Siku orang tuai parai, kena sengat lebih 200 iku indu utai
Cari Berita

Advertisement

Siku orang tuai parai, kena sengat lebih 200 iku indu utai

Chief Editor | Berita Iban MY
August 31, 2019

BALAT AMAT: Pendiau belakang orang tuai nya pengudah kena sengat indu nya.

Siku orang tuai diripotka parai di sepital pengudah entaruhka nyawa pengelama empat hari enggau ngenanka pemedis kena sengat indu utai lebih 200 iku.

Orang tuai nya dikelala ngena nama, Mohd Ghazali Awang, 67 taun, kena sengat indu utai (indu manyi) lebuh iya meresi tauka ensiang kebun ngena kubi di Kampung Kuala Betis, Gua Musang, urung jam 9 pagi, Hari Dua minggu nyin kemari.

Anak iya, Mohd Firdaus Mohd Ghazali, 31 taun, madahka apai iya benung raya lebuh ke diperubatka di Sepital Gua Musang (HGM) pengelama tiga hari.

Pengudah nya, apai aku dianjung ke Sepital Kuala Krai (HKK), Hari Empat minggu nyin kemari, sebedau iya diripotka parai, urung jam 12.45 tengah hari, kemari.

"Sebedau penusah nyadi, apai aku nurun ke kebun enggau tiga iku menyadi aku (dua iku menyadi biak enggau siku menyadi tuai) enggau sama bela mai entuka kediri laban deka meresi kebun ba endur ke mayuh macham utai tanam.

"Apai aku mai (deriba) kubi nurun ke baruh bukit laban deka meresi rebak ba kaki bukit nya, tang enda memukai sarang indu utai urung pemesai tayar kerita labuh ke baruh lalu ngejungka iya kena sengat lebih 200 iku indu utai nya.

"Pengudah nya, apai aku berumban terejun ari kubi nya enggau ngerayap niki ke atas bukit laban deka ngelarika diri ari indu utai nya enggau tama ke dalam entuka," ku iya lebuh ke dirandau pengarang berita, sehari tu tadi.

Ku iya, lebuh ke agi ngenanka pemedis pengudah kena sengat indu utai nya, apai aku sempat nganggauka menyadi tuai aku, Mohd Ikhwan, 33 taun, ke enda jauh ari endur nya lalu ngasuh menyadi tuai aku nya nganjung iya ke sepital.

Ku iya, lebuh apai aku diperubatka ba sepital, bisi 24 abi sengat indu manyi nya ba pala enggau lebih 200 abi sengat ba tubuh iya.

"Niang apai iya disembiangka di Masjid Tengku Muhammad Faiz Petra Bandar Baru Gua Musang sebedau iya dikuburka di Tanah Kubuh Islam KESEDAR Petra, urung jam 8 malam tadi," ku iya.