia, alleluia.
    Nuan arap ka Aku, Thomas, laban nuan udah meda Aku, ku TUHAN;
    Beberekat meh orang ke arap, taja pen sida enda meda Aku.
    Alleluia.

    Bacha Injil: John 20: 19 - 31

    Lemai hari Minggu nya, lebuh pintu udah ditutup ba endur alai sida murid begempuru laban sida takutka orang Judah, Jesus datai, lalu bediri ba tengah-tengah sida, lalu bejaku ngagai sida, “Awakka pemaik meruan enggau kita.”

    Lebuh Iya udah nyebut nya, Iya mandangka jari enggau rusuk Iya ngagai sida. Sida murid lalu gaga ati meda Tuhan.

    Jesus lalu bejaku baru ngagai sida, “Awakka pemaik meruan enggau kita.

    Baka Apai ke udah ngirumka Aku, baka nya mega Aku ngirumka kita.”

    Lebuh Iya udah nyebut nya, Iya ngesuhka seput ngagai sida, lalu bejaku enggau sida “Terima meh Roh Kudus.

    Enti kita ngampun dosa orang, orang nya diampun ari dosa sida. Enti kita enda ngampun dosa orang, sida enda diampun.”

    Tang Thomas (ke dikumbai Besapit), siku ari sida ke dua belas, nadai enggau sida lebuh Jesus datai.

    Nya alai sida murid ti bukai madah ngagai iya, “Kami udah meda Tuhan!”

    Tang ku Thomas bejaku ngagai sida, “Enti aku enda meda abi paku lawang ba jari Iya, lalu ngachukka tunjuk aku ngagai abi paku lawang nya, lalu ngengkahka jari aku ba rusuk Iya, aku enggai arap.”

    Seminggu udah bekau nya, sida murid Iya begempuru baru ba rumah nya, lalu Thomas bisi enggau sida.

    Taja pen pintu udah ditutup, tang Jesus datai lalu bediri ba tengah-tengah sida, lalu bejaku, “Awakka pemaik meruan enggau kita.”

    Iya lalu bejaku ngagai Thomas, “Engkahka tunjuk nuan ditu, lalu peda jari Aku. Unjur lalu engkahka jari nuan ba rusuk Aku. Anang kakang ati, tang arap!”

    Thomas lalu nyaut Iya, “Tuhan aku, Allah Taala aku!”

    Jesus lalu nyebut ngagai iya, “Kati nuan arap laban nuan udah meda Aku? Beberekat meh orang ke arap, taja pen sida enda meda Aku!”

    Jesus ngereja mayuh kereja ajih ti bukai di mua sida murid Iya, ti enda dituliska dalam bup tu.

    Tang utai tu ditulis ngambika kita arapka nya Kristus, Anak Allah Taala, lalu ulih pengarap kita ke Iya, kita tau bulih pengidup dalam nama Iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads