Tama jalai ngelaban arus, siku indu bebadi nyawa
Cari Berita

Advertisement

Tama jalai ngelaban arus, siku indu bebadi nyawa

Chief Editor | Berita Iban MY
May 8, 2019

KASIH AMAT: Pendiau mutusikal ke ditepan indu nya enggau kerita pengudah eksiden nyadi di Jalai Kampung Seri Kandong, Matang, ditu, urung jam 6.30 lemai kemari.

KUCHING: Siku indu bebadi nyawa pengudah eksiden di Jalai Kampung Seri Kandong, Matang, ditu, urung jam 6.30 lemai kemari, Hari Dua.

Ketuai Opis Tasat enggau Penguasa Trafik Sarawak, Superintenden Alexson Naga Chabu, madahka indu ke eksiden nya dikelala ngena nama Rosetta Bugek, 37 taun, orang ari Kampung Sungai Agas, Matang.

Ku iya, penusah nyadi lebuh indu nya benung nepan mutusikal ari Kampung Rayu, Lundu nuju ke Kuching.

“Lebuh datai ba palan eksiden ke nyadi, mutusikal ke diteapn indu nya dipechayaka enda ulih dijaga lalu tama ke jalai ngelaban arus enggau ngejungka iya belantak enggau sebuah kerita ti benung bejalai lurus ari Kuching nuju ke Kampung Rayu.

“Pengudah eksiden nyadi, indu nya diripotka ngapuska seput kepenudi ba palan eksiden ke nyadi ketegal balat bakal,” ku iya lebuh ke dirandau pengarang berita, sehari tu tadi.

Bangkai indu nya udah dianjung ke Sepital Besai Sarawak kena bejalaika pengawa buntas tasat.

Berebak enggau nya, orang ke deriba kerita, asal dari Kampung Rambungan, Lundu diripotka nadai nenama tauka selamat.

Kes nya agi dipansik ari baruh Seksyen 41(1) Akta Pengangkutan Jalan (APJ) 1987.