Siku lelaki parai kena timbak, ngiga pamak di Lubuk Lalang, Mendamit
Cari Berita

Advertisement

Siku lelaki parai kena timbak, ngiga pamak di Lubuk Lalang, Mendamit

Chief Editor | Berita Iban MY
August 26, 2019

KASIH AMAT: Bangkai Tony (Graphik mit) ditemu benung telentang ba tisi bukit enggau tekait ba urat kayu enggau dipeda agi ngena baju lengan panjai chura chelum, tanchut chura gadung enggau ngena kasut getah chura chelum. 

LIMBANG: Siku lelaki ditemu parai dalam babas enggau bisi enam abi bekau timbak ba tubuh pengudah pulai gawa enggau nurun ke tanah laban deka ngiga pamak.

Orang ke ngempu bangkai nya dikelala ngena nama Tony Malong, 42 taun, gawa nyadi mekanik ba kuari batu Sungai Bawang di Medamit, ditemu genturung pendiau ba babas ti bisi bukit di Lubuk Lalang, Mendamit, tengah hari 25 Ogos tu tadi, pengudah iya ditemu bini iya Rasnah Pango lenyau kena 23 Ogos 2019.

Niang Tony udah ninggalka bini enggau tiga iku anak iya ti beumur entara 2 taun nyentukka 14 taun.

Kepala Polis Pampang Limbang, Supt Abang Zainal Abidin Abang Ahmad, madahka bangkai Tony ditemu benung telentang ba tisi bukit enggau tekait ba urat kayu enggau agi bisi gari, ngena baju lengan panjai chura chelum, tanchut chura gadung enggau ngena kasut getah chura chelum.

"Asil pansik tumu raban polis ba palan penusah ke nyadi, Tony dipechayaka kena timbak orang laban salah tuju tauka kachit lebuh iya benung begigaka katak enggau bisi enam abi bekau leka seterum penabur ba belakang rusuk sepiak kanan iya.

"Tang taja pia, asil peresa raban polis urung penyauh 100 meter ari endur bangkai Tony ditemu, raban polis nadai tetemuka senapang ba sebelah endur nya," ku iya.

"Asil pansik silik ba palan penusah ke nyadi, nadai bekau bakal ditemu ba tubuh Tony tang raban polis bisi tetemuka sigi duku ke dipechayaka diempu Tony," ku iya lebuh ke dirandau pengarang berita, kemari.

Ku Abang Zainal, Tony ditemu bini iya lenyau pengudah iya nyau semalam enda pulai ke rumah, kena 23 Ogos 2019, laban Tony endang semampai ngereja pengawa ke sebaka, iya nya nurun gawa jam 7 pagi enggau pulai urung jam 7 malam.

Tang kena Hari Lima tu tadi, Tony alu nadai pulai ke rumah.

Nangkan ke nya, bini Tony enggau bala sida sebilik nguji ngiga ba sebelah rumah panjai sida iya tang nadai ga tetemuka tanda tauka iya.

Kena 25 Ogos 2019, urung 9 pagi, bini Tony enggau beberapa iku bala sida sebilik tetemuka kerita ke diempu Tony, ke dipakingka iya ba tisi jalai Lubuk Lalang, Mendamit, urung penyauh 7 kilometer ari rumah sida iya tang nadai mega tetemuka Tony.

“Pengudah nya, bini Tony pan minta bantu ari bala genturung pendiau ba rumah panjai Steven, Kampung Liang Dato, Jalan Nanga Medamit ngambika ulih sama bela besaup ngiga Tony.

 "Tony mujur ditemu sida iya urung jam 12 tengah hari, sida iya alu nganggauka raban polis enggau madahka Tony udah temu," tandu Abang Zainal.

Nitihka penerang ari bakih ke sama gawa enggau Tony iya nya Paulus, ba hari ke sama Tony lenyau (Hari Lima), maya agi ba endur gawa, Tony bisi madah deka ngiga pamak enggau iya bisi madah anang hari siti (pagila) enti nyema iya enda nurun gawa.

Ku Rosnah (Bini Tony), laki aku sigi rindu ngasu tauka nurun begiga ke lauk ke tanah ke diri enggau iya mega rindu manjuk jelu laban ke nadai senapang.

Berebak enggau nya, bangkai Tony udah dibaie ke Sepital Limbang kena bejalaika pengawa buntas tasat.

"Naka kediatu, orang nimbak Tony (saspek) agi bedau temu enggau raban polis minta orang mayuh ke bisi penerang tauka bisi meda lebuh penusah ke nyadi tau nganggauka tauka mansang ngagai balai polis ke semak ngambika ulih mantu mutarka kes tu," ku iya.

Kes nya agi dipansik ari baruh Seksyen 302, Kanun Keseksaan.