Header Ads

  • Baru Nyadi

    Siku lelaki 'geganjang', terejun ke Sungai Kemena

    BA PALAN PENUSAH KE NYADI: Lelaki nya bejalai kaki enggau nada ngena gari (graphik segi empat kanan), sebedau iya terejun ke Sungai Kemena (graphik segala).

    BINTULU: Siku lelaki telanjai "geganjang" sebedau terejun ke Sungai Kemena, di Bintulu ngejungka orang mayuh di Taman Sri Dagang begau pengudah meda ulah ke digaga lelaki nya.

    Penusah nyadi urung jam 11 pagi kemari, lelaki nya dipechayaka bisi penanggul ba untak.

    Lelaki nya mega bisi dipeda bejalai kaki enggau nadai ngena gari (telanjai)  sebedau iya terejun ke sungai nya.

    Nitihka penerang ke diterima @beritaibanMY, peranak menua nya tegepang ati meda lelaki nya berani amat terejun ke sungai nya laban sungai nya dipechayaka salah siti ari ai sungai ti pemadu mayuh baya di Sarawak.

    Ketuai Balai Bomba enggau Penyelamat Bintulu, Mohamad Meramit, madahka sembilan raban bomba berumban ngesah ke palan penusah ke nyadi, pengudah nerima ripot bekaul enggau penusah ke nyadi ngambika ulih bejalaika Operasyen Ngiga enggau Nyelamat (SAR).

    “Lebuh datai ba palan penusah ke nyadi, ketuai operasyen ngeripotka siku lelaki nguji nyelam ke dalam sungai nya.

    “Raban bomba nguji nundukka lelaki nya lalu ngasuh iya nyemerai ke tebing sungai enggau pansut ari palan nya, tang enda dikeibuhka lelaki nya. Nangkan ke nya, seraban bomba terejun ke sungai nya mega laban deka nyelamatka lelaki nya nya ngena tali enggau jaket safety,” ku iya lebuh ke dirandau pengarang berita, sehari tu tadi.

    Ku iya, lelaki nya enda ngelingkang, lelaki nya nitihka jaku ari raban bomba ti nguji mai iya ke tebing sungai sebedau lelaki nya mujur pansut ari sungai nya urung jam  11.12 pagi.

    “Nasit manah nadai penusah ke enda disadang nyadi sepemanjai raban bomba bejalaika operasyen nya. Lelaki nya udah disuaka ngagai raban polis ngambika ulih bejalaika pengawa silik agi,” tandu iya.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads