Dua iku ngenggam semengat
Cari Berita

Advertisement


Dua iku ngenggam semengat

Staf @beritaibanMY
July 29, 2019

APU: Pecah cheremin luan kerita ba palan eksiden ke nyadi.

BINTULU: Dua iku ngenggam semengat pengudah sebuah kerita enggau lori belantak di Kampung Jepak, malam tadi, 28 Julai 2019.

Pengari Opis Operasyen Bomba Sarawak madah, raban bomba bisi nerima ripot bekaul enggau eksiden ke nyadi urung 11.15 malam.

Ku iya, pengudah nerima ripot nya, seraban bomba lalu berumban ngesah ke palan eksiden nyadi ngambika ulih bejalaika operasyen nyelamat.

“Lebuh datai ba palan eksiden nyadi, komander operasyen ngeripotka sebuah kerita Proton Saga belantak enggau lori.

“Proton Saga nya pecah cheremin luan ketegal ngelantak kemudi lori nya,” ku iya lebuh ke dirandau pengarang berita, sehari tu tadi.

Pengari ke sama madah, raban bomba pengudah nya lalu berumban ngemansutka orang ti mengkang ba dalam kerita nya.

Ku iya, orang ti bakal pengudah nya dianjung ke sepital ngambika ulih diperubatka enggau silik agi.

“Operasyen diketu pengudah pendiau ba palan eksiden ke nyadi ulih dijaga,” ku iya.