Nya upah seduai, ba anang nyerungkai rumah orang..
Cari Berita

Advertisement

Nya upah seduai, ba anang nyerungkai rumah orang..

Chief Editor | Berita Iban MY
September 10, 2019

SEPI ASAI: Dua saspek (tengah) mujur ditangkap polis kemari.

KUCHING: Rikod Video Kamera Belalai (CCTV) udah mantaika pica dua lelaki dipechayaka ngerungkai sebuah rumah di Star Garden, ditu.

Dua lelaki nya (saspek) beumur 34 enggau 40 taun nya ditangkap raban Komuniti Polis lebuh sida iya bejalaika pengawa ngemata ba endur nya.

Tang taja pia, dua saspek ke dipechayaka bekait enggau kes ngerungkai rumah ke sama ulih ngelarika diri lebuh raban polis bejalaika pengawa abas ngenyit tauka nangkap.

Kepala Polis Pampang Kuching, Asisten Komisioner Awang Din Awang Gani, madahka dua saspek udah nyerungkai dua buah rumah ba hari ke sama ulih ngelarika diri sebedau seduai iya mujur ditangkap raban polis di Stapok.

"Urung jam 2 lemai, dua sapek nya nguji ngerungkai sebuah rumah ba endur perumahan Poh Kwong Park Kuching, tang enda mujur pengudah penatai seduai iya ditemu orang ke ngempu rumah nya.

"Takah sejam pengudah nya, dua saspek ke sama ulih tama ke dalam sebuah rumah di Star Garden nengah pintu grill rumah nya.

"Asil pansik raban polis, orang ke ngempu rumah udah napi pengerugi urung penyampau RM600 pengudah dua sapek nya nyerungkai rumah iya, ku iya lebuh ke dirandau pengarang berita, kemari.

Ku Awang Din, entuka ke dikena saspek nyerungkai rumah nya dipechaya entuka ke udah ditaban tauka dichuri seduai iya laban raban kami bisi nerima ripot ari orang ke ngempu entuka di Balai Polis Sentosa, madahka entuka nya udah lenyau.

Asil pansik silik, kededua saspek nya bisi rikod jenayah bekait enggau dadah enggau enchuri sekeda endur di Kuching enggau Padawan.

Raban polis udah bulih pemendar ngetan tauka reman dua saspek nya ari kort ngambika ulih bejalaika pengawa mansik silik.