Masing mai Jawah ngingatka jaku iya 20 September 2007 - Berita Iban Online

Header Ads

  • Baru Nyadi

    Masing mai Jawah ngingatka jaku iya 20 September 2007



    1:27 pm March 27, 2009




    KUCHING: Chalun Parti Keadilan Rakyat (PKR) ba bepilih mit Batang Ai, Jawah Gerang dikumbai Presiden Parti Rakyat Sarawak (PRS) Dato Sri Dr James Masing orang ke enda entap runding.


    Masing meri chunto, suba Jawah ngemesaika pengawa manah Barisan Nasional (BN) ke mai pemansang nguntungka rayat.


    Iya madah, bukti Jawah madah baka nya bisi pansut ba surat berita The Borneo Post, 20 September 2007 ba lambar lima.


    Berita nya ke bisi nyebut Jawah madah: “Aku orang ke tetap enggau BN lalu selalu tetap enggau BN selama iya.”


    Jaku iya nya dipansutka iya ba pengawa Pemimpin Bersama Rakyat kena 18 September ke ngena jaku rambai ‘BN the only ways, ku Jawah’ tu nyangka enda dikingatka iya, tang agi dikingatka Masing.


    “Ba artikel nya, iya muji Kepala Menteri (KM) Pehin Sri Abdul Taib Mahmud ba pengawa pemansang KM ti dibai BN


    “Iya mega ngemesaika Sapit Kepala Menteri Datuk Patinggi Tan Sri Alfred Jabu ke nyadi pemesai Dayak ke udah mai pemansang ngagai rayat,” pia ku Dr james Masing ba aum media ditu, kemari.


    Jawah, bekau Kaban Parlimen Lubok Antu maya iya agi ba BN, udah megai pengawa nya dalam kandang lima penggal.


    “Nama utai ke disebut kami agi enti 25 taun iya udah gawa nyadi pengari rayat tang infrastruktur ba Batang Ai agi kurang,” ku iya.


    Iya madah, pengundi ba Batang Ai tentu nemu ni naka pemendar Jawah lalu ngaga pemutus ke landik terus nyukung chalun BN.


    “Utai ke ulih digaga enggau enda ulih digaga (Jawah) nyadi rahsia ke udah ditemu orang mayuh,” ku iya.


    Bepilih mit Batang Ai kena 7 April tu ila dipelaba betangkup tiga penjuru entara Jawah, chalun BN Malcolm Mussen Lamoh enggau chalun Bebas, Johnny Chuat.


    Suruhanjaya Pilihan Raya (SPR) netapka hari ngantung nama chalun kena hari Minggu tu ila. Kerusi Dewan Undangan Negeri nya kusong berindik ari pemati niang Datuk Dublin Unting Ingkot kena 24 Februari tu tadi.


    Kelimpah ari nya, Masing madahka dawa PKR ke madah Opis Len Savay Sri Aman ke minta nama, chelak tingki enggau lumur akaun ari orang mayuh ke diau ba rumah panjai nya cherita ke enda betul.


    Iya madah Opis Tanah enggau Survei, semina minta tuai rumah meri salin tingki tiap iku orang ke diau ba rumah panjai kena ‘update’ pemadah Skim Gempuru Batang Ai, Lubok Antu.


    “Isi surat ari Len Savay kena 13 Mac 2009 ngagai Tuai Rumah Nanga Ukom, Lubok Antu, nadai nyebut minta lumur akaun,” ku iya.


    Nya alai, iya madah ngagai PKR anang barang utai sebut ngulihka pemenang.
    Hari Satu tu tadi, Penyanding Penemu PKR Datuk Seri Anwar Ibrahim bisi madahka pengirau ati iya enggau chara politik kamah ke deka ngachau pemutus bepilih mit Batang Ai.


    “Ketuai PKR Lubok Antu Nicholas Bawin Anggat tu tadi baru nemu Opis Tanah enggau Survei Bagian Sri Aman minta salin kad tingki enggau lumur akaun orang mayuh ke diau ba rumah panjai ba Lubok Antu,” ku iya.


    Kilah ensanus, Mandal Presiden Kanan Parti Demokratik Progresif Sarawak (SPDP) Datuk Jacob Dungau Sagan, madah Jawah Gerang enda ulih dikena nenung peluang iya menang di Batang Ai, ku


    Iya madah, suba Jawah nyadi wakil Barisan Nasional (BN) lebuh iya menang kerusi Parlimen Lubok Antu ba taun 1987. Ku iya, diatu gaya nya udah berubah laban Jawah udah nyadi wakil penyakal lalu bedau ditemu enti bala pengundi agi nyukung iya ke enda.


    “Gaya nya udah berubah diatu. Enda baka suba lebuh iya (Jawah) ngerikot pemenang ke mudah lebuh agi begulai enggau BN.


    “Tang diatu Jawah nyadi wakil penyakal. Lalu tu betangkup tu ila deka beratika kimpin ke chukup kuat ngagai dua piak parti tu,” ku iya madah maya lebuh ditemu udah bejadika Seminar Meningkatkan Persaingan Melalui Kreativiti dan Inovasi, ditu, ensanus.
    Jacob ti mega Sapit Menteri Dagang Entarabansa enggau Industri ngarapka penyerakup pemesai BN sama gawa enggau rayat ngetanka kerusi Batang Ai.




    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads