23 July 2019 - Hari Dua ba Minggu ke Enam belas Musim Selama
Cari Berita

Advertisement


23 July 2019 - Hari Dua ba Minggu ke Enam belas Musim Selama

Staf @beritaibanMY
July 23, 2019


Bacha Ke Satu: Pemansut 14: 21 - 15: 1

Moses ngedarka jari iya atas tasik nya, lalu TUHAN muputka ai tasik nya ngena ribut ti deras ari timur.

Ribut nya muput semalam-malam nya, lalu ngasuh tasik nya rangkai.

Ai nya bebagi dua, lalu orang Israel bejalai nengah tasik nya nengah tanah ti rangkai.

Ai nya nyau bedinding ari sepiak-sepiak sida.

Orang Ejip lalu begagaika sida nengah tasik nya, mai semua kuda, kerita perang, enggau bala orang ke nepan kerita perang.

Lebuh hari nyau deka tawas, TUHAN merening ke baruh ari tiang api enggau ari gentilang remang, ngagai bala soldadu orang Ejip, lalu sida begau abis ati.

TUHAN ngasuh kaki kerita perang sida lekat, ngambika kaki kerita perang sida enda tentu ulih bepusin.

Ku orang Ejip bejaku, “TUHAN ti beperang ngelaban kitai ngarika orang Israel. Aram kitai lari ari tu!”

TUHAN lalu bejaku ngagai Moses, “Kedarka jari nuan atas tasik nya, ngambika ai pulai baru lalu ngelamun orang Ejip enggau kerita perang enggau orang ke nepan kerita perang.”

Moses lalu ngedarka jari iya atas tasik nya, lalu ba rerak tawas pagi nya, ai nya lalu pulai baru ngenalam iya ti dulu.

Orang Ejip nguji ngerarika diri ari ai nya, tang TUHAN nikauka sida ngagai tasik nya.

Ai tasik nya pulai baru, lalu ngelamun kerita perang, orang ke nepan kerita perang, enggau semua bala soldadu orang Ejip ti udah begagaika orang Israel ngagai tasik nya. Nadai siku sida idup.

Tang orang Israel bejalai nengah tasik nya nengah tanah ti rangkai, lalu ai nyau bedinding ari sepiak-sepiak sida.

Nya alai sehari nya TUHAN nyelamatka orang Israel ari orang Ejip, lalu orang Israel meda bangkai orang Ejip nyau betegaring ba sebelah tebing tasik nya.

Lebuh orang Israel meda pemesai kuasa ti dikena TUHAN ngalahka orang Ejip, sida lalu nangika TUHAN.

Sida arapka TUHAN, sereta arapka nembiak Iya, Moses.

Udah nya Moses enggau orang Israel lalu nyanyi lagu tu kena muji TUHAN: “Aku deka belagu muji TUHAN, laban Iya udah menang. Iya udah nikauka kuda enggau orang ke nepan kuda ngagai tasik.”

Masmur Entara: Pemansut 15: 8 - 9, 10 & 12, 17

Saut (peda 1b): Aram kitai belagu muji TUHAN, laban Iya udah menang.

Ke Satu
Nuan nyepu ngagai tasik, lalu ai betugung tinggi.
Ai bediri baka dinding.
Buntut tasik nya nyadi tanah ti rangkai.
Ku munsuh bejaku, ‘Aku deka ngagai lalu nangkap sida;
Aku deka magi pengaya sida, lalu ngambi semua utai ti dikedekaka aku.
Aku deka nyintak pedang aku, lalu ngambi semua utai ti dikemisi sida.’

Saut: Aram kitai belagu muji TUHAN, laban Iya udah menang.

Ke Dua
Tang Nuan semina sekali aja ngesuhka seput Nuan, TUHAN,
lalu orang Ejip lemas.
Sida tengelam baka bangkang ba ai ti balat begelumbang.
Nuan ngedarka jari kanan Nuan, lalu tanah nelan bala munsuh kami.

Saut: Aram kitai belagu muji TUHAN, laban Iya udah menang.

Ke Tiga
Nuan mai sida tama, lalu nanam sida ba bukit Nuan,
ba endur ti udah dipilih Nuan nyadika endur alai rumah Nuan,
iya nya Langkau Kain TUHAN ti udah digaga Nuan Empu.

Saut: Aram kitai belagu muji TUHAN, laban Iya udah menang.

Alleluia (peda John 14: 23)

Alleluia, alleluia
Orang ke rinduka Aku deka ngasika pesan Aku,
lalu Apai Aku deka rinduka iya,
lalu kami duai Apai deka datai ngagai iya.
Alleluia.

Bacha Injil: Matthew 12: 46 - 50

Lebuh Jesus agi benung bejaku ngagai orang mayuh, indai enggau sida menyadi lelaki Iya bediri di luar, deka bejaku enggau Iya.

Siku orang lalu madah ngagai Iya, “Indai enggau sida menyadi lelaki Nuan bisi di luar, deka bejaku enggau Nuan.”

Tang ku Jesus nyaut orang nya, “Sapa indai Aku, lalu sapa menyadi lelaki Aku?”

Iya lalu nunjuk ngagai sida murid Iya, lalu bejaku, “Tu indai Aku, enggau menyadi lelaki Aku!

Laban barang sapa ngereja utai ti dikedekaka Apai Aku ti di serega, nya meh menyadi lelaki, menyadi indu, enggau indai Aku.”