11 May 2019 - Hari Enam ba Minggu Ketiga Musim Paska
Cari Berita

Advertisement

11 May 2019 - Hari Enam ba Minggu Ketiga Musim Paska

Chief Editor | Berita Iban MY
May 11, 2019

Graphik: LDS Scripture Teachings

Bacha Ke Satu: Surat Pasal Kereja Rasul 9: 31 - 42

Nya alai raban eklisia di serata menua Judea, Galili, enggau Samaria nadai agi pengachau sereta mansang dalam pengarap. Sida nangika Tuhan lalu ulih saup Roh Kudus, raban sida majak nambah-menambah.

Nyadi lebuh Peter bejalai kia-kia ngagai semua orang ke arap, iya mega nemuai ngagai bala nembiak Tuhan ke diau di Lida.

Dia iya betemu enggau orang siku ke benama Anias, ke sakit bajung lapan belas taun, lalu nadai kala angkat ari peninduk iya.

Peter lalu bejaku ngagai iya, “Anias, Jesus Kristus ngeraika nuan.

Angkat nuan, lalu kemas peninduk nuan.” Tekala nya Anias lalu angkat.

Semua orang ke diau di Lida enggau di Saron bela meda Anias, lalu sida nguingka diri ngagai Tuhan.

Nyadi di Jopa bisi siku murid, ke benama Tabita. (Dalam jaku Gerika nama iya Dorkas, reti nya “Kijang.”)

Iya endang seruran ngereja utai ti manah, sereta nulung orang ke seranta.

Lebuh maya nya, iya sakit, lalu mati. Lebuh sida udah meri iya mandi, sida lalu ngalika iya di sadau.

Laban Lida enda jauh ari Jopa, sida murid di Joppa ke ninga Peter bisi di Lida lalu ngasuh dua iku orang mansang ngagai Peter, minta iya datai, “Datai enggau jampat ngagai kami.”

Peter angkat, lalu mupuk enggau seduai iya. Lebuh iya datai, sida lalu mai iya ke sadau.

Semua indu ke balu bediri ngimbai Peter, nyabak sereta mandangka semua baju enggau serayung ti udah digaga Dorkas lebuh iya agi begulai enggau sida.

Peter lalu ngasuh semua sida pansut. Udah nya iya besugang, lalu besampi. Iya lalu nguing nunga ngagai bangkai Dorkas, lalu bejaku, “Tabita, angkat nuan!” Tabita lalu menchelakka mata, tepedaka Peter, lalu duduk.

Peter lalu nyurungka jari ngagai iya, lalu nulung iya angkat.

Udah nya Peter lalu ngangauka bala nembiak Tuhan, enggau sida indu ke balu, lalu mandangka iya amat idup.

Berita pasal nya ngelekai di serata nengeri Jopa, lalu mayuh orang arapka Tuhan.

Masmur Entara: Masmur 116: 12 - 13, 14 - 15, 16 - 17

Saut (peda 12): Nama utai ti tau diberi aku ngagai TUHAN  kena malas semua pemanah Iya enggau aku?

Ke Satu
Nama utai ti tau diberi aku ngagai TUHAN 
kena malas semua pemanah Iya enggau aku?
Aku deka mai piring wain 
lalu ngangauka nama TUHAN.

SautNama utai ti tau diberi aku ngagai TUHAN  kena malas semua pemanah Iya enggau aku?

Ke Dua
Aku deka mayar semaya aku ngagai TUHAN
di mua semua bala nembiak Iya.
Naka meh penyayau TUHAN
ke nembiak Iya ke mati!

SautNama utai ti tau diberi aku ngagai TUHAN  kena malas semua pemanah Iya enggau aku?

Ke Tiga
O TUHAN, aku tu nembiak Nuan;
Aku tu nembiak Nuan; anak ulun Nuan.
Nuan udah muka tali ti dikena nanchang aku.
Aku deka meri ngagai Nuan piring terima kasih
lalu ngangauka nama TUHAN.

SautNama utai ti tau diberi aku ngagai TUHAN  kena malas semua pemanah Iya enggau aku?

Alleluia (peda John 6: 63C, 68C)

Alleluia, alleluia.
Jaku Nuan TUHAN nya Roh enggau pengidup.
Nuan ngembuan jaku ti meri pengidup ti meruan belama iya.
Alleluia.

Bacha Injil: John 6: 60 - 69

Lebuh mayuh ari bala sida murid Iya ninga nya, sida lalu bejaku, “Ajar tu kelalu mar. Sapa ulih nerima ajar tu?”

Tang Jesus nemu sida murid Iya mutapka ajar nya, lalu ku Iya bejaku ngagai sida, “Kati kita enda nyamai ati ninga jaku nya?

Enti pia, kati enti kita meda Anak Mensia niki ngagai endur Iya ti suba?

Roh aja ke meri pengidup; kuasa mensia enda ulih ngereja utai. Jaku ti udah disebut Aku ngagai kita, nya Roh enggau pengidup.

Tang sekeda kita enda arap.” Laban Jesus nemu kenyau ari pun, sapa ke enda arap, lalu sapa ke deka nyual Iya.

Lalu ku Iya bejaku, “Nya meh kebuah Aku udah madah ngagai kita, nadai orang ulih datai ngagai Aku, enti Apai enda ngeletak iya.”

Ketegal nya, mayuh murid Jesus ninggalka Iya, lalu enggai agi bejalai enggau Iya.

Nya alai Iya lalu bejaku ngagai sida ke dua belas, “Kati kita deka mega ninggalka Aku?”

Simon Peter lalu nyaut Iya, “Tuhan, sapa patut digagai kami? Nuan ngembuan jaku ti meri pengidup ti meruan belama iya.

Kami udah arap lalu nemu, Nuan tu meh Anak Allah Taala ti kudus.”