Siku orang tuai parai, ngaga 'U turn' di trafik light Batu 12, Jalai Kuching-Serian
Cari Berita

Advertisement

Siku orang tuai parai, ngaga 'U turn' di trafik light Batu 12, Jalai Kuching-Serian

Chief Editor | Berita Iban MY
September 8, 2019

KASIH AMAT: Bangkai orang tuai nya dilamun ngena kain burak (tengah) diripotka ngapuska seput kepenudi ba palan eksiden ke nyadi ketegal balat bakal ba rekung enggau tubuh iya.

KUCHING: Siku orang tuai parai pengudah motosikal ke ditepan iya belantak enggau sebuah kerita di trafik light Batu 12, Jalai Kuching-Serian, lemai kemari, Hari Enam.

Kepala Opis Tasat enggau Trafik Sarawak, Superintenden Alexson Naga Chabu, madahka orang tuai nya dikelala ngena nama Ujat Keong, 61 taun, orang ari Taman Muhibah, Batu13, Jalai Kuching Serian, diripotka ngapuska seput kepenudi ba palan eksiden ke nyadi.

Ku iya, eksiden dipechayaka nyadi urung jam 6.55 lemai nya, siku staf kilang, 29 taun benung bejalai ngena kerita ari Kuching nuju ke Serian tang orang tuai nya ngena motosikal ari muak Serian nuju ke Kuching.

"Staf kilang ke deriba kerita nya benung ba di lorong tengah jalai. Lebuh datai ba trafik light Batu 12 Jalai Kuching Serian. Maya api trafik light udah beganti chura hijau, enda memukai orang tuai nya dipechayaka bejalai ngena motosikal enggau beputar 'U' laban deka pulai ke rumah ke diuan iya di Taman Muhibah, Batu 13 enggau ari nya mega lalu ngejungka penusah eksiden nyadi," ku iya lebuh ke dirandau pengarang berita, sehari tu tadi.

Ku Alexson, pengudah eksiden nyadi, orang tuai nya diripotka balat bakal ba rekung enggau tubuh iya.

Raban perubat ari Sepital Besai Sarawak (HUS) ke bisi ngesah kia madah orang tuai nya udah enda ulih diselamatka agi tauka udah nadai.

Bangkai orang tuai nya dianjung ke Sepital Besai Sarawak (HUS) kena bejalaika pengawa buntas tasat.

"Kelimpah ari nya, dua buah entuka ke bekait enggau eksiden nya dibaie ke Balai Trafik IPD Padawan laban deka diperesa di Puspakom enggau Opis Kimia," tandu iya.

Kes nya agi dipansik ari baruh Seksyen 41(1) Akta Pengangkutan Jalan 1987.