Siku orang tuai parai, kena tagup baya di Batang Oya
Cari Berita

Advertisement

Siku orang tuai parai, kena tagup baya di Batang Oya

Chief Editor | Berita Iban MY
April 17, 2019

KASIH AMAT: Pendiau ba palan penusah ke nyadi.

MUKAH: Siku orang tuai parai pengudah dipechayaka kena tagup baya di Batang Oya, Kampung Bakong, ditu, lemai kemari (Hari Dua).

Orang tuai nya (mansa) dikelala ngena nama Seruji Salleh, 72 taun, dipechayaka nurun ke ai laban deka mandi urung jam 12.30 tengah hari pengudah tembu ngaga pengawa ba luar rumah ke diuan iya.

Nitihka penerang ke diterima @beritaibanMY, menyadi mansa pansut keluar ngiga iya (mansa) ba tebing sungai tang semina tetemuka baju enggau selipar orang tuai nyapengudah nemu orang tuai nya nadai pulai ke rumah urung jam 4 lemai.

Ketegal irauka utai ke enda disadang nyadi, menyadi orang tuai nya berumban nesau genturung pendiau ngambika ulih nulung ngiga orang tuai nya.

Ketuai Polis Pampang Dalat, DSP Roslan Leman, madahka bangkai orang tuai (mansa) nya ditemu genturung pendiau di sungai semak Kampung Terus Oya, urung jam 7.05 malam tadi.

"Lebuh bangkai orang tuai nya ditemu, kaki sepiak kanan iya nadai temu tauka udah lenyau.

"Asil pansik tumu ba palan penusah ke nyadi enggau penerang ari menyadi orang tuai nya, orang tuai nya nurun ke sungai laban deka mandi enggau dipechayaka kena tagup baya," ku iya.

Bangkai orang tuai nya dibaie ke Sepital Dalat ngambika ulih bejalaika pengawa silik agi.

Ba taun 2016, bisi mega kes orang tuai parai kena tagup baya enggau nyadi ba palan ke sama.