Siku lelaki ditemu enda engkebut di Pasar Tamu Bintulu
Cari Berita

Advertisement

Siku lelaki ditemu enda engkebut di Pasar Tamu Bintulu

Chief Editor | Berita Iban MY
September 1, 2019

KASIH AMAT: Pendiau ba palan penusah ke nyadi pengudah niang Mathew (graphik mit) ditemu enda engkebut ba kerita ke dikena iya. 

BINTULU: Siku lelaki ditemu enda engkebut tauka ngeleda ba dalam kerita di Pasar Tamu Bintulu, urung jam 8.30 pagi tadi.

Kepala Polis Pampang Bintulu, Superintenden Zulkipli Suhaili, madahka raban polis lalu berumban ngesah ke palan penusah ke nyadi pengudah nerima kanggau ari Unit Emergency Sepital Bintulu bekait enggau bisi siku lelaki enda ngeleda ba dalam kerita nya.

Ku iya, lebuh datai ba palan penusah ke nyadi, raban polis ngeripotka lelaki nya dipeda benung duduk nyandih ba penuduk endur deriba enggau enda engkebut tauka enda ngeleda.

Raban paramedik ke bisi ngesah ke palan penusah ke nyadi, madahka lelaki udah enda ulih diselamatka agi tauka udah parai.

Asil pansik ba palan penusah ke nyadi, lelaki ke parai nya dikelala ngena nama Mathew Julin Banyoi, 33 taun, orang ari Rumah Saging, Sungai Selabi Kemena Selangau.

Asil pansik tumu, nadai bekau jamah tauka jenayah diripotka nyadi ba palan penusah ke nyadi.

Bangkai lelaki nya udah dianjung ke Rumah Bangkai Sepital Bintulu kena bejalaika pengawa buntas tasat.

Naka kediatu, kes nya ditukuka nyadi kes parai ngenyit.