Siku lelaki ditan polis, mabuk mukut mua bini
Cari Berita

Advertisement

Siku lelaki ditan polis, mabuk mukut mua bini

Chief Editor | Berita Iban MY
August 24, 2019

GRAPHIK PENGIAS

SIBU: Siku lelaki ditan polis pengudah mukut mua bini iya, di Jalai Gambir, ditu, tumu pagi tadi.

Kepala Polis Pampang Sibu, Stanley Jonathan Ringgit, madahka penusah nyadi urung jam 11 malam kemari (Hari Lima), lebuh lelaki nya (saspek), 27 taun, pulai ke rumah.

"Lebuh datai di rumah, lelaki nya benung mabuk enggau enda memukai lalu mukut mua bini iya enggau ngejungka mulut enggau idung bini iya kembai," ku iya lebuh ke dirandau pengarang berita, sehari tu tadi.

Kelimpah ari nya, lelaki nya mega mecahka televisyen, pinggai mangkuk, bangku enggau ngejungka perengkaguna ba dalam rumah nya temera.

Asil pansik tumu raban polis, bini lelaki nya, 19 taun, kereja nyadi 'jurusolek', seduai iya udah begulai setaun jadi melaki-bini enggau seduai iya mega bisi siku anak mit lelaki, 11 bulan.

Ku Stanley, lelaki nya udah mujur ditangkap polis enggau iya udah dibaie ke balai polis.

Ku iya, lelaki nya deka direman sehari tu (24 Ogos) di Mahkamah Majistret Sibu.

Kes nya agi dipansik ari baruh Seksyen 427/323 Kanun Keseksaan laban udah nyamah bini iya ngena jari enggau mecahka perengkaguna ba dalam rumah.