Anang peneka ati ngena 'socket', ngechas talipaun binching di restoran!
Cari Berita

Advertisement

Anang peneka ati ngena 'socket', ngechas talipaun binching di restoran!

Chief Editor | Berita Iban MY
August 24, 2019

GRAPHIK: @AsiaWire

Nyau enda berasai taun nyin ila udah taun 2020.. Asil pansik raban Berita Iban Online lebuh kami sebuat bejalai ba sebelah pasar enggau nemuai ngagai rumah panjai, mayuh amat anembiak mit jeman diatu landik nyulik tauka main talipaun binching.

Enti iya ke anembiak udah landik enda ibuh sebut agi bala ke bujang dara enggau iya ke besai tuai.. Mesek nya! *Jaku tundi aja* ✌

Tang taja pia, utai ti ngasuh raban kami irau iya nya, bala anembiak mit lebuh bemain talipaun binching enggau enggai bebadu nyentukka maya ngechas (ngisi bateri) pan sida agi majak nyulik talipaun binching nya.

Bepun ari nya mega utai ti dikenangi kitai tau nyadi.

Munyi ku jaku sempama kitai iban, 'Ukai ngajih rangkang ngachuk mata'.

Ukai nama admin madah baka nya laban admin bisi macha berita bekaul enggau siku nembiak lelaki parai ketegal tangkap karan (electric shock).

Anembiak nya diripotka parai tekala nya..

GRAPHIK DIAMBI ARI CCTV: Anembiak lelaki nya (Liu) benung main talipaun binching sebedau penusah ke enda disadang nyadi.

Nitihka berita ke dipansutka DailyMail, siku anembiak lelaki, dikelala ngena nama Liu, 13 taun, diripotka parai lebuh bemain tauka nyulik talipaun binching ba dalam sebuah restoran di China, Hari Lima (16 Ogos 2019), minggu nyin kemari.

Nitihka penerang ari menyadi indu iya (kakak), Liu benung makai ba sebuah restoran manuk guring.

Socket ke dikena Liu ngachuk ke charger enggau ngechas talipaun binching.

Liu ngachuk ke charger talipaun binching iya ba siti sockets ti puang di restoran nya laban iya deka ngechas enggau main talipaun binching tekala nya mega.

Ba dalam rikod CCTV, Liu benung duduk enggau bala bakih iya. Enda memukai tubuh iya (Liu) gegetar enggau iya ngejungka iya lemi tulang.

Meda Liu nyau lemi tulang, bakih ke sama makai enggau iya dia lalu berumban nganjung iya ke sepital ngambika ulih diperesa enggau silik agi.

Lutur ke meresa Liu madahka iya udah nadai tauka enda ulih diselamatka agi laban udah kena tangkap karan, bisi abi angus ba mua enggau tubuh iya.

Talipaun binching Liu.

Laban ke enda puas ati tauka enda ulih nerima pemarai Liu, menyadi indu Liu mansang ngagai kedai makai nya lalu nyalahka socket ke ba restoran nya nadai nitihka stindit enggau minta raban opis ti bekuasa bejalaika pengawa mansik.

Asil pansik silik, tali pengechas ke dikena Liu ukai tali pengechas ti original.

Taja pan, nadai nenama tauka rusak pengudah penusah nyadi.

DailyMail ngeripotka socket ke endur Liu ngechas talipaun binching nya dipadamka orang ke ngempu restoran nya enggau enda ulih dikena pengelama dua hari nitihka peminta bala ari opis ti bekuasa. RIP Liu.. 😭

Kes tauka pekara ke bakatu, ukai keterubah iya nyadi.. Anang meli tauka ngena charger talipaun binching ti rega murah tauka ukai original.

Enti ulih anang sesekali ngechas enggau main talipaun binching! Tau ngereja pengawa bukai serayaka nganti talipaun binching nuan penuh bateri..

Nuju semua bala apai indai, anang enda ngemataka bala anak kita lebuh sida iya main tauka nyulik talipaun binching. Jaga meh pengelikun ba ruang bilik kitai.

Pemadu manah sekali, anang nelebaka bala anak kita laban enti sida iya udah gian main talipaun binching. Maya nya, tusah kitai deka ngaum tauka mutarka pekara nya.. Tuhan merekat semua kitai. 🙏 #beritaibanMY