Header Ads

  • Baru Nyadi

    17 May 2019 - Hari Lima ba Minggu Ke-empat Musim Paska

    17 May 2019 - Hari Lima ba Minggu Ke-empat Musim Paska

    Bacha Ke Satu: Surat Pasal Kereja Rasul 13: 26 - 33

    Lebuh Paul datai di Antiok di menua Pisidia, iya lalu bejaku dalam balai gempuru;

    “Menyadi, kita ke peturun Abraham, enggau semua kita bukai ke nangika Allah Taala, pesan pasal pengelepas tu udah dikirumka ngagai kitai.

    Laban orang ke diau di Jerusalem, enggau bala tuai sida enda ngelala Iya, tauka enda meretika jaku sida nabi ti dibacha tiap-tiap hari Sabat, sida ngamatka jaku sida nabi lebuh sida ngukum Iya.

    Taja pen sida nadai tetemuka kebuah nuduhka Iya diukum bunuh, tang sida minta Pilate ngasuh Iya dibunuh.

    Lebuh sida udah ngereja semua utai ti udah ditulis pasal Iya, sida nurunka Iya ari regang,  lalu ngalika Iya dalam kubur.

    Tang Allah Taala ngangkatka Iya ari mati, lalu Iya pegari berapa hari di mua orang ke udah bejalai enggau Iya ari Galili ngagai Jerusalem, lalu diatu sida nya nyadika saksi Iya ngagai orang Israel.

    Lalu kami madahka ngagai kita Berita Manah pasal utai ti udah disemaya Allah Taala ngagai aki ini kitai.

    Iya udah ngamatka semaya ke kitai ti peturun sida, lebuh Iya ngangkatka Jesus ari mati, munyi ti udah ditulis dalam masmur ti kedua,

    ‘Nuan tu Anak Aku. Sehari tu Aku udah nyadi Apai Nuan.’

    Masmur Entara: Masmur 2: 6 - 7, 8 - 9, 10 - 11AB

    Saut (7bc): Nuan tu anak Aku. Sehari tu Aku udah nyadi Apai nuan.

    Ke Satu
    “Aku udah nyiri raja Aku,
    ba bukit Aku ti kudus di Sion,” ku TUHAN bejaku.
    Ku raja nya bejaku, “Aku deka madahka adat ti udah diberi TUHAN.
    Ku TUHAN bejaku ngagai aku: ‘Nuan tu anak Aku.
    Sehari tu Aku udah nyadi Apai nuan.”

    SautNuan tu anak Aku. Sehari tu Aku udah nyadi Apai nuan.

    Ke Dua
    Pinta ari Aku, lalu Aku deka ngaga mayuh bengkah bansa
    nyadika pesaka nuan, lalu semua dunya deka diempu nuan.
    Nuan deka mechahka sida ngena tungkat besi,
    lalu ngeredakka sida baka ke ngeredakka periuk tanah.

    SautNuan tu anak Aku. Sehari tu Aku udah nyadi Apai nuan.

    Ke Tiga
    Nya alai diatu, O kita ke raja,
    kita enda tau enda pintar;
    Bejaga kita, O kita ke pemerintah dunya.
    Betuaika TUHAN enggau ati ti nangi.

    SautNuan tu anak Aku. Sehari tu Aku udah nyadi Apai nuan.

    Alleluia (John 14: 6)

    Alleluia, alleluia
    Aku tu meh jalai, pemendar, enggau pengidup, ku TUHAN.
    Nadai orang ulih datai ngagai Apai enti enda nengah Aku.
    Alleluia.

    Bacha Injil: John 14: 1 - 6

    Ku Jesus bejaku ngagai sida rasul Iya;

    “Anang tusah ati. Arapka Allah Taala, lalu arap mega ke Aku.

    Dalam rumah Apai Aku mayuh bilik. Enti iya enda baka nya, Aku enda madah ngagai kita Aku deka kin lalu nyendiaka endur ke kita.

    Lalu enti Aku mupuk lalu nyendiaka endur ke kita, Aku deka pulai kitu baru, lalu mai kita ngagai Aku Empu, ngambika dia endur alai Aku, dia mega endur alai kita.

    Kita nemu jalai ngagai endur ti deka digagai Aku.”

    Thomas lalu bejaku ngagai Iya, “Tuhan, kami enda nemu kini ke Nuan deka mupuk. Baka ni ku kami nemu jalai kin?”

    Jesus lalu bejaku ngagai iya, “Aku tu meh jalai, pemendar, enggau pengidup.

    Nadai orang ulih datai ngagai Apai enti enda nengah Aku.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads