Rumah Steele Resa angus. - Berita Iban Online

Header Ads

  • Baru Nyadi

    Rumah Steele Resa angus.



    Updated : 1:27 pm March 27, 2009







    SRI AMAN: Rumah Steele Resa, di Stumbin, Sri Aman, 20 kilometer ari pasar Sri Aman ditu angus urung pukul 3.30 ngalih hari Satu tu tadi.


    Pengari bejaku rumah panjai nya, lebuh bejaku ngagai Utusan Borneo madah, maya ke angus nya, mina sebagi ari bala sida rumah panjai nya bisi di rumah, laban ke tebal agi benung ngetau ba umai.


    Ku iya, ari 17 pintu rumah panjai nya, 13 pintu bisi orang nguan, lalu sida empat pintu nya nadai orang dia laban tebal agi bala sida gawa ba luar pelilih Sri Aman.


    Ku iya nambah, bisi 63 iku bala sida ke nguan rumah panjai digaga ari kayu nya.
    Ku iya nerang, api ke makai rumah panjai nya mina ditemu sida ke nguan rumah panjai nya lebuh ninga panjung bala sida ari rumah panjai bukai ke enda jauh ari nya.


    “Udah ninga panjung nya, semua bala ke bisi ba rumah panjai nya lalu naka ulih rari ngidupka nyawa diri ari rumah panjai ke angus nya.


    “Kami tusah bendar ati laban nadai ulih ngambi sebarang dokumen besai guna baka tingki (MyKad), surat pengada enggau sekeda dokumen besai guna ke bukai,” ku iya.


    Ukai nya aja, ku iya, laban sekeda reta tengkira pesaka tuai turun menurun baka tajau, setawak, tabak enggau sekeda barang antik ke bukai mega sama nadai sempat diambi sereta lalu abis retung magang. Iya madah, api sekejap aja makai abis rumah sida nya.


    Ngagai maya berita tu ditulis, bala tudah sida ke tasah angus pendiau nya benung numpang diau ba rumah bala pangan enggau kaban belayan ke enda jauh ari nya, seraya ke nganti bantu ari sebarang orang, nyengkaum ari opis perintah.


    Pengari bejaku Opis Bomba enggau Pengidup Nyawa Sri Aman lebuh ditanya ba endur rumah ke angus nya madah, bala sida mujur ngerara api urung jam pukul 4.40 ngalih hari lalu api mujur dipadam abis urung pukul 6.28 lemai.


    Iya madah nadai nyawa ditaban ulih insiden angus nya, sereta nambah madah, pun penatai api nya agi benung ditasat.


    Menteri Muda Pemansang Tanah ke mega Kaban Kunsil Nengeri (KN) Simanggang ke mega Chermin Parti Sa’ati Rayat Sarawak (SUPP) Pampang Simanggang Datuk Francis Harden Hollis mega bisi datai ngabas bala tudah sida ke tasah angus nya lalu ngesah sida ngena belanja RM1,000 ngarika chermin SUPP Pampang Lingga.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads