Empat lelaki nyerungkai rumah, nanchang tua menyadi aku..
Cari Berita

Advertisement

Empat lelaki nyerungkai rumah, nanchang tua menyadi aku..

Chief Editor | Berita Iban MY
September 4, 2019

TEBERUNSAI: Pendiau ba dalam rumsh pengudah empat saspek nya nyerungkai rumah di Jalai Bau Tondong, tumu pagi tadi.

BAU: Empat lelaki ngena 'topeng' dipechayaka nyerungkai rumah, udah nabanka duit RM1,000, tiga igi talipaun binching enggau sebuah kereta Honda City di Jalai Bau Tondong, urung jam 2.30 pagi tadi.

Kepala Polis Pampang Bau, DSP Poge Nyaon, madahka lebuh penusah nyadi, orang ke ngempu rumah nya enggau menyadi iya benung tinduk ba bilik pangking.

Ku iya, seduai iya semenyadi ke agi tinduk nya, dani kenyap pengudah empat iku lelaki ti enda dikelala (saspek) ngena 'topeng' enggau begari chura chelum tama ke dalam rumah seduai iya.

"Salah siku ari saspek ke bisi mai duku enda ngasuh seduai dua menyadi nya ngemata tauka malik ngagai sida iya (empat saspek) ti benung nyerungkai keresa ba rumah nya enggau saspek nya mega ngemba deka munuh seduai dua menyadi nya enti nyema enda mending utai ku saspek nya.

"Kelimpah ari nya, seduai dua menyadi nya ditanchang saspek ngena tali ba kaki, jari enggau mulut tang menyadi iya ke ngempu rumah nya ditanchang ngena kain.

"Saspek udah nabanka duit RM1,000, tiga igi talipaun binching enggau sebuah kereta Honda City," ku Poge lebuh ke dirandau pengarang berita, sehari tu tadi.

"Saspek dipechayaka tama ke dalam rumah nya ngena jalai ari pintu dapur belakang rumah nya.

Tang taja pia, nasib manah seduai dua menyadi nya nadai nenama tauka selamat.

Pengudah seduai dua menyadi nya mujur muka tali ke ditanchang saspek nya, seduai iya lalu ngaga ripot di Balai Polis Bau.

Kes nya dipansik ari baruh Seksyen 395 Kanun Keseksaan enggau Seksyen 397 Kanun Keseksaan.