15 December 2019 - Hari Minggu Ketiga Musim Penatai (Adven)
Cari Berita

Advertisement

15 December 2019 - Hari Minggu Ketiga Musim Penatai (Adven)

Chief Editor | Berita Iban MY
December 15, 2019

"Kita enda tau enda kering, lalu enda tau takut! Allah Taala deka datai ngelepaska kita, lalu ngukum bala munsuh kita." -35:4

Bacha Ke Satu: Isaiah 35: 1 - 6A, 10

Menua puang deka rami gaga, lalu bungai deka tumbuh di menua ti kusi.

Menua puang deka belagu lalu manjung gaga ati.

Menua puang nya deka manah dipeda baka Bukit Lebanon lalu deka nyadi ami baka padang ti di Karmel enggau di Saron.

Genap iku orang deka meda mulia TUHAN, meda pemesai enggau kuasa Iya.

Keringka jari ti lelak enggau patung ti lemi sereta begetar.

Sebut ngagai semua orang ke lemi semengat, “Kita enda tau enda kering, lalu enda tau takut! Allah Taala deka datai ngelepaska kita, lalu ngukum bala munsuh kita.”

Orang ke buta ulih meda, lalu orang ke bengal ulih ninga.

Orang ke enda ulih bejalai, deka merejuk lalu betanda, lalu orang ke bisu, deka manjung gaga ati.

Sida deka datai di Jerusalem enggau ati ti gaga belagu sereta manjung gaga ati.

Sida deka lantang belama iya, lepas belama iya ari ati ti sinu enggau ati ti tusah.

Masmur Entara: Masmur 146: 6B - 7, 8 - 9A, 9B - 10

Saut (peda Isaiah 35: 4): TUHAN, datai lalu selamatka kami.

Ke Satu
Iya endang seruran ngamatka semaya Iya.
Lebuh Iya ngakim Iya ngeringka orang ke kena tekan,
lalu meri pemakai ngagai orang ke lapar.
TUHAN ngelepaska orang ke kena jil.

Saut: TUHAN, datai lalu selamatka kami.

Ke Dua
Iya ngasuh orang ke buta meda.
Iya ngangkatka orang ke udah rebah.
Iya rinduka bala nembiak Iya ke lurus.
Iya nyaga orang kampar ti diau di menua kitai.

Saut: TUHAN, datai lalu selamatka kami.

Ke Tiga
Iya nulung indu ke balu enggau orang ke nadai apai indai,
tang ngerusak orang ke jai.
TUHAN endang Raja belama iya.
O Sion, Allah Taala nuan deka merintah belama iya.

Saut: TUHAN, datai lalu selamatka kami.

Bacha Ke Dua: Sante James 5: 7 - 10

Nya alai, menyadi, kita enda tau enda liat ati nyentuk ngagai maya Tuhan datai.

Peda kita pengeliat ati orang bumai nganti umai sida mansutka asil.

Sida liat ati nganti hari ujan lebuh musin ruruh daun enggau lebuh musin bungai.

Kita mega enda tau enda liat ati. Keringka ati kita, laban Tuhan nyau semak.

Menyadi, anang mut-mut ngelaban pangan diri, enggai ke Allah Taala ngakim kita.

Hakim diatu benung bediri ba mua pintu.

Awakka kita, menyadi, beteladan liat ati ba sida nabi ke bejaku dalam nama Tuhan.

Alleluia (peda Isaiah 61: 1 / Luke 4: 18)

Alleluia, alleluia
Roh Tuhan bisi ba Aku,
laban Iya udah nata Aku
ngambika Aku nusui Berita Manah ngagai orang ke seranta.
Alleluia.

Bacha Injil: Matthew 11: 2 - 11

Lebuh John Pemaptisa, ke ditutup dalam rumah jil, ninga pasal utai ti dikereja Jesus, iya lalu ngasuh sekeda murid iya mai pesan tu ngagai Jesus,

ku iya, “Kati Nuan tu orang ke deka datai, tauka kami nganti orang bukai?”

Disaut Jesus, “Pulai kita lalu padahka ngagai John utai ti didinga enggau dipeda kita:

orang ke buta, meda; orang ke kait-kupit, bejalai; orang ke sakit lan, dituchi,  orang ke bengal, ninga; orang ke mati, diangkatka idup baru, lalu Berita Manah ditusui ngagai orang ke seranta.

Beberekat meh orang ke enda nulak Aku!”

Lebuh sida murid John mupuk, Jesus lalu belabuh bejaku ngagai orang mayuh pasal John: “Nama utai ti deka dipeda kita lebuh kita bejalai di menua puang? Buluh ti beguyat laban ribut?

Nama kebuah kita bejalai ngagai menua puang? Deka meda orang ke ngena gari ti manah? Orang ke ngena gari ti manah diau dalam istana!

Nama utai ti deka dipeda kita? Deka meda siku nabi? Sigi amat, tang lebih ari nabi.

Nya meh orang ke dikenang dalam Bup Kudus: ‘Aku deka ngasuh seruan Aku bejalai dulu ari Nuan, ti deka nyendiaka jalai ke Nuan.’

Enggau bendar Aku madah ngagai kita, ari semua orang ke udah diadaka, nadai siku ke besai agi ari John Pemaptisa.

Tang Iya ke pemadu mit dalam Perintah serega, lebih agi besai ari iya.”