Header Ads

  • Baru Nyadi

    16 May 2019 - Hari Empat ba Minggu Ke-empat Musim Paska

    16 May 2019 - Hari Empat ba Minggu Ke-empat Musim Paska

    Bacha Ke Satu: Surat Pasal Kereja Rasul 13: 13 - 25

    Paul enggau orang ke bekaling enggau iya belayar ari Papos, lalu datai di Perga, di menua Pampilia. Tang John Mark ninggalka seduai iya, lalu pulai ngagai Jerusalem.

    Tang sida majakka pejalai ari Perga lalu datai di Antiok di menua Pisidia. Lalu lebuh hari Sabat, seduai iya tama ngagai balai gempuru, lalu duduk.

    Lebuh Bup Adat enggau bup sida nabi udah dibacha, bala pemesai balai gempuru lalu mesanka seduai iya, ku sida, “Menyadi, enti seduai bisi jaku peransang ke orang mayuh, kami minta seduai bejaku.”

    Paul lalu bediri, ngepaika jari lalu belabuh bejaku. “Kita orang Israel, enggau semua kita bukai ke nangika Allah Taala, pendingka aku!

    Allah Taala ke disembah orang Israel udah milih aki ini kitai, lalu ngaga sida nyadi bansa ti kering lebuh sida diau di menua Ejip, lalu ngena kuasa Iya ti besai, Iya maisida pansut ari menua nya.

    Lalu dalam kandang empat puluh taun Iya sabar enggau  sida di menua puang.

    Lalu lebuh Iya udah ngerusak tujuh bengkah bansa di menua Kanaan, Iya meri menua nya ngagai sida nyadika pesaka sida.

    Semua utai nya nyadi dalam pengelama empat ratus lima puluh taun.

    Udah nya Iya meri sida hakim nyentuk ngagai maya nabi Samuel.

    Udah nya sida minta siku raja, lalu Allah Taala meri sida Saul anak Kis, ari raban bansa Benjamin, lalu Saul merintah empat puluh taun.

    Lebuh Allah Taala udah muai Saul, Iya ngasuh David nyadi raja sida.

    Baka tu ku jaku ti disebut Allah Taala pasal David: ‘Aku nemu David anak Jesi tu orang ke ngerinduka ati Aku, ke deka ngereja semua utai ti dikedekaka Aku.’

    Ari peturun David Allah Taala udah mai ngagai orang Israel siku Juruselamat, iya nya Jesus, munyi ti udah disemaya Iya.

    Sebedau Jesus datai, John endang udah dulu madahka pasal baptisa nesal ati ngagai semua orang Israel.

    Lalu lebuh John nyau deka nembuka pengawa iya, iya bejaku, ‘Sapa aku tu ku kita? Aku tu ukai Iya. Ukai, tang siku orang deka datai dudi ari aku. Indah muka tali selipar ti ba kaki Iya deh aku enda tau.’

    Masmur Entara: Masmur 89: 1 - 2, 20 - 21, 24 & 26

    Saut (peda 2): O TUHAN, aku deka seruran belagu ngenang pengerindu Nuan ti meruan belama iya.

    Ke Satu
    O TUHAN, aku deka seruran belagu
    ngenang pengerindu Nuan ti meruan belama iya.
    Aku deka madahka penetap ati Nuan belama iya.
    Aku nemu pengerindu Nuan deka meruan belama iya,
    lalu penetap ati Nuan deka meruan baka langit.

    SautO TUHAN, aku deka seruran belagu ngenang pengerindu Nuan ti meruan belama iya.

    Ke Dua
    Aku udah nyiri nembiak Aku David nyadi raja
    lebuh Aku nata iya ngena minyak ti kudus.
    Pengering Aku deka seruran enggau iya.
    Kuasa Aku deka ngasuh iya kering.

    SautO TUHAN, aku deka seruran belagu ngenang pengerindu Nuan ti meruan belama iya.

    Ke Tiga
    Aku deka rinduka iya sereta tetap ati ngagai iya.
    Aku deka ngasuh iya seruran menang.
    Iya deka nyebut ngagai aku, ‘Nuan Apai enggau Allah Taala aku.
    Nuan Penyaga enggau Juruselamat aku.’

    SautO TUHAN, aku deka seruran belagu ngenang pengerindu Nuan ti meruan belama iya.

    Alleluia (peda Pemandang 1: 5AB)

    Alleluia, alleluia.
    Jesus Kristus, Saksi ke tetap ati,
    ke terubah diangkatka ari mati,
    Iya udah rinduka kitai, lalu udah ngelepaska kitai ari dosa, ulih darah Iya.
    Alleluia.

    Bacha Injil: John 13: 16 - 20

    Lebuh Jesus udah tembu masu kaki bala rasul Iya, Iya bejaku ngagai sida;

    “Enggau bendar Aku madah ngagai kita, ulun nadai kala besai agi ari tuan sida, lalu orang ke dikirumka nadai kala besai agi ari orang ke ngirumka sida.
    Enti kita nemu utai tu, kita bulih berekat enti kita ngereja sida.

    Aku ukai bejakuka pasal semua kita. Aku nemu sapa ke udah dipilih Aku.

    Tang tu kena ngamatka Bup Kudus, ‘Orang ke makai roti Aku, udah ngangkatka tumbit iya deka ngelaban Aku.’

    Aku madahka tu ngagai kita diatu, sebedau utai nya nyadi, ngambika, lebuh iya nyadi ila, kita deka arapka ‘Aku tu meh Iya.’

    Enggau bendar Aku madah ngagai kita: barang sapa nerima orang ke dikirumka Aku, nerima Aku, lalu barang sapa nerima Aku, nerima Iya ke ngirumka Aku.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads