Dayak Cafe kedai makai keterubah dempu Iban - Berita Iban Online

Header Ads

  • Baru Nyadi

    Dayak Cafe kedai makai keterubah dempu Iban



    Updated : 1:27 pm March 27, 2009




    MUKAH: Tuai Rumah Juki Lambul, siku tuai rumah panjai diberi basa bejadika siti kedai endur makai enggau ngirup ti baru dibuka lalu disempulang enggau adat miring jam pukul 10 pagi kemari. Udah tembu miring, siku indai orang penama Sadiah Intai lalu entudi nya bejaku besampika pemujur kedai iya, sereta ulih meri jalai enggau penemu ba pengawa dagang.


    Sadiah Intai, umur 43 taun, ke bempu kedai endur makai enggau ngirup keterubah dempu orang bansa Iban dibuka ba pasar Mukah diatu ke dikumbai Dayak Cafe.


    Munyi ku jaku Sadiah ngagai Berita Iban ditu lebuh maya pengerami muka kedai nya kemari, iya ke datai ari menua Bageri, Batu 15 Jalai Selangau-Mukah madahka pengaga ati meda diri empu ulih baka orang bukai mega besimpan ka mudal lalu ngena mudal ulih laki iya gawa ngelamatu dikena bedagang.


    “Bepun ari diatu aku ke ditulung siku menantu aku ke lelaki, dua iku anak indu enggau siku uchu nguji enggau bebendar gawa nitih baka orang bukai ke udah mansang bejalaika pengawa bakatu.


    Iya bisi ngangau siku tuai rumah di rumah panjai ba Bagerik, Tuai Rumah Juki Lambul enggau lebih 50 iku bala kaban belayan ke semak awakka sama enggau berami bepun ari pengawa miring ngarapka pengawa ke digaga iya dajihka laku, mansang enggau ulih meri pengarap ngagai orang sama-sama enggau datai ngerami sereta makai enggau ngirup ba Dayak Cafe nya.


    Ku Sadiah, kedai iya tiap hari dibuka tumu jam 7.00 pagi ngagai pukul 11.00 malam. Endur kedai nya, iya ke betul-betul ba endur ti senang dipeda orang, lalu iya mega bisi ditulis ba papan tanda nama Dayak Cafe seberai opis besai ke benama Opis Pehin Mukah, sebaris enggau Bank Rakyat Mukah enggau enda jauh ari endur kedai nyual tikit Toto ila.


    “Bemudal ari jereki ke diulih laki aku penama Kui, aku enggau naka ulih sereta bediri atas kaki diri kena ngayan ngagai orang bukai ngichaka juluk ati aku ke bedagang ngelama tu ayan sereta bulih pemansang ba mata orang bukai,” ku tambah Sadiah.


    Kedai makai Dayak Cafe tu ba Sublot 1159 Ground Floor, Block C, Bandar baru Fasa II Mukah nyendiaka mayuh macham pemakai iya nya baka pansuh tauka lulun, asi sereta mayuh macham agi pemakai asal kitai bansa Dayak ba Sarawak diatu. Kelebih agi deka nyendiaka endur baru ngagai orang dagang temuai (ari menua tu enggau menua tasik) nyepi asai lauk disediaka ulih bala kitai Iban.


    Bala mayuh ke deka datai ngirup enggau makai lalu enda milih bansa disemaya deka diberi anti penatai enggau nah ke manah sebaka enggau ati sereta ulah tukay indu ke bempu kedai tu ila. Kelimpah ari nya mega, bala ke datai ulih mega ngaga peminta nama bansa lauk enggau asai ti kedeka sida iya.


    Rega ai irup enggau semua pemakai nitih baka dipinta ulih orang bukai ke sama bisi muka kedai bakatu. Nya alai nadai kebuah bala pemacha ke bisi ngetu di Mukah enda ngiga Dayak Cafe ditu.


    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads