Siku lelaki parai tagup baya di Miri
Cari Berita

Advertisement

Siku lelaki parai tagup baya di Miri

Chief Editor | Berita Iban MY
November 29, 2019

GAMBAR PENGIAS: Baya ba dalam parit.

MIRI: Siku lelaki Indon parai dipechayaka kena tagup baya lebuh iya ngiga kangkung ba dalam parit sebuah ladang di Jalai Pesisiran Miri-Bintulu, ditu, Hari Satu tu tadi.

Chief Polis Pampang Miri, ACP Lim Meng Seah madah, lelaki nya dikelala  ngena nama Asbullah Daeng Situju, 37 taun, dipechayaka kena tagup baya urung jam 5 lemai nya.

"Orang ke ngaga ripot (saksi) enggau dua iku bakih iya berumban ngesah ke palan penusah ke nyadi enggau nguji ngiga Asbullah.

"Asil sidi enggau giga sida tiga, sida mujur tetemuka lengan kanan Asbullah ba tisi parit nya.

"Enda lama pengudah nya, sida tiga mega mujur nemu punggung enggau kaki kiba Asbullah ba dalam parit entara Sungai Telong," ku iya lebuh dirandau pengarang berita, kemari.

Ku Lim, lebuh penusah nyadi bisi siku bakih Asbullah mega sama bisi nurun ngiga sayur ba endur nya enggau meda baya mansang semak Asbullah lalu nagup iya.

"Opis Jelu Siga udah dipadahka bekait enggau penusah ke nyadi. Tang taja pia, nyentuk ke diatu (kemari) baya nya apin kena tangkap," ku iya.