Siku lelaki diasuh nikal ke sepital baru, enda chukup duit kena nguburka anak iya
Cari Berita

Advertisement

Siku lelaki diasuh nikal ke sepital baru, enda chukup duit kena nguburka anak iya

Frankie John™
April 4, 2019

KASIH AMAT: Enda berasai neritik ai mata admin macha penusah ke ditapi lelaki tu. 😭

Semina ketegal enda chukup duit kena mayar ungkus nguburka anak iya ke dipinta orang ke ngintu bangkai ba sebuah surau, siku apai nyauka enda nyadi nguburka anak lelaki ti parai pengudah baru ada ba sepital, malam tadi.

Nangkan ke nya, lelaki ti kereja nyadi waiters ba kedai makai nya, mai bangkai anak iya ke sepital baru sebedau tusut runding berundingka bakani chara deka nguburka anak lelaki iya ti parai ada muda nya.

Tang puji Tuhan, lelaki nya benasit manah pengudah siku aktivis 'Amal Team', Mohd Zulhairi Zainol, 34 taun, tauka lebih tampak rita dikelala ngena nama Hery, nulung iya mutarka semua penusah ke ditapi iya, nyentuk ke mayar ungkus nguburka anak iya nya.

Ku Mohd Zulhairi, iya nulung lelaki nya pengudah nerima kanggau ari orang ke gawa ba sepital nya madahka sepasang laki bini enda chukup belanja deka mayar ungkus nguburka anak seduai iya.

"Lelaki nya madahka diri semina bisi RM150 kena nguburka anak iya pengudah bala pemesai ba surau nya minta bayar RM300," ku iya lebuh ke dirandau pengarang berita, sehari tu tadi.

"Lebuh aku betemu enggau iya, lelaki nya dulu nanya aku berapa semua ungkus ke patut dibayar iya laban udah nulung mutarka penusah ke ditapi iya.

"Aku berasai sinu sebedau madahka iya enda enda ibuh dibayar laban aku nulung iya enggau ati ti chiru. 

"Lelaki nya nyabak lalu merap aku enggau jari sepiak ti megai bangkai anak iya," ku iya bekunsika cherita nya ba akaun Facebook iya, sehari tu tadi.

Mohd Zulhairi madah, iya pengudah nya mai lelaki nya enggau bangkai anak iya ke Tanah Kubur Sungai Tangkas di Bangi laban deka nguburka anak lelaki nya.

Ku iya, lebuh berandau enggau lelaki nya maya nguburka niang, lelaki nya madahka bala pemesai ba surau nya ngasuh iya ke sepital pengudah madahka duit iya enda chukup kena nguburka anak iya nya. 

"Aku berasai sinu amat pengudah ninga serabana iya nya.. Niang patut dikuburka dulu, ukai nagih duit dulu,” ku iya.

Ku Mohd Zulhairi, iya nerima ripot anak mit nya parai pengudah bini lelaki nya terap ba jamban enggau ngejungka bini iya balat bedarah (gugur).

"Semina RM60 aja ti dikena aku mayar semua ungkus nguburka niang.

"Chukup sinu ati aku, kitai sama bepengarap Islam, pengawa nguburka niang tu patut digaga dulu enggau sama besaup ngelempungka penusah tu," tandu iya.