Resepi jani viral versi iban, enggai ga dik?
Cari Berita

Advertisement

Resepi jani viral versi iban, enggai ga dik?

Chief Editor | Berita Iban MY
September 16, 2019

LAPAR MEDA: Pica chara ngaga tauka resepi jani viral iban empu style.

Minggu nyin kemari, siku ari pengarang Berita Iban Online bisi interbieu siku indu dikelala ngena nama Prishella Ak Emang, orang Sebauh enggau iya mega orang ke ngempu tauka ngaga resepi 'Stew Pork versi Mami AJ'.

Naka ke sehari tu, urung penyampau 5 ribu iku orang udah besadung resipi 'Stew Pork veri Mami AJ' ke dipansutka Prishella ba Facebook iya.

Lebuh dirandau pengarang berita, Prishella madah iya nyau puas tauka leju makai jani panduk girau, panggang, panduk ngena tepung enggau mayuh macham chara tauka resepi ke nadai dirintaika ditu.

"Nya alai aku ka nguji manduk chara ke nyelaie mimit.

"Kebatang endar, resipi tu ari jaku Indon, diambi ku ari google. Maya nya aku ngiga resipi manduk jani. Nyu leju manduk chara kesama belama. Pengudahnya, diaduka aku ngena chara aku empu ari segi perengkaguna enda 100% nitih resipi asal," ku iya lebuh dirandau pengarang berita.

Prishella salah siku orang indu ti rindu berapi. Ukai semina nemu nyumai lauk aja, tang iya mega landik ngaga kek, kuih enggau iya suah begaga utai empa di rumah.

"Aku endang bisi nyimpan juluk ati deka muka kedai diri empu. Arap bisi jereki ulih belabuh bisnes kediri meh pagila lusa," ku iya.

"Stew pork nama resepi tu laban tu nguji ngaga baka jani panduk kicap baka ke dijual cino ba dalam tin nya deh, tandu iya.

Bah, aram kitai sama bela belajar bakani ka ngaga resepi tauka chara manduk 'Stew Pork veri Mami AJ':


Chara keterubah, iya nya lumur satu:

● Rebus jani samchan tu 30minit. Rebus apus.
● Tungkup keh (kulit ba baruh isi ba atas). Lg kalu mansau liat isi ya nya.
● Enti udah chukup 30 minit tus keh. Kendas sampai rangkai enggau teju 15minit.
● Ai rebus jani nya tadi, anang muai. Galau kena ngukus babi tu legi ba chara kepenudi sekali.


Chara lumur dua:

Marinade jani nya tadi ngena perengkaguna ke dirintaika aku di baruh tu:
● Sos tiram
● Kicap manis
● Kicap pekat
● Garam
● Biching
● Lada chelum mimit

Marinade rangkai aja jani nya urung pengelama 30 minit. Enti nyema bisi ai laluh tau buai laban enda begunaka ai.


Chara ke lumur tiga:

● Chara ke sekali tu bisi ka pepedis mimit. Anang enda nyikap diri laban lebuh nuan manduk jani nya minyak nya ulih ngembup tauka ensambur ba sebelah dinding. Mechik au.. 🤣
● Panduk jani nya tenggelam ba minyak. Anang kena isi. BA KULIT YA AJA. Panduk tungkup.
● Kulit ari baruh. Isi ba atas .
● Panduk sampai nyau kuning, mansau amat tauka kekerup gamal iya. Tu ambi ke kulit iya engkerutu legi maya nuan ngukus iya. (Ba chara kepenudi sekali legi)

Bakatu gamal iya enti udah chukup girau.



Chara ke lumur empat:

● Tetak nitihka pemesai enggau pengemit kedeka kita empu.
● Pengudah nya, semua isi jani ke udah ditetak nuan nya tadi alu dikukus nuan.
● Kukus baka nuan ngukus manuk tauka ikan nya mega.
● Ai ti kena nuan ngerebus jani tadi, tau dikena nuan ngukus jani nya baru.
● Enti nyema nuan deka ngulai tauka nyampur bawang pan ulih mega.
● Tang chara aku ngena ai kena ngerebus jani keterubah nya tadi enggau ditabakka aku kicap manis, garam enggau biching aja. Pan udah chukup setidi.. Hehe


Chara ke lumur lima:

● Kukus urung pengelama 2 jam. Lama agi nuan ngukus, lemi agi ga isi jani nya tadi.
● Enti nyema nuan ka nyampur sayur tauka lobak masin ngam agi asai iya.
● Aku enda nyampur laban lobak masin aku udah abis. Hehe


"Bah! Kenya meh gamal ya. Pepelu isi minta tegam.. Enggai ga dik?," pia ku Prishella nundi ba pemacha ba Facebook.

Enti nyema bini tauka indai nuan udah tembu berapi. Pengudah kita tembu makai, anang enda meri jaku puji ngagai sida iya.

Padahka nyamai magang utai sumai sida ngambika sida iya rindu ati enggau bagas agi berapi ke nuan.

"Nyamai amat utai panduk nuan wai... Alah panduk cino," nadai pulai ke pemedis nyebut nya tang anang ga kelalu bebungai lelak admin muru semut legi. 🤣

Nyau lapar perut meda badas amat ga jani nya udah mansau.

Kati ku runding kita? Ni kita ke lelaki tau 'tag' enggau 'share' ngagai bala bini kita enggau ngasuh sida iya nguji ngaga resepi tu.