8 May 2019 - Hari Tiga ba Minggu Ketiga Musim Paska
Cari Berita

Advertisement

8 May 2019 - Hari Tiga ba Minggu Ketiga Musim Paska

Chief Editor | Berita Iban MY
May 8, 2019

Graphik: Daily Gospel Reading

Bacha Ke Satu: Surat Pasal Kereja Rasul 8: 1B - 8

Berengkah ari sehari nya raban eklisia di Jerusalem balat amat kena perinsa, lalu kelimpah ari sida rasul, semua sida pambar ngagai serata menua Judea enggau Samaria.

Orang ke angkunka Allah Taala nguburka Stepen, lalu bekeduie nyabakka iya.

Tang Saul belabuh ngerusak eklisia. Iya bejalai ari rumah sebuah ngagai rumah sebuah, lalu ngirit orang ke lelaki enggau orang ke indu, lalu nutup sida dalam rumah jil.

Sida ke pambar pendiau, bejalai ari endur siti ngagai endur siti, nusui Berita Manah.

Philip mupuk ngagai nengeri Samaria, ngagai orang dia.

Lalu semua orang mayuh bela keran mendingka utai ti disebut Philip, lebuh sida ninga iya sereta meda kereja ajih ti dikereja iya, laban roh ti jai manjung pansut ari mayuh orang ke dirasuk antu, lalu mayuh orang ke mati tubuh, tauka enda ulih bejalai, digeraika.

Nya alai orang dalam nengeri nya balat amat gaga.

Masmur Entara: Masmur 66: 1 - 3A, 4 - 5, 6 - 7A

Saut (peda 1): Puji meh Allah Taala ngena panjung gaga ati, semua mensia!

Ke Satu
Puji meh Allah Taala ngena panjung gaga ati, semua mensia!
Belagu ngemuliaka nama Iya.
Muliaka Iya ngena pantun puji!
Sebut ngagai Allah Taala, “Naka meh pemadas utai ti dikereja Nuan!

SautPuji meh Allah Taala ngena panjung gaga ati, semua mensia!

Ke Dua
Semua orang di dunya tu nyembah Nuan magang.
Sida belagu muji Nuan. Sida belagu muji nama Nuan.
Datai kitu lalu peda utai ti udah dikereja Allah Taala,
pengawa ti badas ti dikereja Iya ba orang mayuh.

SautPuji meh Allah Taala ngena panjung gaga ati, semua mensia!

Ke Tiga
Iya ngubah tasik nyadi tanah rangkai.
Aki ini kami bejalai meraka sungai.
Dia meh endur alai kami ke rami gaga ketegal utai ti udah dikereja Iya.
Iya merintah belama iya ngena kuasa Iya.

SautPuji meh Allah Taala ngena panjung gaga ati, semua mensia!

Alleluia (peda John 6: 40)

Alleluia, alleluia.
Semua orang ke arapka Anak, bulih pengidup ti meruan belama iya,
lalu Aku deka ngangkatka iya ba hari ti penudi, ku TUHAN.
Alleluia.

Bacha Injil: John 6: 35 - 40

Ku Jesus bejaku ngagai sida, “Aku tu meh roti pengidup. Barang sapa datai ngagai Aku, enda agi lapar, lalu barang sapa arapka Aku, enda agi aus.

Tang munyi ti udah disebut Aku ngagai kita, kita udah meda Aku tang agi ga kita mengkang enda arap.

Semua utai ti diberi Apai ngagai Aku, deka datai ngagai Aku, lalu barang sapa datai ngagai Aku sigi enda ditulak Aku, laban Aku udah datai ari serega, ukai deka ngereja peneka Aku Empu, tang ngereja peneka Iya ke ngirumka Aku.

Lalu tu peneka Iya ke ngirumka Aku: Aku enda tau ngelenyauka indah siku ari semua orang ke udah diberi Iya ngagai Aku, tang ngangkatka iya ba hari ti penudi.

Tu meh peneka Apai Aku, iya nya, semua orang ke meda Anak, lalu arapka Iya, bulih pengidup ti meruan belama iya, lalu Aku deka ngangkatka iya ba hari ti penudi.”