Siku lelaki lenyau, ngasu jani di Bukit Dugan, Nanga Malai
Cari Berita

Advertisement

Siku lelaki lenyau, ngasu jani di Bukit Dugan, Nanga Malai

Chief Editor | Berita Iban MY
August 26, 2019

NGARAPKA JAMPAT TEMU: Raban SAR benung ngatung perengkaguna ke dikena ngiga lelaki ke lenyau nya ke dalam perau.

SIBU: Siku lelaki diripotka lenyau pengudah nurun ngasu jani di Bukit Dugan, Nanga Malai, Katibas di Song, kena Hari Lima, minggu nyin tadi.

Urung jam 1.30 tengah hari nya, lelaki ke lenyau nya, Daun Pau, 48 taun, dipechayaka nurun ngasu ke babas urung penyauh sejam ari rumah panjai ke diuan iya.

Laban irauka pengelikun menyadi tuai iya (lelaki ke lenyau), menyadi biak Daun ngaga ripot polis di Balai Polis Song urung jam 6 lemai, Hari Enam, ngambika raban polis ulih nulung ngiga menyadi iya ke lenyau nya. 

Pengari Opis Operasyen Bomba Sarawak, madahka tiga iku raban bomba ari Balai Bomba (BBP) Song enggau diuluka Mohammad Ai'nli Akhbar Malik berumban ngesah ke palan penusah ke nyadi pengudah nerima ripot enggau deka bejalaika operasyen SAR.

Operasyen Ngiga enggau Nyelamat (SAR) nya mega dibantu raban polis enggau beberapa iku raban RELA.

"Hari keterubah bejalaika operasyen SAR, raban bomba nepan perau panjai ke diempu RELA kena sida iya ke palan penusah ke nyadi.

"Raban bomba ngambi awak sembilan jam nepan perau nengah sungai Katibas Song," ku iya lebuh ke dirandau pengarang berita, kemari. 

Tang taja pia, nyentuk lemai kemari (Hari Minggu) lelaki ke lenyau nya (Daun) agi bedau temu.

Berita tu deka ditandu nganti udah bulih penerang ti silik ari opis ke megai tanggungpengawa.