18 December 2019 - Hari Tiga ba Minggu Ketiga Musim Penatai (Adven)
Cari Berita

Advertisement

18 December 2019 - Hari Tiga ba Minggu Ketiga Musim Penatai (Adven)

Chief Editor | Berita Iban MY
December 18, 2019


Bacha Ke Satu: Jeremiah 23: 5 - 8

Ku TUHAN bejaku, “Dinga nuan, maya deka datai alai Aku deka milih siku orang ke lurus ari peturun David, lalu iya deka merintah nyadi raja ti bepenemu-dalam lalu ngereja utai ti ngena sereta lurus di menua tu.

Lebuh iya nyadi raja, Judah deka likun, lalu Israel deka diau dalam pemaik. Iya deka dikumbai ‘TUHAN ti pengelurus kitai.’

Ku TUHAN bejaku, “Nya alai, dinga nuan, maya deka datai alai orang badu agi besumpah ngena nama Aku TUHAN ti idup, ti udah mai orang Israel pansut ari menua Ejip,

tang sida deka besumpah ngena nama Aku TUHAN ti idup, ti udah mai orang Israel pansut ari menua ti di utara, enggau ari semua menua bukai ti udah alai Aku ngachirka sida. Udah nya baru sida deka diau di menua sida empu.”

Masmur Entara: Masmur 72: 1 - 2, 12 - 13, 18 - 19

Saut (cf. 7): Awakka pengelurus ngerembai ngagai semua endur lebuh maya iya, lalu awakka pemaik tan belama iya.

Ke Satu
Ajar raja ngambika iya ngakim ngena pengelurus Nuan, O Allah Taala.
Bagi ngagai iya atur Nuan ti lurus,
ngambika iya megai bala nembiak Nuan enggau pengelurus
lalu merintah orang ke seranta ngena atur ti lurus.

Saut: Awakka pengelurus ngerembai ngagai semua endur lebuh maya iya, lalu awakka pemaik tan belama iya.

Ke Dua
Iya ngelepaska orang ke seranta, ke ngangauka iya,
enggau sida ke suntuk sereta enda dikibuhka orang.
Iya sinu ati ke orang ke lemi sereta seranta.
Iya ngidupka nyawa sida ke suntuk.

Saut: Awakka pengelurus ngerembai ngagai semua endur lebuh maya iya, lalu awakka pemaik tan belama iya.

Ke Tiga
Pujika TUHAN Allah Taala ke disembah orang Israel!
Semina Iya siku aja ti ngereja utai ti badas nya.
Pujika nama Iya ti bemulia belama iya!
Awakka mulia Iya ngemenuhka dunya.

Saut: Awakka pengelurus ngerembai ngagai semua endur lebuh maya iya, lalu awakka pemaik tan belama iya.

Alleluia
Alleluia, alleluia
O Ketuai Rumah Orang Israel,
ti meri Adat ngagai Moses ba Bukit Sinai:
datai lalu selamatka kami enggau kuasa Nuan ti besai.
Alleluia.

Bacha Injil: Matthew 1: 18 - 25

Baka tu ku gaya pengada Jesus Kristus.

Indai Iya Maria udah betunang enggau Josep, tang sebedau seduai iya jadi melaki-bini, iya betubuh-bisi ulih kuasa Roh Kudus.
Laban tunang iya, Josep, endang orang ke lurus, lalu enggai ngemaluka Maria di mua orang mayuh, nya alai iya berunding deka muai Maria ngena chara belalai.

Tang lebuh Josep benung berundingka nya, siku melikat Tuhan pegari di mua iya dalam mimpi, lalu bejaku, “Josep, anak David, anang takut ngambi Maria nyadika bini nuan, laban iya betubuh-bisi ulih kuasa Roh Kudus.

Iya deka ngadaka anak lelaki siku, lalu nuan deka meri Iya nama Jesus, laban Iya deka nyelamatka nembiak Iya ari dosa sida.”

Semua utai tu nyadi kena ngamatka jaku ti udah disebut Tuhan beseruanka siku nabi,

“Siku dara bungas deka betubuh-bisi, lalu ngadaka anak lelaki siku, lalu iya deka dikumbai Imanuel” (reti nya, “Allah Taala enggau kitai”).

Lebuh Josep dani, iya lalu nitihka jaku melikat Tuhan.

Iya jadi enggau Maria, tang iya enda beleman enggau Maria sebedau Maria ngadaka anak iya.

Josep lalu meri anak mit nya nama Jesus.