Rumah panjai TR Andrew Lawai angus, 20 iku orang nadai palan endur ngenduh
Cari Berita

Advertisement

Rumah panjai TR Andrew Lawai angus, 20 iku orang nadai palan endur ngenduh

Chief Editor | Berita Iban MY
September 4, 2019

KASIH AMAT: Raban bomba benung bejalaika operasyen madamka api ba palan penusah angus ke nyadi, malam tadi.

SIBU: Urung penyampau 20 iku orang nadai palan endur ngenduh pengudah rumah panjai TR Andrew Lawai, Jalai Jagoi Lama di Pakan, pemanjai tujuh pintu, ke diuan sida iya angus malam tadi.

Penusah nyadi dipechayaka urung jam 8.50 malam, maya nya mega sida serumah mayuh udah tembu makai malam.

Enda lama pengudah nya sida iya serumah begau, pengudah ninga bala sida serumah nyerauh lalu betesauka pangan diri madahka bisi penusah angus nyadi ba salah siti bilik di rumah panjai nya.

Pengari Operasyen Bomba enggau Penyelamat Sarawak, madahka raban bomba bisi nerima bekait enggau penusah angus ke nyadi urung jam 8.50 malam.

Nangkan ke nya, sembilan raban bomba enggau diuluka Samsawi Mohamad ari Balai Bomba (BBP) Bintangor berumban ngesah ke palan penusah ke nyadi.

"Lebuh datai ba palan penusah ke nyadi, raban bomba ari BBP Bintangor ngeripotka api benung mau enggau jampat amat nyelarai lalu nganguska rumah panjai nya!" Ku iya lebuh ke dirandau pengarang berita.

Kebuah penusah angus nyadi dipechayaka bepun ari dapur sebuah bilik sebedau api nyelarai enggau jampat lalu ngejungka rumah panjai angus 90 peratus.

Raban bomba bejalaika operasyen madamka api ngena chara 'defensive' laban api mau enggau jampat nyelarai ba rumah panjai nya.

Raban BBP Bintangor semin ulih ngena siti jalai (hos) enggau dua nosel ai pemanjai 200 kaki ari tangki ai lori bomba ketegal nadai pala paip tauka palan endur raban bomba ngulihka ai ba palan penusah ke nyadi.

Raban bomba pulai mansang ngisi tauka ngambi ai ari pala paip ngena lori bomba urung penyauh 500 meter ari palan penusah angus ke nyadi.

Raban bomba ari BBP Sarikei ke diuluka Miian Paimin enggau sembilan raban bomba mega bisi datai ngesah ke palan penusah ke nyadi ngambika ulih enggau besaup bejalaika operasyen madamka api.

Api ulih dijaga urung jamr 9.30 malam enggau operasyen tembu urung jam 11.55 malam.

Nadai orang bakal tauka penusah bebadi nyawa diripotka nyadi ba palan penusah angus ke nyadi.

Semua sida serumah ke napi penusah nya (18 iku orang besai enggau dua iku anak mit pengudah nya diasuh diasuh ngenduh enda lama di Dewan Masyarakat Majlis Pampang Meradong enggau Julau, Pakan.

Kebuah penusah angus nyadi enggau penyampau pengerugi agi dipansik.