Header Ads

  • Baru Nyadi

    29 April 2019 - Hari Satu ba Minggu Kedua Musim Paska

    Nyadi sekali siku orang Parisi, ke benama Nikodimus, ke ari raban tuai orang Judah, mansang ngagai Jesus lebuh malam hari, lalu bejaku enggau Iya, “Pengajar, kami nemu Nuan endang pengajar ke datai ari Allah Taala, laban nadai orang ulih ngereja kereja ajih baka ti dikereja Nuan, enti Allah Taala nadai enggau iya.” - John 3: 1 - 8

    Bacha Ke Satu: Surat Pasal Kereja Rasul 4: 23 - 31

    Lebuh Peter seduai John udah dilepaska, seduai iya lalu pulai ngagai raban sida empu, lalu madahka jaku ti udah disebut sida tuai imam, enggau bala tuai bansa, ngagai seduai iya.

    Lebuh sida ninga nya, semua sida lalu besampi enggau nyawa ti inggar ngagai Allah Taala.

    Ku sida, “Tuhan ti Pemadu Tinggi, ke ngaga langit, tanah, enggau tasik, enggau semua utai ti dalam sida, ke udah bejaku ngena Roh Kudus nengah mulut nembiak Nuan David,

    ‘Nama kebuah orang bansa bukai pedis ati, lalu semua bansa berundingka utai ti nadai guna?

    Bala raja dunya angkat bediri, lalu orang ke megai perintah udah begempuru ngelaban Tuhan enggau ngelaban Kristus Iya.’

    Laban dalam nengeri tu, iya ti bendar, Herod seduai Pontius Pilate, enggau orang bansa bukai, enggau orang Israel, udah begempuru ngelaban Nembiak Nuan ti kudus, Jesus ke udah dipilih Nuan, ngambika sida ngereja utai ti endang udah dulu diletak Nuan deka nyadi.

    Nya alai diatu, Tuhan, peda Nuan pemalat sida ngemba kami, lalu beri pemerani ngagai nembiak nuan kena sida nusui pesan Nuan, lebuh Nuan ngunjurka jari Nuan lalu ngeraika orang, lalu tanda ti nyelai enggau kereja ajih dikereja dalam nama Jesus, nembiak  Nuan ti kudus.”

    Lebuh sida udah besampi, endur alai sida ke begempuru lalu berenyang. Semua sida lalu dipenuhka enggau Roh Kudus, lalu sida berani nusui pesan Allah Taala.

    Masmur Entara: Masmur 2: 1 - 3, 4 - 7A, 7B - 9

    Saut (peda 11d): Beberekat meh orang ke betuaika TUHAN.

    Ke Satu
    Nama kebuah orang bansa bukai bepekat
    lalu bekira deka ngereja utai ti nadai guna?
    Bala raja sida angkat ngelaban,
    lalu bala pemerintah sida sama bepekat ngelaban TUHAN
    enggau ngelaban raja ti udah dipilih Iya.
    Ku sida, “Aram kitai nganchurka kuasa sida.
    Aram kitai muai perintah sida.”

    Saut: Beberekat meh orang ke betuaika TUHAN.

    Ke Dua
    TUHAN ti duduk di serega ketawa;
    Iya ngeleseka sida.
    Udah nya Iya deka bejaku ngagai sida enggau pengeringat,
    sereta ngenakutka sida ngena pengeringat Iya.
    “Aku udah nyiri raja Aku, ba bukit Aku ti kudus di Sion,” ku TUHAN bejaku.
    Ku raja nya bejaku, “Aku deka madahka adat ti udah diberi TUHAN.

    SautBeberekat meh orang ke betuaika TUHAN.

    Ke Tiga
    Ku TUHAN bejaku ngagai aku: ‘Nuan tu anak Aku.
    Sehari tu Aku udah nyadi Apai nuan.
    Pinta ari Aku, lalu Aku deka ngaga mayuh bengkah bansa
    nyadika pesaka nuan, lalu semua dunya deka diempu nuan.
    Nuan deka mechahka sida ngena tungkat besi,
    lalu ngeredakka sida baka ke ngeredakka periuk tanah.’”

    SautBeberekat meh orang ke betuaika TUHAN.

    Alleluia: (peda Kolosi 3: 1):

    Alleluia, alleluia.
    Nya alai enti kita udah diangkatka idup baru enggau Kristus,
    tumpuka ati kita ngagai utai ti di serega,
    alai Kristus ke duduk muak ari kanan Allah Taala.
    Alleluia.

    Bacha Injil: John 3: 1 - 8

    Nyadi sekali siku orang Parisi, ke benama Nikodimus, ke ari raban tuai orang Judah, mansang ngagai Jesus lebuh malam hari, lalu bejaku enggau Iya, “Pengajar, kami nemu Nuan endang pengajar ke datai ari Allah Taala, laban nadai orang ulih ngereja kereja ajih baka ti dikereja Nuan, enti Allah Taala nadai enggau iya.”

    Jesus lalu nyaut iya, “Enggau bendar Aku madah ngagai nuan, nadai orang ulih meda Perintah Allah Taala enti iya enda diadaka baru.

    Ku Nikodimus bejaku ngagai Iya, “Baka ni ku orang ulih diadaka baru lebuh iya udah besai tuai? Kati iya ulih tama ke dalam kandung indai iya baru, lalu diadaka kedua kali?”

    Disaut Jesus, “Enggau bendar Aku madah ngagai nuan, nadai orang ulih tama ngagai Perintah Allah Taala enti iya enda diadaka ulih ai enggau Roh Kudus.

    Mensia ngadaka mensia, Roh ngadaka roh.

    Anang alit ati lebuh Aku madah ngagai kita, ‘Kita enda tau enda diadaka baru.’

    Ribut bepuput ngagai sebarang endur iya deka.

    Kita ninga munyi iya, tang kita enda nemu ari ni penatai iya, tauka kini ke tunga iya bepuput.

    Baka nya mega orang ke diadaka Roh Kudus.”

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads