23 December 2019 - Hari Satu ba Minggu Ke-empat Musim Penatai (Adven)
Cari Berita

Advertisement

23 December 2019 - Hari Satu ba Minggu Ke-empat Musim Penatai (Adven)

Chief Editor | Berita Iban MY
December 23, 2019

Orang ke berimbai pendiau enggau iya, enggau kaban belayan iya ninga Tuhan udah ngayanka pengasih ti besai ngagai iya, lalu sida sama rami gaga ati enggau iya. - Luke 1:58

Bacha Ke Satu: Malaki 3: 1 - 4, 4: 5 - 6

Ku TUHAN Allah Taala bejaku:
Aku deka ngasuh seruan Aku nyendiaka jalai ke Aku.

Nya baru TUHAN ti digiga kita deka datai enggau ngenyit ba Rumah Sembiang Iya.

Seruan ti dikedekaka kita deka datai lalu madahka sempekat Aku.

Tang sapa tan lebuh Iya datai? Sapa ulih idup lebuh Iya pegari? Iya deka nyadi baka sabun ti bisa, baka api ti meresi besi.

Iya deka nuchi peturun Lewi, baka ke nuchi pirak tauka emas.

Udah nya baru sida mai piring ti ngena ngagai TUHAN.

Nya baru piring ti dibai orang Judah enggau orang Jerusalem ngagai TUHAN deka ngerinduka ati TUHAN baka menya.

Tang Aku deka ngirumka nabi Elijah ngagai kita sebedau Hari TUHAN ti besai sereta balat ngenakut datai.

Iya deka ngasuh apai enggau anak seati, ngambika Aku enda datai lalu ngerusak menua kita ngena sumpah.

Masmur Entara: Masmur 25: 4 - 5AB, 8 - 9, 10 & 14

Saut (peda Luke 21: 28): Bediri lalu angkatka pala kita, laban pengelepas kita nyau semak.

Ke Satu
Ajar aku jalai Nuan, O TUHAN.
Awakka aku nemu jalai Nuan.
Ajar meh aku diau nitihka pemendar Nuan, laban Nuan endang Allah Taala aku, ke ngelepaska aku.

Saut: Bediri lalu angkatka pala kita, laban pengelepas kita nyau semak.

Ke Dua
Laban TUHAN endang lurus sereta badas,
Iya ngajar orang ke bedosa jalai ti patut ditengah sida.
Iya nguluka orang ke baruh ati nengah jalai ti ngena lalu ngajar sida peneka Iya.

Saut: Bediri lalu angkatka pala kita, laban pengelepas kita nyau semak.

Ke Tiga
Enggau ati ti tetap sereta enggau pengerindu, Iya nguluka semua orang ke nitihka sempekat Iya, sereta ngasika adat Iya.
TUHAN nyadika pangan orang ke ngasika Iya lalu Iya netapka sempekat Iya baru enggau sida.

Saut: Bediri lalu angkatka pala kita, laban pengelepas kita nyau semak.

Alleluia
Alleluia, alleluia
O Raja semua bansa enggau batu penegap Gereja:
datai lalu selamatka mensia, ti digaga Nuan ari abus.
Alleluia.

Bacha Injil: Luke 1: 57 - 66

Maya pen datai alai Elisabet deka beranak. Iya lalu ngadaka anak lelaki siku.

Orang ke berimbai pendiau enggau iya, enggau kaban belayan iya ninga Tuhan udah ngayanka pengasih ti besai ngagai iya, lalu sida sama rami gaga ati enggau iya.

Ba hari ti kelapan sida lalu datai deka nutus anak mit nya, lalu sida deka meri iya nama Sekariah, ngangkatka nama apai iya.

Tang ku indai iya bejaku, “Ukai nya! Nama iya John.”

Sida lalu bejaku ngagai iya, “Nadai kaban belayan nuan bisi nama nya!”

Sida lalu bejaku ngena jari enggau apai iya, nanyaka nama ti deka diberi iya ngagai nembiak nya.

Sekariah lalu minta papan tulis, lalu nulis, “Nama iya John.” Semua sida lalu balat alit ati.

Tekala nya mulut Sekariah tebuka, dilah iya ulih engkebut, lalu iya belabuh bejaku muji Allah Taala.

Semua orang ke berimbai pendiau enggau sida bela takut magang.

Lalu semua utai nya dikenang orang magang di serata menua ti bebukit di menua Judea.

Semua orang ninga nya lalu belematika utai nya.

Ku sida, “Namaka penyadi nembiak tu ila?”

Laban kuasa Tuhan amat bisi enggau iya.