Pemutus Labang dipuji bala Barisan Nasional - Berita Iban Online

Header Ads

  • Baru Nyadi

    Pemutus Labang dipuji bala Barisan Nasional

    Semua ketuai parti BN madah ngena bendar sida tiga nya ngelengka Parti Keadilan Rakyat
    LUBUK ANTU: Sehari sebedau rayat ba sitak bepilih Batang Ai nurun muai undi sida iya, bala rayat ba Batang Ai ditu dikenyitka enggau berita Ketuai Parti Keadilan Rakyat (PKR) Julau, Dr Ambrose Labang Jamba pansut ari parti nya lalu madahka diri deka nulung Barisan Nasional (BN) kimpin ba Batang Ai.

    “Seharitu aku madahka diri pansut ari PKR enggau tiga iku kaban bukai ari pampang ti sama, lalu kami deka nyukung BN ba kimpin Batang Ai tu.

    “Aku udah ngaga pengawa ke salah beserakup enggau PKR laban parti nya enda ulih gawa ka bala kami ba menua pesisir sereta enda ulih mai pemansang ngagai kami. Enggau tu aku mai raban bukai ke agi bedau enggau PKR mai sida iya beserakup enggau BN, laban semina BN ke ulih mai pemansang kelebih agi ngagai komuniti Dayak,” ku iya madah maya aum media ba Bilik Operasi BN ditu, kemari.

    Dr Labang udah matak jalai nyadi ketuai PKR pampang Julau ari taun iya direjista Opis Ngerijista Gerempung (ROS) ba bulan Disember 2008, taja pan iya kala dua kali bediri ngelaban Wong Judat ti ngarika perintah kenyau ari taun 2004.
    Nambahka nya, Labang tu siku orang ke bepeneleba gawa ba opis perintah lalu diatu iya gawa nyadi pengajar (pensarah freelance).

    Sama sereta enggau Labang pansut ari PKR iya nya bekau sapit ketuai PKR sitak Julau, Wong Kee Kai, Rajang anak Unau ke mega bekau Sekiteri PKR dia, enggau Kundi anak Untung (kaban komiti PKR).

    Berita Labang pansut ari PKR sereta tiga iku kaban parti nya balat ngelantangka ati sekeda pemesai BN menua. Entara komen ke bisi diterima ari pemesai BN nya baka ke nangkanka tu.
    Dato Sri James Masing, Menteri Pemansang Tanah madahka iya temegah ati enggau pemutus runding nya ari Labang ke pansut ari PKR lalu madahka diri deka nyukung BN ba kimpin Batang Ai.

    “Diatu iya udah nemu PKR nadai endur ti meruan ba Sarawak. Nyadi iya ti madahka diri pansut ari parti nya, lalu deka nyukung BN sigi berita ti manah ka bala kami.

    “Iya tu orang ke bisi pengelandik enggau bisi penemu lalu kala gawa ba opis perintah. Iya udah nemu PKR nadai meruan ba ati orang mayuh di Julau, lalu ukai semina ba pelilih menua nya aja tang mega ba serata menua Sarawak tu,” ku Masing ke mega Presiden Parti Rakyat Sarawak (PRS).

    Kelimpah ari nya, iya mega madah PKR, bebeduduk ari tu udah belabuh bepechah.

    Ketuai Pemadah PRS Datuk Joseph Salang Gandum madahka iya nemu PKR betapi enggau jalai ke nadai pengujung, lalu pemutus Labang ti pansut ari parti nya taja pan ngenyitka ati iya, sigi utai ke udah dipelaba.

    “Aku baru udah betemu enggau Dr Labang pagi tu tadi (kemari), taja pan aku tekenyit mimit ninga pemutus iya, tang pekara tu sigi udah disangka laban iya ukai orang ke nadai peneleba, laban mayuh peneleba, nyengkaum kala gawa ba opis perintah.

    “Iya nemu PKR betapi enggau jalai ke nadai pengujung, nya alai aku udah madah, nyangka pemutus ti diambi iya pemutus ti nyemetak ba ati iya, tambah enggau nya, manah mega iya pansut seharitu (kemari), laban ngingatka seharitu (kemari) hari ti Kudus ba orang Kristian, Hari Palm, sebedau Hari Easter tu jalai ke betul ba iya.

    “Seharitu (kemari) iya udah ngayanka tu hari ke manah iya ninggalka PKR lalu beserakup enggau BN. Diatu iya ba Batang Ai nulung BN bekimpin, lalu aku ngarapka bala PKR bukai mega deka nunda udi Ambrose taja pan kami enda majak sida iya,” ku Salang ke mega Sapit Menteri Kuasa, Ai enggau Telekomunikasi ba Perintah Besai.

    Kelimpah ari nya, Salang mega madahka chara politik PKR nya ukai politik ti ulih diterima orang ba menua tu ketegal adat menua tu ke enda sebaka enggau adat sereta jalai pengidup mensia mayuh ba palan parti nya, iya nya ba Semenanjung Malaysia.

    “Parti nya nadai alai ba menua tu, lalu chara sida iya bepolitik ke selalu beranu ke orang nadai awak sida iya bepolitik baka nya, ukai adat kitai ditu. Kitai orang ke ngemeranka pengelikun, bebasaka orang bukai.
    “Laban kitai nemu ukai pilih kitai diada nyadi Iban tauka Melayu, Melanau, Cina, laban kitai ada laban nya peneka ari atur Petara. Kitai enda ulih nukar agama kitai, lalu kitai mega enda ulih ngansak orang bukai bebasaka agama kitai enti kitai empu enda bebasaka agama orang bukai,” ku iya.

    Datuk Amar Abang Johari Tun Abang Haji Openg, iya nya Sapit Presiden Parti Pesaka Bumiputera Bersatu (PBB) ke mega Menteri Pengawa Berumah madahka pilih Dr Labang nya siti berita ti ngagaka ati, laban ku iya PKR nadai adab tuju lalu ukai parti nya ti ngemeratka peminta orang ba menua pesisir.

    “PKR nadai atur ke terang, kitai enda nemu ni adab tuju PKR tu. Tambah enggau nya, chara sida iya enda sebaka enggau peneka orang mayuh ke diau ba menua pesisir. Tu parti politik ke bepalan ba Semenanjung, nyadi ngagai kaban PKR bukai, aku ngarapka sida iya berunding enggau manah, laban semina BN ti ulih mai pemansang ngagai menua pesisir, lalu PKR tu siti parti ke enda relevan (ungkup menua pesisir),” ku iya.

    Datuk Joseph Entulu madahka iya gaga ati Labang udah mereti tentang pekara ke nyadi ba PKR.

    “Iya udah meda PKR enda entu ulih diterima orang ba menua Sarawak. PKR nadai kredibiliti, iya udah meda utai nya datai.

    “Ambrose Labang orang ke bepenemu, udah tentu pekara nya udah terang ba iya lalu aku nemu iya udah meri pemutus ti manah, lalu nambah baru, PKR udah masuk ngagai mayuh menua pesisir ba Sarawak tu, kelebih agi ba menua pesisir ke mayuh alai bala bansa Iban diau.

    Entulu, ti mega Sapit Menteri Pemansang Pesisir enggau Kandang Menua madahka PKR parti ke bepalan ba Semenanjung Malaysia enda ulih nyukung parti sida iya empu ditu.

    “Pelaba aku PKR ba Semenanjung pan nadai entu nyukung parti sida iya empu ditu.

    “Aku ngarapka iya masuk komponen parti BN, lalu pia mega aku ngarapka orang ba Batang Ai mega udah nemu utai kebendar, lalu ngarap orang ba sitak tu ngena peluang tu ngundi pekara ke bendar ke ulih mai pemansang ngagai sitak tu ditu.

    Dato Sri William Mawan Ikom, Menteri Pemansang Sosial enggau Urbanisasi bekelala enggau Labang. Laban ku iya, Labang entara Dayak keterubah masuk PKR, kelimpah ari ke kala mai Penyanding Penemu PKR, Datuk Seri Anwar Ibrahim bekimpin ba Pakan maya bepilih besai tu tadi.
    “Aku bekelala enggau iya, lalu utai ke temu aku iya tu siku bansa Dayak ke bepengelandik enggau mayuh peneleba. Diatu nyangka iya udah nemu bakani gaya parti nya (PKR), iya nemu bakani ku gaya pemansang ti diguna ulih orang ba menua tu kelebih agi pemansang ba menua pesisir ti ulih dibai BN aja.

    “Pekara ti patut diberatka kitai iya nya parti ke relevan ti ulih mai pemansang ngagai menua pesisir maya bepilih mit ba sitak Batang Ai tu.

    “Enti iya PKR, parti nya enda ulih dikena ditu kelebih agi ba komuniti Dayak, enti deka manding nya enggau BN, laban BN ngaga mayuh pemansang, nyengkaum ke benung digaga enggau pemansang ti benung diperambu diatu.

    “Taja pia, sigi ulih sida iya (PKR) ngulihka undi rayat ngena sekeda isu baka tanah pesaka tuai (NCR), tang ti disidi manah-manah ni naka sida iya deka ngasut rayat pasal nya, nyau pengujung ila momentum deka bejuraika nya ulih sida iya pan enda diputarka enggau manah. Bangkit isu tu ketegal ngulihka undi aja. Semina BN aja ke ulih mai pemansang.

    “Kedua, ba aku, Ambrose udah nemu iya enggai agi nipu rayat enggau ideoloji PKR. Pelaba aku udah lama iya nganti pekara ti dijanji PKR lalu siti pan nadai ulih diputarka sida iya.

    Kelimpah ari nya, Mawan mega madahka penyakal betapi enggau mayuh chabar kena ngemansangka menua.

    “Nyamai deka ngemantaika ke siti-siti pekara ke sensitif ngagai rayat tang ti nadai utai kena ngemutarka siti-siti pekara pan nadai asil ga mantai nya.

    “Enti kelalu bebendar majak orang mayuh masuk beserakup enggau nuan, baka nya mega orang beguai ninggalka nuan,” ku iya.

    Orang baka Labang ku iya, patut ngena peneleba iya beserakup enggau BN ngemansangka rayat.

    “Enda ibuh beserakup enggau penyakal ketegal minta didinga perintah,” ku iya lalu madah resipi politik ti endang asal ari menua tu berat agi ari parti ti bepalan ba Semenanjung nya laban tu ku iya mandangka penyerakup parti komponen BN.

    No comments

    Post Top Ad

    Deka nemu berita benung #TRENDING tauka #VIRAL ninting hari:

    Post Bottom Ads