"Ukai aku ke bisa, tang ba gereja nya bisi kuasa Roh Kudus," ku iya
Cari Berita

Advertisement

"Ukai aku ke bisa, tang ba gereja nya bisi kuasa Roh Kudus," ku iya

Chief Editor | Berita Iban MY
September 7, 2019

PUJI TUHAN: Apai enggau indai Joshua udah jauh beinsur manah.

SRI AMAN: Pun bulan tu tadi (1 September 2019) bisi status ke dipansutka siku lelaki bekait enggau penusah ke ditapi apai enggau indai iya viral di media sosial.

Ba status nya, mantaika grapik tauka picha apai, indai enggau beberapa iku bala sida sebilik enggau nyengkaum lelaki nya niki ke sebuah gereja ba atas bukit iya nya Mount Hosanna Chapel Catholic Church.

Naka ke sehari tu, status nya udah manggai lebih 4 ribu orang likes, 3 ribu orang share enggau seribu lebih iku orang ti udah meri penemu tauka komen.

Lemai kemari, siku ari raban kami interbieu orang ke ngempu status nya laban deka nemu nama utai ti udah nya enggau silik agi.

Asil interbieu raban kami, lelaki nya dikelala ngena nama Joshua Jackson, orang ari Sibu, bepengarap Kristian (Methodist).

NYADIKA TANDA: Apai Joshua (kiba) enggau indai iya (kanan)

Joshua madah indai iya dulu sakit kena November 2018, iya (indai Joshua) bisi tama kuman ba dalam lempuang (sakit TV) enggau ngejungka iya enda ngeleda dalam beberapa hari.

"Udah indai aku ngeleda, iya lalu dijaga kami sebilik ba rumah," ku Joshua.

"Enda lama pengudah nya, kena bulan December 2018 sebedau Krismas, apai aku pan kena sakit stroke tauka parai tubuh sepiak kanan.

Pala apai aku nadai nenama, semina kaki enggau jari iya enda ulih engkebut.

Bepun ari nya mega apai aku nyau enggai makai enggau ngejungka iya ngangkat lebuh deka mai iya mindah kebukai.

Ketegal penyayau enggau pengangkun ke apai iya, sida Joshua sebilik mega kala nguji nganjung iya beurut enggau mayuh macham chara kebukai kena nyumanka apai iya tan bedau ga bisi insur.

Mayuh macham chara ke udah diuji kami sebilik nyumanka apai iya tang bedau ga meda tanda tauka insur apai iya nya majak manah..

"Aku bisi ninga orang madah bisi sebuah Gereja ba atas bukit di Sri Aman ulih nyumanka orang sakit ngena chara sembiang," ku iya.

TU MEH ENDUR IYA: Mua penatai Mount Hosanna Chapel Catholic Church di Sri Aman


TU MEH ENDUR IYA: Pendiau Mount Hosanna Chapel Catholic Church enti dipeda ari baruh



Asil pansik Berita Iban Online ba media sosial, Mount Hosanna Chapel nya salah sebuah Gereja Roman Katolik ke dientak tauka didirika urung penyauh 34KM ari Pasar Sri Aman.

Kelimpah ari nya, gereja nya mega tebilang ari segi design arkitektur.

Nyadi tiga batang lilin nya nyadi symbolic “Trinity” ti nandaka “Father, Son and Holy Spirit” dan “Jacob’s Ladder”.

Reti 100 anak tangga nya, enti nitihka orang ke bepengarap kristian tangga nya baka tangga nuju ke Serega.

Asil pansik silih raban kami, bisi orang madah gereja nya semina sebuah gereja ti udah lama.

Gereja nya bebadi pengudah siku lelaki cina, orang pemisi enggau indai iya ti napi penyakit cancer ba stage 4 ti udah pulai mansang ngena jalai nya.

Sebedau nya, lelaki nya suah amat nganjung indai iya nya berubat ba sebuah tokong cina di Sri Aman.

Lelaki nya nganjung indai iya nya berubat kia nyau udah betaun-taun, iya pan nyau putus asa enggau badu nganjung indai iya kia pengudah meda indai iya nya nadai beinsur manah.

Lelaki nya udah berapa taun ngiga chara enggau nganjung indai berubat, duit ringgit pan nyau udah beribu udah ambis.

Lebuh seduai iya mulaika diri ke rumah enggau bisi mansa gereja nya, ati lelaki nya ngasuh iya nganjung indai iya ke gereja ti udah rusak nya.

Nangkan ke nya, lelaki nya lalu mai indai iya nya niki ke atas bukit nya.

"Suba nadai tangga enda baka diatu," ku orang ti nusui cherita nya.

Lebuh seduai dua datai ba gereja nya, anak iya (lelaki nya) minta kasih ari paderi ba gereja nya ngambika ulih besembiang enggau nyumanka indai iya nya.

Maya sembiang sebedau seduai iya pulai, paderi nya bisi negu indai iya nya lalu macha sampi bisi nyebut nama Jesus enggau minta Jesus nyumanka indai iya nya.

Dalam kandang beberapa minggu pengudah pulai ari gereja nya, indai lelaki nya nyau jauh amat bebali enggau lelaki nya tekenyit tauka enda pechaya meda indai iya nya nyau beinsur jauh amat manah.

Laban ke deka nemu pasal pengerai indai iya, lelaki nya pan nganjung indai iya peresa ke sepital enggau ngasuh lutur pakar meresa indai iya nya.

Enda memukai, gaya mua lutur pakar nya  bebali (tekenyit) baka orang ke bisi meda antu enggau madahka lelaki nya indai iya udah suman tauka nadai nenama.

Lutur pakar nya mega bisi nanya lelaki nya dini endur indai iya nya berubat enggau sapa orang ke ngubat indai nuan nya?.

"Nama iya Jesus," ku lelaki nya nyaut tanya lutur nya enggau nyawa ti lantang sereta gaga ati.

Pengudah meda indai iya nya nyau suman baka selama, lelaki nya bisi juluk ati deka malas pemanah budi enggau meri terima kasih ngagai gereja nya iya deka ngangkatmanah tauka ngaga gereja nya baru.

"Nya aja cherita ke ditemu aku bekait enggau Mount Hosanna Chapel Catholic Church, aku tu semina nampung cherita orang tuai aja," ku penerang.



Nangkan ke nya, sida iya sebilik lalu beaum deka nguji nganjung apai enggau indai iya ke Gereja ba atas bukit nya ke dikelala ngena nama Mount Hosanna Chapel Catholic Church.

Ku iya, kena bulan February 2019, kami sebilik ngena sebuah entuka bekejang ari Sibu urung jam 5 pagi enggau kami sebuat datai ba gereja nya urung jam 9:30 pagi.

NYIN IYA: Joshua madahka gereja ke dituju sida iya.

"Kami sebilik mansang ke gereja nya enggau juluk ati deka nyumanka indai enggau apai aku ke benung sakit nya enggau deka besembiang sereta pechayaka kuasa Tuhan ulih nyumanka seduai apai enggau indai aku nya.

"Lebuh datai, aku lalu ngesan apai aku belubah enggau gegadai nyentukka datai ba atas bukit nya endur gereja ke dituju kami nya.



"Aku enggai bula, umbas iya ga penyauh niki tangga ke bukit nya, dipelabaka aku lebih ari 100 iti gigi tangga nya.

"Pengawa sembiang belabuh urung jam 10:30 pagi nya, nyadi laban kami sebuat ari sembiang Gereja Methodist, tang Gereja Hosanna Chapel nya Katolik.

Sigi berasai nyelaie mimit asai aku lebuh kami sembiang maya nya.

"Paderi nya madahka aku, ukai aku ke bisa tang endur nya ke bisi Roh Kudus," ku Jason lebuh ke dirandau pengarang Berita Iban Online.



Lebuh kami sembiang, paderi nya lalu merekat apai enggau indai aku, urung 10-12 iku orang ti sakit bisi datai sembiang maya nya.

Urung jam 12 lebih tengah hari nya, pengudah tembu sembiang aku mai lalu ngiring enggau nyaga pengelikun apai aku nurun ke baruh bukit belubah.


Lebuh kami sebuat pulai ari Hosanna Chapel nya, maya kami agi dirantau jalai deka pulai ke Sibu.

Kami bisi mansak orang ke bisi nyual utai tunu ba ti jalai.

"Enda memukai apai aku maya nya lalu bejaku munyi tu 'manah amat bau rengut nya'," ku Joshua enggau tekenyit laban apai iya ngelamatu sigi enggai nyium utai bebau.

"Nya meh salah sigi ari kuasa Tuhan, IYA bekereja dalam tubuh enggau merekat apai aku..

Pagi hari siti pengudah kami pulai ari Hosanna Chapel nya, apai nyau udah ulih bejalai, ulih sesaiz (sukan), nyau ka makai baka selama enggau majak lama majak beinsur manah pengerai apai aku nyentukka sehari tu.

"Meri puji enggau terima kasih ngagai nuan Tuhan laban udah nyumanka apai aku," ku Joshua madahka pengaga ati iya.

Sebedau raban pengarang kami nyurutka, Joshua madah iya enda nyangka status ke dipansutka aku ulih viral, nyau beribu iku orang udah likes enggau share ke status ke dipansutka aku nya.

Ku iya, iya deka naruh video enggau picha nya ba dalam facebook laban deka nyadika tanda aja.

Nuju sapa ke deka nemu dini endur enggau penerang ti silik bekait enggau gereja nya tau datai tauka betalipaun ngagai lumur ke ditulis baka ke dibaruh tu:

Chelak tiru: Google
📷 @beritaibanMY

Puji ke Allah Taala! Enggau ati ti pemadu gaga sereta meri terima kasih ke semua berekat ti manah amat udah diterima kitai. Kitai besembiang awakka berekat Allah Taala nurun belama ba semua kitai. 🙏