Header Ads

  • Baru Nyadi

    5 April 2019 - Hari Lima ba Minggu Ke-Empat Musim Lent

    Jesus lalu bejaku enggau nyawa ti inggar lebuh Iya ngajar dalam Rumah Sembiang, “Kita ngelala Aku, lalu kita nemu ari ni penatai Aku. - John 7: 1 - 2, 10, 25 - 30

    Bacha Ke Satu: Penemu Dalam Solomon 2: 1A, 12 - 22

    Orang ke jai endang salah lebuh sida bejaku kediri empu munyi tu, “Orang ke lurus sigi nadai guna, semina ngachau aja. Aram kitai ngiga peluang munaska sida. 

    Sida ngelaban utai ti dikereja kitai; sida ngumbai kitai ngelaban Adat Moses lalu enda nitihka ajar aki ini kitai. 

    Sida ngumbai diri nemu Allah Taala, lalu ngaku diri nembiak Tuhan. 

    Kitai enggai meda orang baka nya; sida jauh enda sepenemu enggau kitai. Sida enda baka orang bukai; jalai sida jauh nyelai. 

    Sida ngumbai pengawa kitai salah, nya alai sida ngerarika diri ari pengawa kitai. 

    Sida begah-begah ngumbai Allah Taala nya Apai sida, lalu sida arap dudi ila semina orang ke lurus aja deka lantang, lebuh semua utai tembu disebut enggau dikereja. 

    Ila meh kitai meda enti utai nya amat! Ila kitai meda nama utai nyadi ba sida maya sida parai! Enti sida ke lurus nya endang amat anak Allah Taala, tentu Iya deka ngidupka sida ari munsuh. 

    Aram kitai nguji sida. Kitai deka kasar enggau sida, lalu merinsa sida. 

    Udah nya baru kitai nemu baka ni pengetan enggau penyabar ati sida! Kitai deka meda naka ni sida ulih tan ati! Ila kitai ngerusak sida enggau pemati ti ngasuh sida malu. 

    Nama tusah, laban ku sida Allah Taala deka ngelindung sida.”

    Baka nya meh runding orang ke jai, tang sida iya salah. 

    Sida nyau buta laban penyai sida empu. 

    Sida nadai kala nemu utai ti dipelalaika Allah Taala; sida nadai kala andalka diri tau bulih upah ari pengidup ti kudus sereta lurus.

    Masmur Entara: Masmur 34: 16 - 17, 18 - 19, 20 & 22

    Saut (18a): TUHAN diau semak orang ke tusah ati.

    Ke Satu
    Tang Iya ngelaban orang ke ngereja penyai, 
    ngambika lebuh sida mati, sida enda dikingatka agi.
    Orang ke lurus ngangauka TUHAN, lalu TUHAN ninga, 
    lalu Iya ngelepaska sida ari semua penusah sida.

    SautTUHAN diau semak orang ke tusah ati.

    Ke Dua
    TUHAN diau semak orang ke tusah ati 
    lalu ngidupka sida ke nadai agi pengadang.
    Orang ke badas natka mayuh macham penusah, 
    tang TUHAN ngelepaska sida ari semua penusah nya.

    SautTUHAN diau semak orang ke tusah ati.

    Ke Tiga
    TUHAN nyaga sida. 
    Siti pen nadai meh tulang sida patah.
    TUHAN deka nebus bala nembiak Iya. 
    Nadai siku orang ke ngenduh ngagai TUHAN deka diukum.

    SautTUHAN diau semak orang ke tusah ati.

    Aklamasi sebedau Injil (peda Matthew 4: 4B):

    Mensia enda ulih idup makai roti aja, 
    tang beridup ba genap leka jaku ti pansut ari mulut Allah Taala.

    Bacha Injil: John 7: 1 - 2, 10, 25 - 30

    Udah bekau nya Jesus bejalai ba sebelah menua Galili. 

    Iya enggai bejalai di menua Judea, laban bala tuai orang Judah dia ngiga peluang deka munuh Iya.

    Gawai Belangkau nyau deka nyadi.

    Tang lebuh sida menyadi lelaki Iya udah mupuk ngagai gawai nya, nya baru Iya Empu mupuk, ukai ngayanka Diri, tang belalai.

    Sekeda orang Jerusalem bejaku, “Ukai enda Iya tu orang ke deka dibunuh sida?

    Lalu Iya bisi ditu, bejaku di mua orang mayuh, tang sida nadai nyebut utai ngagai Iya! Kada enda bala tuai nemu Iya endang Kristus.

    Tang kitai nemu ari ni penatai Iya; tang lebuh Kristus datai, nadai orang nemu ari ni penatai Iya.”

    Jesus lalu bejaku enggau nyawa ti inggar lebuh Iya ngajar dalam Rumah Sembiang, “Kita ngelala Aku, lalu kita nemu ari ni penatai Aku.

    Aku ukai datai ari peneka Aku Empu, tang Iya ke ngirumka Aku endang tau dikarapka, lalu kita enda ngelala Iya.

    Aku ngelala Iya, laban Aku datai ari Iya, lalu Iya udah ngirumka Aku.”

    Sida lalu nguji nangkap Iya, tang nadai siku sida terengkah jari ba Iya, laban maya Iya apin datai.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads