4 parai, 2 bakal, eksiden di Kilometer 52, Jalai Sri Aman - Sarikei
Cari Berita

Advertisement

4 parai, 2 bakal, eksiden di Kilometer 52, Jalai Sri Aman - Sarikei

Chief Editor | Berita Iban MY
August 23, 2019

KASIH AMAT: Pendiau kerita enggau lori pengudah eksiden nyadi.

KUCHING: Empat diripotka parai, dua balat bakal, pengudah sebuah kerita enggau lori belantak di Kilometer 52, Jalai Sri Aman-Sarikei, tumu pagi tadi.

Kepala Opis Tasat enggau Penguasa Trafik Sarawak, Superintenden Alexson Naga Chabu, empat iku ke parai nya (deriba enggau penumpang kerita) ti beumur entara 19 - 41 taun, orang ari Engkelili.

Ku iya, empat iku ke parai nya dikelala ngena nama Mixzezly Henry (deriba kerita), Roman Ensalit, Agustine Rentap Didi enggau Dunstan Empawie (penumpang).

Tang dua iku agi penumpang iya nya Hail Sumping enggau Larry Jelapang diripotka balat bakal enggau deriba lori nadai nenama tauka selamat.

"Sebedau eksiden nyadi, urung jam 1.52 pagi, empat iku (mansa) enggau dua iku ti balat bakal nya benung dirantau jalai ngena kerita ari Sarikei nuju ke Sri Aman.

"Lebuh datai ba palan eksiden ke nyadi, enda memukai datai sebuah lori lalu ngelantak kerita ke ditepan sida.

"Lori nya dipechayaka tepawah lalu tama ke jalai ke di tengah sida iya (ngelaban arus).

"Ba eksiden ke sama, deriba enggau semua penumpang diripotka balat bakal enggau ngejungka empat iku parai," ku iya lebuh ke dirandau pengarang berita, sehari tu tadi.

Ku Alexson, semua sida ke bakal udah dianjung ke Sepital Sri Aman ngambika ulih diperubatka enggau silik agi.

"Asil pansik tumu, eksiden nyadi bepun ari pengilap deriba lori nya.

"Tang taja pia, raban polis agi bejalaika pengawa mansik enggau ngiga saksi ti bisi meda lebuh eksiden ke nyadi," ku Alexson.

Kes nya agi dipansik ari baruh Seksyen 41(1) Akta Pengangkutan Jalan (APJ) 1987.