Header Ads

  • Berita Tebaru

    BN menang di batang ai

    LUBOK ANTU: Barisan Nasional (BN) ulih ngetanka kerusi Dewan Undangan Negeri (DUN) Batang Ai udah parti nya menang enggau majoriti ke besai, 1,854 undi ba bepilih mit Batang Ai, kemari.

    Pegawai Bepilih Mit Kunsil Nengeri Batang Ai, Nelson Mujah Giri maya ba Dewan Kompleks Sukan Lubok Antu madahka chalun BN Malcolm Mussen Lamoh bulih 3,907 undi, urung pukul 7.45 malam kemari.

    Kelimpah ari nya, chalun Parti Keadilan Rakyat (PKR) Jawah Gerang nerima pemutus nya ke alai iya bulih 2,053 undi aja.

    Mujah mega madah, dalam pemayuh undi, 59 undi dikira rusak. Peratus bala orang ke pansut ngundi dalam 75.32 peratus. Pemayuh orang ke nurun ngundi bisi 6,019.

    Mussen, 49, ti sigi udah ditemu deka menang laban pemayuh undi ulih iya ba pun ngira undi urung pukul 3 lemai dipeda gaga ati.

    Pengaga ati iya sigi ulih peda orang mayuh ke bisi ba kompleks nya lebuh pemayuh undi ari tiap 25 palan ngundi dipadah siti-siti datai ngagai 7.35 malam ke pengujung iya dipadah menang.

    Peti undi ke penudi diterima ari palan ngundi ba Kutai urung pukul 7.30 malam.

    Gaya ba kompleks chapuh enggau penyukung BN ti mayuh ari sida nya ari komponen parti BN.
    Orang mayuh ari pasar Lubok Antu enggau kampung ba sebelah nya belabuh begempuru ba luar Kompleks Sukan Lubok Antu belabuh ari pukul 3 lemai laban deka nemu pasal bepilih mit nya.

    Bala penyukung enggau pemesai PKR keterubah iya sama bisi ba palan alai ngitung undi nyau makin kurang lebuh chalun sida iya alah.

    Jawah nadai dipeda ba palan ngitung undi nya. Pemesai PKR nyengkaum Gabriel Adit taja pia ngetu enda lama ba dewan nya.

    Maya pemutus deka dipadah, semina koordinator Bepilih PKR Batang Ai Dominique Ng bisi ba dewan.

    Sama bisi ba palan ngitung undi nya, Presiden Parti Rakyat Sarawak (PRS) Dato Sri Dr James Masing, Sapit Presiden Parti Pesaka Bumiputera Bersatu (PBB) Datuk Amar Abang Johari Tun Openg enggau Presiden Mandal Kanan PBB Datuk Amar Awang Tengah Ali Hasan.

    Parti PKR ti ngumbai deka menang ba beplih mit nya belabuh ari keterubah sida iya bekimpin nyau nadai temu asai agi lebuh ngira undi ke chalun sida iya makin kena tinggal ari siti pemutus ngagai siti pemutus.
    Jawah maya keterubah kimpin, besai pengarap deka menang bepilih mit nya lalu ngarapka sukung bala penyukung iya suba ke kala nyukung iya dataika lima penggal iya betangkup ba sitak Parlimen Lubok Antu.

    Maya nya Jawah agi enggau BN.
    Bepilih mit DUN Batang Ai diatur berindik ari pemati Datuk Dublin Unting ke udah nadai kena 24 Februari tu tadi.Opis Bepilih Menua (SPR) ngatur ngantung nama kena 29 Mac tu tadi.

    Sitak DUN Batang Ai bisi 8,006 iku pengundi ke udah ngerijista sida iya empu enggau pemayuh nya, 95 peratus bebansa Iban.

    Maya bepilih besai 2006, niang Dublin ari BN menang enggau majoriti 806 undi lebuh iya ngalahka chalun Parti Kebangsaan Sarawak (Snap) Nicholas Bawin Anggat.

    Mussen datai ba palan ngundi enggau bini iya, Dorothy Sylvester Pungga enggau anak indu iya Angelina Tra pukul 9.09 pagi.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads


    Deka nemu berita benung #Viral ninting hari: