Siku indu ditangkap polis, nyamah anak iru di Kampung Bogag
Cari Berita

Advertisement

Siku indu ditangkap polis, nyamah anak iru di Kampung Bogag

Staf @beritaibanMY
April 18, 2019

Gambar pengias

BAU: Siku indu ditangkap polis pengudah dipechayaka nyamah anak iru iya ti beumur tujuh taun di Kampung Bogag, ditu, kemari.

Ketuai Polis Pampang Bau, DSP Poge Nyaon, madahka sida iya bisi nerima ripot ari siku lutur ti bisi datai ke sekula anak mit nya (mansa) laban deka meri jik muai kuman (vaksin) enggau meda bisi abi telih ba tubuh anak mit nya.

"Lebuh lutur nya deka meresa enggau ngejik vaksin ba anak mit nya (mansa), lutur nya bisi tepedaka bisi abi baru enggau abi lama ba beberapa iti endur ba tubuh anak mit nya.

"Asil peresa silik, bisi mega abi telih ba jari enggau kaki anak mit nya. Sebedau lutur nya ngeripotka pekara nya ngagai kepala pengajar sekula nya," ku iya lebuh ke dirandau pengarang berita, seharitu tadi.

Ku Poge, nangkan ke nya, lutur nya lalu madahka pekara ngagai bala pemesai enggau iya diasuh ngaga ripot polis ngambika ulih bejalaika pengawa silik agi.

"Berindik ari ripotka diterima, polis pengudah nangkap siku indu (saspek), 25 taun, ba rumah iya urung jam 4.50 lemai kemari laban deka bejalaika pengawa nasat.

"Asil pansik tumu, anak mit nya (mansa) diiru indu nya (saspek) enggau laki iya ba taun 2017 ari menyadi indu tuai saspek (kakak) ti udah sarak tauka nadai laki.

"Laki indu nya madahka bini iya (saspek) suah ngetil anak mit nya (mansa) lebuh ba rumah lebuh nganu enggau ngajar anak mit nya. Laki indu nya mega udah suah madahka bini iya nya ngambika enda kelalu kasar lebuh ngajar anak mit nya," ku iya.

"Anak mit nya udah dibaie ke Sepital Besai Sarawak (HUS) ngambika ulih diperubatka enggau silik agi.

Kes nya dipansik ari baruh Seksyen 31(1)(a) Akta Kanak-kanak 2001.