Projek perintah deka dikereja nitihka perambu - Berita Iban Online

Header Ads

  • Baru Nyadi

    Projek perintah deka dikereja nitihka perambu



    1:27 pm March 27, 2009




    Semua pemansang deka diintu nyengkaum sekeda projek baru baruh pakej penyungkak ekonomi II


    KUCHING: Semua projek perintah deka terus dikereja nitihka perambu nyengkaum ngaga projek ba Koridor Kuasa Tau Kena Baru Sarawak (SCORE) ke begunaka orang ari industri berumah ba 10 bengkah industri berat, nyengkaum ngaga palan industri, infrastruktur, komersil enggau ngaga alai orang diau.


    “Kami ngarap projek pemansang terus digaga kelebih agi ke bisi dalam perambu enggau projek baru baruh pakej penyungkak ekonomi awakka terus tegap.


    “Projek baka tu kelimpah ari ke bisi dalam perambu ulih ngurangka penusah rayat ulih mega nyukung kompeni betunga enggau ekonomi ke enda berapa manah diatu.


    “Aku ngarapka pengawa baka tu sama-sama ulih kereja kompeni enggau gerempung professional ngatur pengawa tu ba maya ke betul baka kediatu,” ku Kepala Menteri Pehin Sri Abdul Taib Mahmud ba teks jaku iya maya muka Building Trade Show ke diatur Pertubuhan Arkitek Malaysia Pampang Sarawak (PAMSC) ke dibacha Menteri Pengawa Berumah, Datuk Amar Abang Johari Tun Abang Haji Openg ke deka dibuka empat hari belabuh ari kemari.
    Kelimpah ari nya, Taib madah industri ngaga rumah siti entara sektor ke makin nambah nitihka penambah orang mayuh diau di menua tu.


    “Enggau gaya baka tu, perintah ngambi atur beratika gaya ekonomi diatu enda ngachau industri berumah,” ku iya.


    Taib madah baru, industri berumah diatu udah mansang enggau teknologi moden.


    “Baka chunto, kitai ngena sistem solar ke lampu kitai, atap thermal, sistem penchelap (cooling) enggau sekeda teknologi bukai ke ulih ngemanahka agi kualiti produk.


    “Pekara ke berat, kitai patut bisi kaul ke manah dalam industri, agensi enggau institusi ke ngungkupka pengawa Pansik enggau Pemansang (R&D) baka Palan Kuasa (Energy centre), SIRIM enggau universiti beratika idea enggau teknologi baru ke nguntungka industri,” ku iya.


    Taja pia, Taib madah industri berumah benung betunga enggau ubah ke nitihka kemaya hari, ari ‘labour-intensive construction’ ngagai ‘industrialised building system’ (IBS).


    “Perintah deka ngena sistem IBS tu sebedau tauka ba 2010, ngujungka kitai ulih ngurangka orang ngaga rumah ari menua bukai.


    “Perintah Besai udah ngayanka pemujur ngena IBS ba 320 bengkah projek serata menua. Kualiti iya manah nyauka sebaka ke dikena kitai diatu, nembuka siti-siti projek pan jampat, lalu enda ngena ungkus ke besai kelebih agi projek ke besai. Siti ari chunto projek perintah besai iya nya projek Program Flet Suwa di Batu Gong, Siburan ke ngena 60 peratus komponen IBS ke benung digaga diatu.


    “Kitai bisi Lembaga Pembangunan Industri Pembinaan (CIDB) ke ulih nyukung kita enggau latih, orang gawa ke landik enggau orang ke bepenemu,” ku iya lalu nambah enggau pemansang tu sida ke ngereja industri tu patut ngubah runding ngena chara IBS.


    Taib madah palan baka BTS tu ukai semina nyadi palan alai pengawa dagang, tang mega palan penemu kena industri tu bekunsi peneleba teknologi dalam produk enggau servis lalu mantaika idea, tren enggau konsep ke baru.


    “Berindik ari tu, aku ngasuh PAMSC beratika pengawa baka tu digaga besai agi, beserakup enggau organisasi bukai baka IEM, SHEDA, Gerempung Manufacturers enggau sekeda gerempung bukai lalu tau mega mai sida ari menua luar.


    “Enggau stindit ke tinggi ngatur pengawa, publisiti ke besai enggau jalai ke betul, aku ngarapka jemah ila BTS deka ngangkatka nama sida iya ba renggat entarabansa lalu mai orang ngaga rumah ari serata dunya narit mayuh agi orang bebelika produk kitai,” ku iya.
    Kelimpah ari nya, Chermin PAMSC Ng Chee Wee mega bisi madah berindik ari krisis wang global, sektor berumah udah beratika gaya ekonomi ke enda manah ngerampit lalu marit industri berumah di menua tu.


    “Diatu sektor berumah benung ngasaika penusah nya. Statistik ke baru ngayanka lebih 40 peratus unit rumah di Sarawak enda ulih jual.


    “Tiap krisis bisi peluang bukai baka bungai bank udah nurun. Enti nitih, tu maya ke manah meli rumah. Nyangka pemaju ngaga rumah enggau institusi wang tau kimpin manah agi baka nadai mayar bungai ba sekeda timpuh enggau sekeda insentif bukai ngagai sida ke deka meli rumah. Nyangka perintah ulih nulung beratika insentif chukai enggau sekeda atur bukai kena nulung orang mayuh,” ku Ng.


    Sama bisi datai ba pengawa nya kemari, Chermin PAMSC Ng Chee Wee enggau Presiden PAM Lee Chor Wah.




    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads