Sangka aku jelu babas, tang nemu nya bakih aku..
Cari Berita

Advertisement

Sangka aku jelu babas, tang nemu nya bakih aku..

Chief Editor | Berita Iban MY
August 27, 2019

GRAPHIK PENGIAS: Pendiau siku lelaki benung gali enggau udah nadai.

KUCHING: Siku lelaki parai pengudah kena timbak bakih ke sama nurun ngasu enggau iya ba babas semak Kampung Sadir, Padawan, kemari, (Hari Satu).

Nitihka penerang ke diterima kami, lelaki ke parai nya dikelala ngena nama Wilco William, 35 taun, nurun ngasu begulai enggau lima iku bakih iya.

Sebedau penusah nyadi, urung jam 6.50 lemai nya, sida iya bebagi tubuh tauka bepcah ari pangan diri.

Ku iya, bakih ke nimbak Wilco (saspek), 63 taun, salah peda enggau nyangka Wilco nya baka jelu babas.

"Sida iya enam iku nya nurun ngasu belabuh ari pagi Hari Satu enggau bebagi tubuh tauka bepecah sereta bejanji deka betemu enggau beanti ke pangan diri ba siti endur ke udah dipaduka sida iya sebuat.

"Tang, enda nyangka Wilco kena timbak bakih ke sama ngasu enggau iya ba perut ngena senapang patah ketegal salah peda tauka nya iya nya jelu babas," ku penerang lebuh ke dirandau pengarang berita.

Pengudah nemu utai ke enda disadang nyadi, bakih ke nimbak Wilco nya alu nganggauka bakih kebukai ngambika ulih enggau iya mai Wilco pansut ari babas ke endur sida ngasu nya.

"Taja pia, Wilco udah enda ulih diselamatka agi tauka udah nadai enggau sida iya nganggauka raban polis enggau ngeripot penusah ti udah nyadi nya," ku iya.

Berebak enggau nya, Kepala Polis Pampang Padawan, Superintenden Aidil Bolhassan, madahka raban iya bisi nerima ripot bekaul enggau penusah ke nyadi enggau pansik silik deka dipejalaika.

"Lelaki ke nimbak Wilco nya orang ari Kampung Sadir, udah mujur ditangkap enggau asil pansik tumu, iya ngaku nimbak Wilco lebuh sida iya ngasu.

"Raban polis mega udah ngerampas senapang patah enggau tujuh igi leka seterum," ku iya lebuh ke dirandau pengarang berita, sehari tu tadi.

Bangkai Wilco udah dianjung ke Sepital Besai Sarawak (HUS) kena bejalaika pengawa buntas tasat.

Kes nya agi dipansik ari baruh Seksyen 304A Kanun Keseksaan ketegal udah tetimbak bakih iya. Enti ditukuka salah ulih kena ukum jil maksimum dua taun tauka ukum mata duit tauka kededua nya sekali.