Datai meh, bantu meh aku..
Cari Berita

Advertisement

Datai meh, bantu meh aku..

Chief Editor | Berita Iban MY
May 5, 2019

KASIH AMAT: Sulat benung bediri ngemataka pemulai Francis Ngu ti udah datai ngabas iya.

MIRI: Enda berasai ai mata admin labuh nerutu naya pengudah meda graphik enggau video ti dipansutka Francis Ngu ba Facebook, urung jam 6 lemai tu tadi.

Ba pos nya, mantaika penusah ke ditapi siku indu tuai ke dikelala ngena nama Sulat Ak Masam tauka bini niang Nuing Ak Selajan, 74 taun enggau iya diau kediri ba sebuah rumah tu balat rusak di No lot 198, 277 Kampung Pujut Tanjung Batu 1C, Jalai Padang Kerbau, Miri.

Nitihka penerang ke diterima @beritaibanMY, indu tuai nya nyau enda dapat agi nurun niki ke opis perintah ketegal minta bantu e-Kasih ngichaka ulih nulung iya ngangkatmanah rumah ke diuan iya.

Ku Francis, indu tuai nya semina pansut ari rumah lebuh iya deka peresa enggau ngambi ubat ba klinik.

"Nya pan, indu tuai nya ngasuh orang ke berimbai rumah enggau iya ngangauka Grab Car tauka bas.

"Bisi mega orang ti tuchi ati ngasuh iya mayar tambang semina RM10 enggau bisi kedua ngecas RM12 aja.

"Polis ngasuh indu tuai nya nambit gate rumah iya laban bisi bala nembiak dipeda nikau batu ke dalam rumah iya beberapa hari tu udah lalu.

"Aram meh kitai sama bela besampi ke indu tuai ngambika Tuhan ngemataka iya enggau ngarapka semampai gerai belama," ku Francis.

Asil pansik silik @beritaibanMY, indu tuai nya bisi anak indu siku tang udah belaki enggau orang Brunai.

Anak indai tuai nya jarang ngabas iya laban anak iya nya udah bisi tanggungpengawa enggau ruang bilik kediri.

Pengudah tembu berandau, Francis mega bisi meri bantu mimit ngagai indu tuai nya serayaka nyauka ngintu Hari Gawai.

Berebak enggau nya, Francis mega minta semua bala NGO, parti politik tauka kediri sama bela besaup mantu indu tuai nya enggau ati ti tuchi.

Barang sapa ti deka nemu ngiga indu tuai nya ulih betalipaun ngagai iya ngena lumur: 085-419953 (Sulat)



Aram meh kitai sama bela besaup mantu indu tuai nya, taja pan mimit pan pemeri ari kita tang chukup berega ba iya. Tau sadung artikel tu ngagai bala bakih nuan ba Facebook tauka WhatsApp ngambika mayuh agi bala enggau kitai sama besaup mutarka penusah ke ditapi indu tuai nya. Tuhan merekat semua.. 😇