Header Ads

  • Baru Nyadi

    7 May 2019 - Hari Dua ba Minggu Ketiga Musim Paska

    Graphik: The Peanut Gallery

    Bacha Ke Satu: Surat Pasal Kereja Rasul 7: 51 - 8: 1A

    Stepen bejaku ngagai orang mayuh, tuai-tuai enggau raban kunsil:

    “Kita tu orang ke kieh. Kita enda ditutus dalam ati enggau dalam pending kita. Kita seruran ngelaban Roh Kudus, baka aki ini kita.

    Ni nabi ke enda diperinsaka aki ini kita? Sida udah munuh sida nabi ke madahka dulu kelia pasal penatai Iya ke Lurus, lalu diatu kita udah nyual lalu munuh Iya.

    Kita tu orang ke udah nerima Adat ti diberi bala melikat, tang kita enda ngasika Adat nya!”

    Lebuh raban Kunsil ninga nya, sida pedis ati lalu kerik-kerik ngeli deka ngelaban iya.

    Tang Stepen, penuh laban Roh Kudus, engkadah ke langit, lalu meda mulia Allah Taala, enggau Jesus bediri muak ari kanan Allah Taala.

    Lalu ku Stepen bejaku, “Peda nyin! Aku meda serega tebuka, enggau Anak Mensia bediri muak ari kanan Allah Taala!”

    Tang sida mampul pending sida, manjung lalu semua sida belanda ngagai Stepen lalu nerekam iya.

    Sida lalu ngirit iya pansut ari nengeri, lalu belabuh nuku iya ngena batu.

    Orang ke besalah iya lalu ngengkahka serayung sida ba kaki orang bujang siku ke benama Saul.

    Lebuh sida benung nuku Stepen ngena batu, iya besampi, “Tuhan Jesus, sambut semengat aku!”

    Iya lalu besugang, lalu ngangau enggau nyawa ti inggar, “Tuhan! Anang besalahka sida ketegal dosa tu!” Lebuh iya udah nyebut nya, iya lalu mati.

    Saul rindu meda Stepen kena bunuh.

    Masmur Entara: Masmur 31: 2CD - 3, 5 & 6B & 7A, 16 & 20AB

    Saut (peda 5a): Ngagai jari Nuan O TUHAN, aku nyerahka semengat aku.

    Ke Satu
    Awakka aku ngenduh ba Nuan lalu Nuan ngelindung aku,
    penyaga ke ngelepaska aku.
    Nuan nyadi endur alai aku ngenduh, nyadika penyaga aku.
    Iring lalu uluka aku, munyi ti udah disemaya Nuan.

    SautNgagai jari Nuan O TUHAN, aku nyerahka semengat aku.

    Ke Dua
    Aku nyerahka diri ngagai jari Nuan.
    Nuan udah nebus aku, O TUHAN,
    laban Nuan endang Allah Taala ti tetap ati.
    aku manggaika pengarap aku ba TUHAN.
    Aku deka lantang sereta rami gaga ketegal pengerindu Nuan

    SautNgagai jari Nuan O TUHAN, aku nyerahka semengat aku.

    Ke Tiga
    Perening ngagai nembiak Nuan enggau penelap.
    Selamatka aku laban pengerindu Nuan endang meruan.
    Nuan ngelalaika sida ba endur Nuan Empu
    lalu ngibun sida likun ari akal orang bukai.

    SautNgagai jari Nuan O TUHAN, aku nyerahka semengat aku.

    Alleluia (peda John 6: 35AB)

    Alleluia, alleluia.
    Aku tu meh roti pengidup, ku TUHAN;
    Barang sapa datai ngagai Aku, enda agi lapar.
    Alleluia.

    Bacha Injil: John 6: 30 - 35

    Sida lalu bejaku ngagai Iya, “Enti pia, nama tanda ti deka diberi Nuan ngambika kami meda lalu arapka Nuan? Nama utai ti deka dikereja Nuan?
    Aki ini kami makai mana di menua puang.

    Munyi ti udah ditulis, ‘Iya meri sida roti ari serega ke diempa sida.’“

    Jesus lalu bejaku ngagai sida, “Enggau bendar Aku madah ngagai kita, ukai Moses ke meri kita roti ari serega, tang Apai Aku ke meri kita roti ti bendar ari serega.

    Laban roti Allah Taala nya Iya ke nurun ari serega, lalu meri pengidup ngagai dunya.”

    Ku sida bejaku ngagai Iya, “Tuhan, beri roti nya ngagai kami berari.”

    Ku Jesus bejaku ngagai sida, “Aku tu meh roti pengidup.

    Barang sapa datai ngagai Aku, enda agi lapar, lalu barang sapa arapka Aku, enda agi aus.

    No comments

    Post Top Ad

    Deka nemu berita ti benung #TRENDING tauka #VIRAL ninting hari:

    Post Bottom Ads