Dijamah, diasuh 'nyempit'
Cari Berita

Advertisement

Dijamah, diasuh 'nyempit'

Chief Editor | Berita Iban MY
July 25, 2019

GRAPHIK PENGIAS: Siku indu benung duduk kediri ba dalam panking.

KUALA LUMPUR: Udah ga kena jamah, diasuh agi nyual diri.. Nya mih, penusah ke ditapi siku indu (orang Indonesia) pengudah bekelala enggau dua iku lelaki, apin lama ke udah.

Ukai nya aja, indu nya mega diasuh dua lelaki nya nyuwa sebuah rumah di Taman Sri Kuching, Sentul, Kuala Lumpur, ngambi seduai iya ulih diau dia enggau enda bebayar suwa rumah.

Kelimpah ari nya, duit indu nya mega diambi enggau dikena dua iku lelaki meli perengkaguna kediri empu.

Tang taja pia, penusah ke ditapi indu ti beumur 35 taun nya tebantai pengudah iya nyau enda tan agi dijamah dua lelaki nya enggau mutus ati ngelarika diri sebedau ngaga ripot di Balai Polis Jinjang, kemari.

Nitihka penerang ke diterima @beritaibanMY, indu nya suah dijamah dua lelaki nya laban enggai nitihka utai ke dipadah tauka diasuh dua lelaki nya.

“Utai ti pemadu sinu ianya dua lelaki nya kempang ati ngasuh iya nyual diri (nyempit) kena ngulihka duit.

“Sebedau tu, indu nya kala nguji ngelarika diri tang tejanggal. Lebuh indu nya ditan dua lelaki nya, indu nya diemba dua lelaki nya enggau madahka diri deka munuh iya enti nguji deka ngelarika diri baru,” ku iya.

Ku penerang, indu nya mimit da agi nyau ka bakal pengudah dua lelaki nya ngambi batu enggau nguji nikau nuju ke mua iya urung jam 12 tengah malam kemari, lebuh indu nya benung ba luar rumah.

“Ketegal takut enggau irauka pengelikun diri, indu nya ngelaban dua lelaki nya enggau lalu ngelarika ke balai polis,” ku iya.

Berebak enggau nya, Kepala Opis Tasat Jenayah Kuala Lumpur, Senior Asisten Komisioner Rusdi Md Isa, madahka bisi nerima ripot ari indu ti napi penusah nya.

“Dua lelaki nya udah ditan polis kena bejalaika pengawa mansik kes nya enggau silik agi,” ku iya.