6 May 2019 - Hari Satu ba Minggu Ketiga Musim Paska
Cari Berita

Advertisement

6 May 2019 - Hari Satu ba Minggu Ketiga Musim Paska

Chief Editor | Berita Iban MY
May 6, 2019

Graphik: Joe Catholic

Bacha Ke Satu: Surat Pasal Kereja Rasul 6: 8 - 15

Stepen, ke penuh laban berekat enggau kuasa, ngereja mayuh kereja ajih enggau kereja ti nyelai ba orang mayuh.

Udah nya sekeda orang ari raban Balai Gempuru Orang Ke Udah Dilepaska enggau orang Judah ke datai ari menua Sairin, ari Aleksandria, enggau ari menua Silisia enggau Asia, belabuh betalat enggau Stepen.

Tang sida enda ulih ngelaban penemu-dalam enggau kuasa Roh Kudus ti dikena iya bejaku.

Sida lalu belalai nyungkak orang nyebut, “Kami udah ninga iya bejaku busung ngelaban Moses, enggau ngelaban Allah Taala!”

Lalu sida nyungkak orang mayuh, enggau sida tuai bansa, enggau sida pengajar Adat. Sida lalu nangkap Stepen lalu mai iya ngagai Kunsil.

Sida ngasuh orang besaksi bula ngelaban iya, munyi tu, “Orang tu enda ngetu-ngetu bejaku ngelaban endur ti kudus tu, enggau ngelaban Adat, laban kami udah ninga iya madahka Jesus orang Nasaret deka ngerusak endur tu, lalu ngubah semua adat asal ti diberi Moses ngagai kitai!”

Semua orang ke duduk dalam Kunsil nya bela merening magang ngagai Stepen, lalu sida meda mua iya baka mua melikat.

Masmur Entara: Masmur 119: 23 - 24, 26 - 27, 29 - 30

Saut (peda 1a): Beberekat meh orang ke ngasika adat TUHAN.

Ke Satu
Taja pen bala raja bepekat ngelaban aku,
tang aku deka belematika ajar Nuan.
Adat Nuan ngasuh ati aku gaga.
Adat Nuan nyadika penyanding penemu aku.

SautBeberekat meh orang ke ngasika adat TUHAN.

Ke Dua
Lebuh aku madahka semua utai ti udah dikereja aku,
Nuan udah nyaut aku. Ajar meh aku jalai Nuan.
Asuh aku meretika adat Nuan,
lalu aku deka belematika pengawa Nuan ti badas.

SautBeberekat meh orang ke ngasika adat TUHAN.

Ke Tiga
Kejangka aku jauh ari pendiau ti salah,
lalu ulih pengasih Nuan, ajar aku adat Nuan.
Aku udah mutuska runding deka tetap ati ngagai Nuan.
Aku udah mendingka atur Nuan.

SautBeberekat meh orang ke ngasika adat TUHAN.

Alleluia (peda Matthew 4: 4B)

Alleluia, alleluia.
Mensia enda ulih idup makai roti aja,
tang beridup ba genap leka jaku ti pansut ari mulut Allah Taala.
Alleluia.

Bacha Injil: John 6: 22 - 29

Hari siti, bala orang ke tinggal di seberai danau nya, meda semina sebuah aja perau bisi dia.

Sida mega nemu Jesus enda nepan perau nya enggau sida murid Iya, tang sida udah mupuk kediri.

Udah nya perau ari Tiberias datai semak endur alai sida ke makai roti udah bekau Tuhan ke meri terima kasih.

Nya alai lebuh orang mayuh nemu Jesus enggau bala murid Iya sama nadai dia, sida lalu nepan perau, lalu mupuk ngagai Kapernaum, ngiga Jesus.

Lebuh sida nemu Jesus di seberai danau nya, sida lalu bejaku ngagai iya, “Pengajar, kemaya Nuan datai ditu?”

Ku Jesus nyaut sida, “Enggau bendar Aku madah ngagai kita, kita ngiga Aku, ukai laban kita udah meda kereja ajih, tang laban kita udah kenyang makai roti.

Anang bekereja ngulihka pemakai ti nemu buruk, tang bekereja ngulihka pemakai ti tan, ti meri pengidup ti meruan belama iya.

Pemakai nya deka diberi Anak Mensia ngagai kita, laban Allah Taala ti Apai udah ngasuh Iya ngereja nya.”

Sida lalu nanya Iya, “Nama utai ti patut dikereja kami ngambika kami ngereja peneka Allah Taala?”

Ku Jesus nyaut, “Tu utai ti diasuh Allah Taala kereja kita: arapka Iya ke udah dikirumka Iya.”