Ketegal dendam lama, mabuk, siku lelaki ditemu parai ba tengah jalai alun
Cari Berita

Advertisement

Ketegal dendam lama, mabuk, siku lelaki ditemu parai ba tengah jalai alun

Chief Editor | Berita Iban MY
September 22, 2019

KASIH AMAT: Bangkai Raju ditemu benung gali ba tetengah jalai alun di palan penusah ke nyadi.

KUCHING: Siku lelaki ditemu parai enggau tubuh iya dibalut darah dipechayaka dibunuh orang ba tengah jalai antara Kampung Resak enggau Kampung Diang, di Jalai Mentung Merau, Serian, tumu pagi tadi.

Kepala Polis Pampang Serian, DSP Aswandy Anis, madahka lelaki ke parai nya dikelala ngena nama Raju anak Jinny, beumur 27 taun, ngapuska seput kepenudi ba palan penusah nyadi.

Ku iya, urung jam 4 pagi tadi (22 September 2019) raban polis bisi nerima ripot ari orang mayuh madahka bisi tetemuka siku lelaki enda ngeleda enggau dibalut darah ba tengah jalai antara Kampung Resak enggau Kampung Diang, di Jalai Mentung Merau, Serian

"Pengudah nerima ripot nya, raban polis alu berumban ngesah ke palan penusah ke nyadi enggau asil pansik ba palan penusah  ke nyadi lelaki nya udah parai," ku iya lebuh dirandau pengarang berita sehari tu tadi.

Ku Aswandy, polis mega mujur nangkap empat suspek lelaki ke beumur antara 16 nyentuk 19 taun.

Ku iya, lelaki ke parai nya enggau empat suspek dipechayaka bisi ngulu pengerami ba rumah ke semak dia.

"Kebuah penusah nyadi dipechayaka udah mabuk enggau bisi dendam lama. Raban polis mega bisi tetemuka butul kacha ti udah pecah enggau tinso ba palan penusah nyadi," ku Aswandy.

Taja pia, lelaki ke parai nya deka dibuntas tasat kena nemu kebuah iya parai.

"Empat iku suspek ditan polis kena bejalaika pengawa mansik enggau kes nya dipansik ari baruh Seksyen 302 Kanun Keseksaan," tandu iya.