Header Ads

  • Baru Nyadi

    7 April 2019 - Hari Minggu Ke Lima Musim Lent

    Orang ke mati nya lalu pansut. Kaki jari iya ditanchang ngena urik kain, lalu mua iya dibalut ngena kain. Jesus lalu bejaku ngagai sida, “Buka kain nya ari iya, ngambika iya ulih bejalai.” - John 11: 1 - 45

    Bacha Ke Satu: Isaiah 43: 16 - 21

    Dulu kelia TUHAN ngaga jalai raya nengah tasik, jalai nengah ai ti bebuli.

    Iya ngerusak bala soldadu ti kering, bala soldadu ke nepan kerita perang enggau kuda. Sida rebah, lalu enda angkat agi, dipadamka baka api kelita!

    Tang ku TUHAN bejaku, “Anang ingatka utai ti udah nyadi menya tauka berundingka utai ti udah nyadi dulu kelia.

    Peratika utai ti baru, ti deka dikereja Aku. 

    Utai nya benung nyadi, lalu kita ulih meda utai nya diatu! Aku deka ngaga jalai raya nengah menua puang lalu meri kita ai sungai di menua puang nya.

    Indah jelu babas deh deka ngemesaika Aku. Jelu pasun enggau burung unta deka muji Aku lebuh Aku deka ngasuh sungai rarat di menua puang kena meri ai ngagai bala nembiak ke dipilih Aku.

    Sida nya orang ke ditempa Aku ke Aku Empu, lalu sida deka belagu muji Aku!”

    Masmur Entara: Masmur 126: 1 - 2A, 2B - 3, 4 - 5, 6

    Saut (3): TUHAN endang udah ngereja utai ti besai ke kitai. Nya kebuah kitai gaga!

    Ke Satu
    Lebuh TUHAN mai kitai pulai baru ngagai Jerusalem, 
    utai nya asai ti diambi mimpi!
    Bebendar amat kitai ketawa, 
    bebendar amat kita manjung gaga ati!

    SautTUHAN endang udah ngereja utai ti besai ke kitai. Nya kebuah kitai gaga!

    Ke Dua
    Udah nya bansa bukai lalu bejaku, 
    “TUHAN udah ngereja utai ti besai ke sida.”
    TUHAN endang udah ngereja utai ti besai ke kitai. 
    Nya kebuah kitai gaga!

    SautTUHAN endang udah ngereja utai ti besai ke kitai. Nya kebuah kitai gaga!

    Ke Tiga
    TUHAN, asuh kami nyadi kaya-raja baru, O TUHAN, 
    baka sungai ti rangkai nyau penuh laban ai baru lebuh musin pengujan.
    Awakka orang ke nyabak lebuh sida nanam utai 
    manjung gaga ati lebuh sida ngetau!

    SautTUHAN endang udah ngereja utai ti besai ke kitai. Nya kebuah kitai gaga!

    Ke Empat
    Orang ke nyabak lebuh sida mai benih 
    deka manjung gaga ati lebuh sida pulai ke rumah 
    mai utai ti diketau sida.

    SautTUHAN endang udah ngereja utai ti besai ke kitai. Nya kebuah kitai gaga!

    Bacha Ke Dua: Pilipi 3: 8 - 14

    Menyadi:

    Lebih agi ari nya, aku ngira semua utai pengerugi magang enti dibandingka enggau utai ti lebih agi beguna, iya nya nemu Jesus Kristus Tuhan aku. 

    Ketegal Iya, aku udah muai semua utai, lalu ngira semua utai nya uras magang, ngambika aku tau bempu Kristus, lalu diau dalam Iya, ukai ngembuan pengelurus ke aku empu ti datai ari Adat, tang pengelurus ti datai ulih pengarap ke Kristus, pengelurus ti datai ari Allah Taala, ti beduduk ba pengarap.

    Aku ingin deka nemu Kristus, sereta nemu kuasa pengangkat Iya ari mati, lalu sama enggau Iya ngasaika pemerinsa Iya, lalu nyadi sebaka enggau Iya dalam pemati Iya,
    ngambika, enti ulih, aku diangkatka idup baru ari mati.

    Ukai reti nya aku udah bulih semua utai nya, tauka udah datai ba adan. 

    Tang aku majak bebendar ngulihka prais nya, laban Kristus udah bempu aku.

    Menyadi, aku ukai ngumbai diri udah bulih prais nya. Utai ti dikereja aku nya, aku badu agi ngingatka utai ti udah, lalu bebendar ngulihka utai ti di mua.

    Aku majak belanda terus ngagai adan, ngulihka prais, iya nya kangau Allah Taala, ulih Jesus Kristus, ke mai aku ke serega.

    Aklamasi sebedau Injil (peda Joel 2: 12 - 13):

    Tang taja pia, ku TUHAN bejaku, 
    pulai baru meh kita diatu ngagai Aku enggau pengabis ati kita;
    laban Aku nelap sereta penuh pengasih.

    Bacha Injil: John 8: 1 - 11

    Jesus lalu mupuk ngagai Bukit Kana.

    Tumu pagi hari siti, Iya datai baru ba Rumah Sembiang. 

    Semua orang datai ngagai Iya. Iya lalu duduk, lalu belabuh ngajar sida.

    Sida pengajar Adat, enggau sida orang Parisi lalu mai siku indu ke udah ditangkap butang, lalu ngasuh indu nya bediri di mua semua sida, lalu bejaku ngagai Jesus, 
    “Pengajar, indu tu udah ditangkap butang.

    Nyadi dalam Adat, Moses ngasuh kitai nuku orang ke baka tu ngena batu. Baka ni ku penemu Nuan?”

    Sida nyebut nya kena sida nguji Iya, ngambika sida ulih bedawaka Iya. 

    Jesus meremi, lalu nulis ba tanah ngena tunjuk Iya.

    Ninga sida ituk nanya Iya, Iya bediri lalu bejaku ngagai sida, “Awakka orang ke enda kala bedosa ari bala kita, dulu nuku  iya ngena batu.”

    Iya lalu meremi baru, lalu nulis ba tanah ngena tunjuk Iya.

    Lebuh sida ninga nya, siku-siku sida lalu mupuk ari endur nya, berengkah ari sida ke tuai. 

    Semina Jesus aja agi tinggal, enggau indu ke bediri di mua Iya.

    Jesus bediri lalu bejaku enggau indu nya, “Indu, ni bala sida nya tadi? Kati orang nadai udah ngukum nuan?”

    Indu nya lalu nyaut, “Nadai, Tuhan.”  

    Lalu ku Jesus bejaku, “Aku pen enda meh ngukum nuan. Mupuk meh nuan, tang anang agi bedosa.”

    Bacha Ari Taun A mega tau dikena: 

    Bacha Ke Satu: Esekiel 37: 12 - 14

    Ku TUHAN Allah Taala bejaku:

    Nya alai benabi nuan ngagai nembiak Aku Israel, lalu padahka ngagai sida, Aku TUHAN Allah Taala deka muka kubur sida. 

    Aku deka ngambi sida pansut, lalu mai sida pulai baru ngagai menua Israel.

    Lebuh Aku muka kubur alai bala nembiak Aku udah dikuburka, lalu mai sida pansut, nya baru sida deka nemu Aku endang TUHAN.

    Aku deka ngesuhka seput Aku ke dalam sida, ngambika sida idup baru, lalu nejuka sida diau di menua sida empu. 

    Nya baru sida deka nemu Aku endang TUHAN. 

    Aku udah besemaya deka ngereja utai tu, lalu Aku endang deka ngereja iya. Aku ti TUHAN udah bejaku.”

    Masmur Entara: Masmur 130: 1 - 2, 3 - 4, 5 - 6, 7 - 8

    Saut (peda 7): Ba TUHAN, pengasih Iya endang meruan belama iya lalu Iya seruran nebus.

    Ke Satu
    Aku ngangauka Nuan, O TUHAN, 
    laban aku balat tusah.
    Dingaka sabak aku, O TUHAN. 
    Pendingka kangau aku ke minta tulung!

    SautBa TUHAN, pengasih Iya endang meruan belama iya lalu Iya seruran nebus.

    Ke Dua
    Enti Nuan, O TUHAN nuliska dosa kami, sapa tan?
    Tang Nuan ngampun, 
    ngambika kami nangika Nuan.

    SautBa TUHAN, pengasih Iya endang meruan belama iya lalu Iya seruran nebus.

    Ke Tiga
    Aku nganti tulung ari TUHAN, 
    lalu aku manggaika pengadang aku ba semaya Iya.
    Aku nganti TUHAN lebih ari jejaga ke nganti hari tawas, 
    lebih ari jejaga ke nganti hari tawas.

    SautBa TUHAN, pengasih Iya endang meruan belama iya lalu Iya seruran nebus.

    Ke Empat
    Israel, panggaika pengadang kita ba TUHAN, 
    laban pengerindu Iya endang meruan belama iya lalu Iya seruran nebus.
    Lalu Iya deka nebus Israel 
    ari semua penyai sida.

    SautBa TUHAN, pengasih Iya endang meruan belama iya lalu Iya seruran nebus.

    Bacha Ke Dua: Rome 8: 8 - 11

    Menyadi:

    Lalu orang ke nurutka peneka mensia, enda ulih ngerinduka ati Allah Taala.

    Tang kita ukai idup nitihka peneka mensia. Kita idup nitihka peneka Roh, laban Roh Allah Taala diau dalam kita. Barang sapa nadai Roh Kristus, ukai nembiak Kristus.

    Tang enti Kristus diau dalam kita, taja pen tubuh kita mati laban dosa, Roh Allah Taala meri kita pengidup laban pengelurus.

    Enti Roh Iya ke udah ngangkatka Jesus ari mati, diau dalam kita, Iya ke udah ngangkatka Kristus ari mati, deka mega meri pengidup ngagai tubuh kita ti nemu mati, ulih Roh Iya ke diau dalam kita.

    Aklamasi sebedau Injil (peda John 11: 25A):

    Aku tu meh pengangkat enggau pengidup, ku TUHAN;
    orang ke arapka Aku, deka idup taja pen sida mati.

    Bacha Injil: John 11: 1 - 45

    Siku orang ke benama Lasarus sakit di Betani, genturung pendiau ti alai Maria enggau menyadi indu iya Marta diau.

    (Maria nya meh indu ke udah nata Tuhan ngena minyak wangi lalu ngendas kaki Tuhan ngena buk iya. Menyadi lelaki iya ke benama Lasarus sakit.)

    Nya alai Maria seduai Marta mesanka Jesus. 

    Ku seduai iya, “Tuhan, iya ke dikesayauka Nuan, sakit.”

    Tang lebuh Jesus nerima pesan nya, Iya bejaku, “Penyakit tu enda ngujung ngagai pemati. Utai tu nyadi kena ngemuliaka Allah Taala, ngambika Anak Allah Taala dimuliaka ulih nya.”

    Nya alai, taja pen Jesus rinduka Marta, Maria enggau Lasarus, lebuh Iya ninga Lasarus sakit, Iya mengkang diau dua hari da agi ba endur ti alai Iya diau.

    Udah lepas nya Iya lalu bejaku ngagai sida murid, “Aram kitai pulai baru ngagai Judea.”

    Ku sida murid bejaku enggau Iya, “Pengajar, baru apin lama tu ti udah orang Judah deka nuku Nuan ngena batu, lalu Nuan deka kin ke baru?”

    Disaut Jesus, “Kitai semina bisi dua belas jam aja hari siang, ukai enda? Orang ke bejalai lebuh siang hari, enda tesangkut, laban sida meda penampak dunya tu.

    Tang orang ke bejalai lebuh malam hari tesangkut, laban penampak nadai dalam sida.”

    Lebuh Iya udah nyebut nya Iya lalu madah ngagai sida, “Pangan kitai Lasarus udah tinduk, tang Aku deka kin lalu ngerak iya.”

    Ku sida murid bejaku ngagai Iya, “Tuhan, enti iya tinduk, iya deka gerai.”

    Tang Jesus bejakuka pasal pemati Lasarus, tang sida ngumbai Iya madahka Lasarus tinduk.

    Jesus lalu bejaku enggau terang ngagai sida, “Lasarus udah mati. Aku gaga ke Diri nadai dia enggau iya, ngambika kita arap, ke penguntung kita. Tang aram kitai mupuk ngagai iya.”

    Thomas, ke digelar Besapit,lalu bejaku ngagai murid ti bukai, “Aram kitai mupuk, ngambika kitai mati sama enggau iya.”

    Lebuh Jesus datai, Iya nemu Lasarus empat hari udah dikuburka.

    Nyadi Betani nya kira tiga kilometer ari Jerusalem, lalu mayuh orang Judah udah nemuai ngagai Marta seduai Maria, deka merindang seduai iya ketegal pemati menyadi lelaki seduai iya.

    Lebuh Marta ninga Jesus baru deka datai, iya lalu ngambat Jesus, tang Maria tinggal di rumah.

    Marta lalu bejaku ngagai Jesus, “Tuhan, enti Nuan bisi ditu lebuh maya nya, menyadi aku tentu enda mati! Tang indah diatu deh aku nemu Allah Taala deka meri Nuan sebarang utai ti dipinta Nuan ari Iya.”

    Jesus lalu bejaku ngagai iya, “Menyadi nuan deka angkat idup baru.”

    Ku Marta bejaku ngagai Iya, “Aku nemu iya deka angkat idup baru lebuh pengangkat orang ari mati ba pengujung dunya.”

    Jesus lalu bejaku ngagai iya, “Aku tu meh pengangkat enggau pengidup. Orang ke arapka Aku, deka idup taja pen sida mati, lalu semua orang ke idup lalu arapka Aku, enda mati. Kati nuan arapka nya?”

    Maria lalu nyaut Iya, “Aku arap, Tuhan! Aku arapka Nuan tu Kristus, Anak Allah Taala, ke datai ngagai dunya.”

    Lebuh Marta udah nyebut nya, iya pulai ke rumah, lalu betelai enggau menyadi iya Maria. Ku iya, “Pengajar bisi ditu, lalu Iya ngangauka nuan.”

    Lebuh Maria ninga nya, iya lalu beguai-guai angkat lalu mansang ngagai Jesus.

    Nyadi lebuh maya nya Jesus apin datai ba genturung pendiau nya, tang agi ba endur alai Marta ke betemu enggau Iya.

    Lebuh orang Judah ke merindang Maria di rumah meda iya beguai-guai angkat lalu pansut, sida lalu nitihka iya, laban sida ngumbai iya deka mansang ngagai kubur lalu nyabak dia.

    Lebuh Maria datai ba endur alai Jesus, lalu meda Iya, iya lalu nyungkurka diri di kaki Jesus, lalu bejaku ngagai Iya, “Tuhan, enti Nuan bisi ditu lebuh maya nya, menyadi aku tentu enda mati!”

    Lebuh Jesus meda Maria nyabak, lalu meda orang Judah ke enggau iya mega nyabak, ati Iya balat sinu sereta tusah.

    Lalu ku Iya nanya sida, “Dini alai kita nguburka iya?” Sida lalu nyaut Iya, “Tuhan, aram kitai meda.”

    Jesus nyabak.

    Orang Judah lalu bejaku, “Peda pemalat Iya rinduka iya!”

    Tang ku sekeda bala sida bejaku, “Kati Iya ke ulih ngeraika orang ke buta, enda ulih nagang orang tu mati?”

    Jesus balat amat sinu ati baru, lalu datai ba kubur. Nyadi kubur nya lubang gua, ti ditutup ngena sigi batu.

    Jesus lalu bejaku, “Baringka batu nya ke tisi!” Marta, menyadi orang ke mati nya, lalu bejaku, “Tuhan, iya tentu udah bau but, laban iya empat hari udah mati!”

    Jesus lalu bejaku ngagai Marta, “Kati Aku nadai udah madah ngagai nuan, enti nuan arap, nuan deka meda mulia Allah Taala?”

    Nya alai sida lalu maringka batu nya ke tisi. Jesus engkadah lalu bejaku, “Apai, Aku meri terima kasih ngagai Nuan, laban Nuan udah ninga Aku.

    Aku nemu Nuan endang seruran ninga Aku, tang Aku udah nyebut tu ke penguntung sida ke bediri ditu, ngambika sida nemu arapka Nuan udah ngirumka Aku.”

    Lebuh Iya udah nyebut nya, Iya lalu ngangau enggau nyawa ti inggar, “Lasarus, pansut nuan!”

    Orang ke mati nya lalu pansut. Kaki jari iya ditanchang ngena urik kain, lalu mua iya dibalut ngena kain. Jesus lalu bejaku ngagai sida, “Buka kain nya ari iya, ngambika iya ulih bejalai.”

    Naya alai, mayuh orang Judah ke udah datai enggau Maria, lalu udah meda utai ti dikereja Jesus, arapka Iya.

    Tauka: John 11: 3 - 7, 17, 20 - 27, 33B - 45

    Nya alai Maria seduai Marta mesanka Jesus. Ku seduai iya, “Tuhan, iya ke dikesayauka Nuan, sakit.”

    Tang lebuh Jesus nerima pesan nya, Iya bejaku, “Penyakit tu enda ngujung ngagai pemati. Utai tu nyadi kena ngemuliaka Allah Taala, ngambika Anak Allah Taala dimuliaka ulih nya.”

    Nya alai, taja pen Jesus rinduka Marta, Maria enggau Lasarus, lebuh Iya ninga Lasarus sakit, Iya mengkang diau dua hari da agi ba endur ti alai Iya diau.

    Udah lepas nya Iya lalu bejaku ngagai sida murid, “Aram kitai pulai baru ngagai Judea.”

    Lebuh Jesus datai, Iya nemu Lasarus empat hari udah dikuburka.

    Lebuh Marta ninga Jesus baru deka datai, iya lalu ngambat Jesus, tang Maria tinggal di rumah.

    Marta lalu bejaku ngagai Jesus, “Tuhan, enti Nuan bisi ditu lebuh maya nya, menyadi aku tentu enda mati!

    Tang indah diatu deh aku nemu Allah Taala deka meri Nuan sebarang utai ti dipinta Nuan ari Iya.”

    Jesus lalu bejaku ngagai iya, “Menyadi nuan deka angkat idup baru.”

    Ku Marta bejaku ngagai Iya, “Aku nemu iya deka angkat idup baru lebuh pengangkat orang ari mati ba pengujung dunya.”

    Jesus lalu bejaku ngagai iya, “Aku tu meh pengangkat enggau pengidup. Orang ke arapka Aku, deka idup taja pen sida mati, lalu semua orang ke idup lalu arapka Aku, enda mati. Kati nuan arapka nya?”

    Maria lalu nyaut Iya, “Aku arap, Tuhan! Aku arapka Nuan tu Kristus, Anak Allah Taala, ke datai ngagai dunya.”

    Ati Iya balat sinu sereta tusah.

    Lalu ku Iya nanya sida, “Dini alai kita nguburka iya?” Sida lalu nyaut Iya, “Tuhan, aram kitai meda.”

    Jesus nyabak.

    Orang Judah lalu bejaku, “Peda pemalat Iya rinduka iya!”

    Tang ku sekeda bala sida bejaku, “Kati Iya ke ulih ngeraika orang ke buta, enda ulih nagang orang tu mati?”

    Jesus balat amat sinu ati baru, lalu datai ba kubur. Nyadi kubur nya lubang gua, ti ditutup ngena sigi batu.

    Jesus lalu bejaku, “Baringka batu nya ke tisi!” Marta, menyadi orang ke mati nya, lalu bejaku, “Tuhan, iya tentu udah bau but, laban iya empat hari udah mati!”

    Jesus lalu bejaku ngagai Marta, “Kati Aku nadai udah madah ngagai nuan, enti nuan arap, nuan deka meda mulia Allah Taala?”

    Nya alai sida lalu maringka batu nya ke tisi. Jesus engkadah lalu bejaku, “Apai, Aku meri terima kasih ngagai Nuan, laban Nuan udah ninga Aku.

    Aku nemu Nuan endang seruran ninga Aku, tang Aku udah nyebut tu ke penguntung sida ke bediri ditu, ngambika sida nemu arapka Nuan udah ngirumka Aku.”

    Lebuh Iya udah nyebut nya, Iya lalu ngangau enggau nyawa ti inggar, “Lasarus, pansut nuan!”

    Orang ke mati nya lalu pansut. Kaki jari iya ditanchang ngena urik kain, lalu mua iya dibalut ngena kain. Jesus lalu bejaku ngagai sida, “Buka kain nya ari iya, ngambika iya ulih bejalai.”

    Naya alai, mayuh orang Judah ke udah datai enggau Maria, lalu udah meda utai ti dikereja Jesus, arapka Iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads