Header Ads

  • Baru Nyadi

    Siku lelaki kena pantap ngena duku, 'selfie' ba kedai makai di Matang

    KASIH AMAT: Raban bomba benung ngubat mansa sebedau dianjung ke Sepital Besai Sarawak.

    KUCHING: Siku lelaki 'selfie' ba sebuah kedai makai kena pantap ngena duku pengudah dipechayaka ngambi siku lelaki (saspek) enggau nadai pemendar ba sebuah kedai makai di Matang, lemai tadi.

    Nitihka penerang ke diterima @beritaibanMY, penusah nyadi urung jam 5.30 lemai, lelaki ke kena pantap nya (mansa), 22 taun, orang ari Taman Kopodim, Matang, bakal ba jari enggau kaki.

    Ku penerang, penusah nyadi lebuh mansa enggau siku agi bakih indu iya ngirup lemai ba kedai nya sebedau seduai ngambi gambar segulai (selfie).

    Tang taja pia, siku lelaki (saspek) ke bisi ba kedai nya mega enda rindu meda ulah seduai iya nya (saspek) enggau nyangka seduai nguji ngambi gambar lelaki nya belalai.

    Saspek ti duduk ba belakang seduai iya pengudah nya ngelara mansa enggau nyangka mansa ngambi gambar iya enggau nadai minta pemendar ari saspek.

    Mansa madahka diri nadai ngambi gambar saspek enggau ngejung ke seduai iya belaya sebedau saspek pansut ari kedai nya.

    “Urung pengelama 15 minit pengudah nya, saspek mansang baru kia mai siku bakih iya. Enggau enda memukai saspek lalu mantap mansa ngena perengka tajam dipechayaka duku,” ku penerang.

    Saspek enggau bakih iya nya mega diripotka nguji naban ke talipaun binching mansa sebedau ngelarika kediri ari palan penusah ke nyadi.

    Mansa pengudah nya dibantu bakih enggau orang mayuh ke bisi ba palan penusah ke nyadi.

    Nangkan ke nya, raban EMRS, Bomba enggau Penyelamat datai ba palan penusah ke nyadi pengudah nerima kanggau ari orang mayuh enggau meri perubat tumu sebedau nganjung mansa ke sepital ngambika ulih diperubatka enggau silik agi.

    Naka kediatu, mansa agi diperubatka ba Unit Emergency ba Sepital Besai Sarawak.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads